ESDRAS 3 - Ti Biblia (1973)

Maruguian ti pannacaibangon manen ti templo.

¹ Ket idi nadanon iti maicapito a bulan, ket addan dagiti annac ti Israel cadagiti il-ili, naguornong dagiti tattao a cas maysa a tao idiay Jerusalem.

² Idin nagtacder ni Jesua nga anac ni Josadec, ken dagiti cacabsatna a papadi, ken ni Zorobabel nga anac ni Sealtiel, ken cadagiti cacabsatna a lallaki, ket binangonda ti altar ti Dios ti Israel, tapno idatagda iti rabawna dagiti datdaton a mapuuran, cas naisurat iti linteg ni Moises a lalaki ti Dios.

³ Ket insaadda ti altar iti rabaw ti pagbatayanna; ta adda buteng idi cadacuada a gapu cadagiti tattao dagiti dagdagada: ket indatagda iti rabawna dagiti datdaton a mapuuran ken Jehova, a datdaton a mapuuran met laeng iti bigat ken iti malem.

⁴ Ket nginilinda ti fiesta dagiti tabernaculo, a cas naisurat, ken indatagda dagiti datdaton a mapuuran iti inaldaw a binilang, a mayalubog iti linteg, cas sapulen ti rebbeng ti inaldaw;

⁵ Ket calpasanna ti cancanayon a daton a mapuuran, ken dagiti datdaton cadagiti lutuad, ken amin a nakedngan a fiesta ni Jehova a naconsagrar idi, ken iti tunggal maysa a nangidatag a cananakemna iti daton ti sibubulos a nakemna ken Jehova.

⁶ Manipud iti umuna nga aldaw ti maicapito a bulan nangrugida nga indatag dagiti datdaton a mapuuran ken Jehova: ngem ti cimiento ti templo ni Jehova saan pay idi a naicabil.

⁷ Nangtedda met ti pirac cadagiti agcavcaviti, ken cadagiti allawagi; ken taraon, ken inumen, ken lana, cadagiti taga Sidon, ken cadagiti taga Tiro, tapno agyegda cadagiti caycayo a cantingen nga aggapu iti Libano agingga iti baybay, agingga iti Joppe, a mayalubog iti palubos nga inted ni Ciro nga ari ti Persia cadacuada.

⁸ Iti maicadua a tawen ti idadatengda iti balay ti Dios idiay Jerusalem, iti maicadua a bulan, rinugian da Zorobabel nga anac ni Sealtiel, ken Jesua nga anac ni Josadec, ken dagiti natda cadagiti cacabsatda a papadi ken Levitas, ken amin dagiti rimmuar manipud iti pannacacayaw agingga iti Jerusalem, ket dinutocanda dagiti Levitas, manipud agtawen iti duapulo ken agpangato, tapno aywananda ti panagaramid ti balay ni Jehova.

⁹ Idin nagtacder ni Jesua agraman cadagiti annacna a lallaki ken cadagiti cacabsatda a lallaki, ni Cadmiel ken dagiti annacna a lallaki nga annac ti Juda, nagcaycaysada, tapno aywananda dagiti agtrabajo iti balay ti Dios: dagiti annac a lallaki ni Henadad, agraman cadagiti annacda a lallaki ken cadagiti cacabsatda a lallaki a Levitas.

¹⁰ Ket idi a dagiti agpatpatacder ti balay naisaadda ti cimiento ti balay ni Jehova, inornosda dagiti papadi a sicacawes ken sitotororot, ken cadagiti Levitas nga annac ni Asaf a sipipiangpiang, tapno agdayawda ken Jehova, a mayannurot iti bilin ni David nga ari ti Israel.

¹¹ Ket nagcancantada ti maysa ken maysa a nangdaydayaw ken nagyaman ken Jehova, a kinunada, Ta isu naimbag, ta ti kinamanangngaasina agpaut iti agnanayon a maipaay iti Israel. Ket amin a tattao nagdir-ida iti natbag a dir-i, idi a dinayawda ni Jehova, agsipud ta naisaaden ti cimiento ti balay ni Jehova.

¹² Ngem adu cadagiti papadi ken cadagiti Levitas ken cadagiti pangpangoloen dagiti balbalay dagiti amma, dagiti lallacay a nacakita idi iti immuna a balay, idi a naisaad ti cimiento daytoy a balay iti sango dagiti matada, nagsangitda a binuyog ti natbag a timec; ket adu ti nagdir-i a gapu iti rag-o:

¹³ Iti casta a di mapaglasin dagiti tattao ti ariwawa ti dir-i ti rag-o ken ti ariwawa ti sangit dagiti tattao; ta nagdir-i iti natbag a dir-i dagiti tattao, ket ti ariwawa mangeg idi iti adayu.