ESDRAS 10 - Ti Biblia (1973)

Ti gambor a panagaassawa maidian. Lista dagiti addaan assawa a gangannaet.

¹ Idi bayat nga ni Esdras agcarcararag ken agipudpudno, agsangsangit ken agculcul-ob iti sango ti balay ti Dios, timmipon kencuana ti maysa a dackel a gimong ti Israel dagiti lallaki, ken babbai, ken ubbing; ta dagiti tattao nagsangitda a naladingit unay.

² Ket ni Secanias nga anac a lalaki ni Jehiel, maysa cadagiti annac a lallaki ni Elam, simmungbat ket kinunana ken Esdras, Naglabsingcami a maicaniwas iti Diostayo, ken nangasawacami cadagiti babbai a gangannaet cadagiti umili iti daga: nupay casta adda inanama ita a maipaay iti Israel a maipapan itoy a banag.

³ Ita ngarud agaramidtayo coma iti maysa a tulag iti Diostayo a pagtalawentayo amin dagiti assawa a babbai, ken dagiti nayanac cadacuada, a mayalubog iti patigmaan ti apoc, ken dagiti; agkintayeg cadagiti bilin ti Diostayo; ket maaramid coma a mayalubog iti linteg.

⁴ Tumacderca; ta ti panggep biangmo, ket addacami kenca: tumuredca a siingel, ket agaramidca.

⁵ Idin timmacder ni Esdras, ket pinagsapatana dagiti pangpangoloen dagiti papadi, ken dagiti Levitas, ken amin nga Israel, tapno agaramidda a mayalubog itoy a sao. Iti casta nagsapatada.

⁶ Ngarud ni Esdras timmacder manipud iti sangoanan ti balay ti Dios ket napan iti sagumbi ni Johanan nga anac a lalaki ni Eliasib: ket idi a dimteng idiay, saan a nangan iti tinapay, saan nga imminum iti danum; ta nagdung-aw a gapu iti panaglabsing dagidiay a naggapu iti pannacacayaw.

⁷ Ket inwarragawagda iti amin a Juda ken Jerusalem cadagiti amin nga annac ti pannacacayaw, tapno aguornongda idiay Jerusalem;

⁸ Ket ti di umay iti uneg ti tallo nga aldaw a mayalubog iti patigmaan dagiti pangpangoloen ken dagiti lallacay, mapucaw amin a cucuana, ket maisina iti gimong ti pannacacayaw.

⁹ Idi amin dagiti lallaki ti Juda ken Benjamin naguurnongda idiay Jerusalem iti uneg dagiti tallo nga aldaw (maicasiam a bulan idi, iti maicaduapulo nga aldaw ti bulan); ket nagtugaw dagiti amin a tattao iti nalawa a disso iti sango ti balay ti Dios, nga agpigpigergerda a gapu itoy a panggep, ken gapu iti dackel a tudo.

¹⁰ Ket ni Esdras a padi timmacder, ket kinunana cadacuada, Naglabsingcayo, ket nangasawacayo cadagiti gangannaet a babbai, a nangpaadu iti babac ti Israel.

¹¹ Gapuna ita agpudnocayo ken Jehova, a Dios dagidi ammayo, ket aramidenyo ti pacaay-ayoanna; ket suminacayo cadagiti tattao ti daga, ken cadagiti gangannaet a babbai.

¹² Idin simmungbat ti amin a gimong ket kinunada iti natbag a timec, Cas ti kinunam a maipapan cadacami, casta ti rebbengmi nga aramiden.

¹³ Ngem adu dagiti tattao, ket tiempo ti adu a tudo, ket ditay mabalin ti agtacder iti ruar: ket daytoy saan la nga aramid iti maysa nga aldaw wenno dua; ta naglabsingcami iti casta unay itoy a gapu.

¹⁴ Madutocan ita coma dagiti pangoloentayo a maipaay iti amin a gimong, ket umay coma amin dagiti adda cadagiti il-ilitayo a nangasawa cadagiti gangannaet a babbai cadagiti nadutucan a tiempo, ket caduada dagiti lallacay ti tunggal ili, ken dagiti oc-ocomda, agingga iti mailiclic cadatayo ti nacabutbuteng a pungtot ti Diostayo, agingga iti maiwacas daytoy a panggep.

¹⁵ Da laeng Jonatan nga anac a lalaki ni Asael ken Jaazias nga anac a lalaki ni Ticva ti nagtacder a maibusor itoy a panggep: ket tinulongan ida da Mesullam ken Sabetai a Levita.

¹⁶ Ket dagiti annac ti pannacacayaw inaramidda a casta. Ket da Esdras a padi agraman cadagiti dadduma a pangpangoloen dagiti balbalay dagiti amma, a mayannurot cadagiti balbalay dagiti ammada, ken isuda amin gapu cadagiti nagnaganda, nailasinda; ket nagtugawda iti umuna nga aldaw ti maicasangapulo a bulan tapno palutputenda ti panggep.

¹⁷ Ket nalpasda agraman cadagiti amin a lallaki a nangasawa idi cadagiti gangannaet a babbai iti umuna nga aldaw ti umuna a bulan.

¹⁸ Ket cadagiti annac a lallaki dagiti papadi nasaracanda idi dagiti nangasawa cadagiti gangannaet a babbai: dagiti naganda, cadagiti annac a lallaki ni Jesua, ti anac a lalaki ni Josadec, ken dagiti cacabsatna, da Maasias, Eliezer, Jarib, ken Gedolias;

¹⁹ Ket impaayda ti imada tapno pagtalawenda coma dagiti assawada a babbai; ket idinto a nacabasolda, isuda indatagda ti maysa a carnero ti arban a maipaay iti babacda.

²⁰ Ket dagiti annac a lallaki ni Immer: da Hanani ken Zebadias.

²¹ Ket cadagiti annac a lallaki ni Harim: da Maasias, Elias, Semeias, Jahiel, ken Ozias.

²² Ket cadagitgi annac a lallaki ni Pasur: da Elioenai, Maasias, Ismael, Natanael, Jozabad, ken Elasa.

²³ Ket cadagiti Levitas: da Jozabad, Simi, ken Kelaia, (nga isu met laeng ni Kelita), Petaia, Juda, ken Eliezer.

²⁴ Ket cadagiti cumacanta: ni Eliasib. Ket cadagiti agaywan iti ruangan: da Sellum, Telem, ken Uri.

²⁵ Ket iti Israel: Cadagiti annac a lallaki ni Faros: da Ramia, Izzias, ken Malkias, ken Miamim, Eleazar, Malkias, ken Benaias.

²⁶ Ket cadagiti annac a lallaki ni Elam: da Matanias, Zacarias, ken Jehiel, Abdi, Jeremot ken Elia.

²⁷ Ket cadagiti annac a lallaki ni Zattu: da Elioenai, Eliasib, Matanias, ken Jeremot, Zabad, ken Aziza.

²⁸ Ket cadagiti annac a lallaki ni Bebai: da Johanan, Hananias, Zabbai, ken Atlai.

²⁹ Ket cadagiti annac a lallaki ni Bani: da Mesullam, Malluc, ken Adaias, Jasub, Seal, ken Jerimot.

³⁰ Ket cadagiti annac a lallaki ni Paat-moab: da Adna, Keleal, Benaias, Maasias, Matanias, Beseleel, Binnui, ken Manases.

³¹ Ket cadagiti annac a lallaki ni Harim: da Eliezer, Jesue, Malkias, Semeia, Simeon,

³² Benjamin, Malluch, ken Semarias.

³³ Cadagiti annac a lallaki ni Hasum: da Matenai, Matata, Zabad, Elifelet, Jeremai, Manases, ken Sami.

³⁴ Cadagiti annac a lallaki ni Bani: da Maadi, Amram, ken Uel,

³⁵ Benaias, Bedias, Keluhi.

³⁶ Vanias, Meremot, Eliasib,

³⁷ Matanias, Matenai, ken Jaasai,

³⁸ Ken Bani, Binnui, ken Semi,

³⁹ Ken Selemias, Natan, ken Adaias.

⁴⁰ Macnadbai, Sasai, Sarai,

⁴¹ Azareel, ken Selemias, Semarias,

⁴² Sallum, Amarias, ken Jose,

⁴³ Cadagiti annac a lallaki ni Nebo: da Jehiel, Matitias, Zabad, Zebina, Jadau, Joel, ken Benaias.

⁴⁴ Amin dagitoy nangalada idi cadagiti gangannaet nga assawa a babbai; ket dadduma cadacuada addaanda idi assawa a babbai a gapu cadacuada naaddaanda cadagiti annac.