ESDRAS 1 - Ti Biblia (1973)

Ti bilin ni Ciro a maipapan iti templo. Dagiti gamgameng ti templo maisublida.

¹ Idi umuna a tawen ni Ciro nga ari ti Persia, tapno ti sao ni Jehova iti pannacaaramat ti ngiwat ni Jeremias matungpal coma, ni Jehova tinignayna ti espiritu ni Ciro nga ari ti Persia iti casta isu nangaramid ti maysa a panangiwarragawag iti amin a pagarianna, ket incabilna met idi surat, a kinunana,

² Castoy ti cuna ni Ciro nga ari ti Persia, Isu-amin a pagpagarian ti daga inted caniac ni Jehova, a Dios ti langit ket incumitna caniac nga isu ibangonac ti maysa a balay idiay Jerusalem, nga adda sadi Juda.

³ Uray siasinoman nga adda cadacayo amin nga ilina, ti Diosna adda coma kencuana, ket sumang-at coma idiay Jerusalem, nga adda sadi Juda, ket bangonenna ti balay ni Jehova, ti Dios ti Israel (isu Dios), nga adda idiay Jerusalem.

⁴ Ken uray siasinoman a mabati, iti uray ania a dissoa paggangannaetanna, dagiti lallaki ti dissona isu ti tulonganda coma iti pirac, ken iti balitoc, ken cadagiti cucua, ken cadagiti animal, sabali laeng ti daton ti sibubulos a nakem a maipaay iti balay ti Dios nga adda idiay Jerusalem.

⁵ Idi a casta timmacder dagiti pangpangoloen dagiti balbalay dagiti amma ti Juda, ken ti Benjamin, ken dagiti papadi, ken dagiti Levitas, amin met laeng a ti espirituda tinignay ti Dios tapno sumang-at a mangbangon ti balay ni Jehova nga adda idiay Jerusalem.

⁶ Ket amin dagiti adda idi iti aglicmut pinapigsada dagiti im-imada cadagiti al-alicamen a pirac, balitoc, sansanicua ken an-animal, ken banbanag a napateg, sabali laeng ti amin a naidaton iti sibubulos a nakem.

⁷ Casta met a ni ari Ciro inruarna dagiti al-alicamen ti balay ni Jehova, nga innala idi ni Nabucodonosor idiay Jerusalem, ket incabilna idi iti balay dagiti didiosna;

⁸ Dagidiay met laeng ni Ciro nga ari ti Persia innalana iti pannacaaramat ti ima ni Mitridates a tesorero, ket binilangna ida ken Sesbassar, a pangolo ti Juda.

⁹ Ket daytoy ti bilang dagidiay: tallopulo a patilambo a balitoc, sangaribu a patilambo a pirac, duapulo ket siam nga immoco.

¹⁰ Tallopulo a malucong a balitoc, malmalucong a pirac ti maicadua a kita uppat a gasutda ket sangapulo ket dagiti sabsabali nga al-alicamen sangaribuda.

¹¹ Amin dagiti al-alicamen a balitoc ken pirac lima ribuda ket uppat a gasut. Amin dagitoy innala ni Sesbassar, idi dagiti naggapu iti pannacacayaw naisang-atda a naigapu iti Babilonia agingga iti Jerusalem.