Eclesiastes 9 - Ti Biblia (1973)

Mataydanto amin a padapada. Maigunamgunam ti kinaragsac ken kinagaget. Dagiti pagduaduaan ti biag. Ti kinamangnibinibi ti sirib.

¹ Ta amin dagitoy impapusoc, tapno sukimatec amin daytoy: a ti nalinteg, ken ti masirib, ken dagiti ar-aramidda, addada iti ima ti Dios; no isu macapaayat wenno macapagura, isu ti saan nga ammo ti tao; isu-amin adda iti sangoananda.

² Dagiti amin a banbanag umayda a padapada cadagiti isu-amin: adda maysa a mapasamac iti nalinteg ken iti nadangcoc; iti naimbag ken iti nadalus ken iti narugit; iti agidaton ken iti saan nga agidaton; cas ti naimbag, casta ti managbasol; ken ti agsapata, cas ti agbuteng iti sapata.

³ Daytoy isu ti maysa a dakes iti amin a maaramid iti baba ti init, nga adda maysa a banag a mapasamac iti isu-amin; wen, casta met ti puso dagiti annac dagiti tattao napno iti dakes, ket kinamauyong ti adda iti pusoda bayat ti panagbiagda, ket calpasanna mapanda cadagiti natayen.

⁴ Maipaay iti daydiay makipagnaed iti amin a sibibiag adda inanama; ta ti maysa a nabiag nga aso naimimbag ngem iti maysa a natay a leon.

⁵ Ta dagiti sibibiag ammoda a mataydanto: ngem dagiti natay dida ammo ti aniaman, isuda awanandan iti gunguna; ta ti pacalaglagipan cadacuada nalipatanen.

⁶ Castamet ti ayatda, ti gurada ken ti apalda, napucawen iti nabayag; isuda awanandan iti pannacabiang nga agnanayon iti aniaman a naaramid iti baba ti init.

⁷ Inca iti dalanmo, canem a sirarag-o ti tinapaymo, ket inumem ti aracmo a buyugen ti puso a naragsac; ta, ti Dios inawatnan dagiti ar-aramidmo.

⁸ Napudaw coma a cancanayon dagita cawesmo: ket dica palubosan nga agcurang ti lana ta olom.

⁹ Makipagnaedca a sirarag-o iti asawa a babai nga ayatem cadagiti amin nga al-aldaw ti biagmo a kinaubbaw, nga isu intedna kenca iti baba ti init, cadagiti amin nga al-aldawmo a kinaubbaw: ta dayta isu ti apagmo iti biag, ken iti bannog a pagbannogam iti baba ti init.

¹⁰ Ti aniaman a masaracan ta imam nga aramiden, isu ti aramidem iti cabaelam; ta awan ti aramid, wenno, wenno gacat, wenno pannacaammo, wenno sirib, idiay Tanem, a papanam.

¹¹ Nagbawingac, ket nakitac iti baba ti init, a ti lumba saan nga agpaay cadagiti nasiglat, wenno ti bacal cadagiti napigsa, uray pay ti tinapay iti masirib, uray pay dagiti kinabacnang cadagiti tattao a mannacaawat, uray pay ti parabur cadagiti tattao a nalaing; ngem ti pannawen ken gasat mapasamacda cadacuada amin.

¹² Ta ti tao dina met ammo ti pannawenna: cas cadagiti ican a matiliwto iti mangdadael nga iket, ken cas cadagiti tumatayab a nakemmeg iti silo, casta met laeng ti pannacasilo dagiti annac dagiti tattao iti dakes a pannawen, intono mapasamac a pettat cadacuada.

¹³ Nakitac met ti sirib iti baba ti init iti castoy a wagas, ket isu ti impapanco a dackel.

¹⁴ Adda idi maysa a bassit nga ili, ken bassit a bilang dagiti tattao idiay unegna; ket immay ti dackel nga ari a maibusor kencuana, ket isu ti linacubna, ket nangbangon cadagiti dadackel a sarikedked a maibusor kencuana.

¹⁵ Nasaracan idiay ti maysa a napanglaw a masirib a tao, ket isu gapu iti siribna inispalna ti ili; nupay casta awan ti tao a nacalagip iti daydi met laeng a napanglaw.

¹⁶ Idin kinunac, Ti sirib naimimbag ngem iti pigsa: nupay casta ti sirib ti napanglaw naumsi, ket saan a maipangag dagiti sasaona.

¹⁷ Dagiti sasao ti masirib a mangngegan iti natalna naim-imbagda ngem iti natbag a timec ti agturay iti tengnga dagiti maag.

¹⁸ Ti sirib naimimbag ngem cadagiti ig-igam ti gubat; ngem ti maysa a managbasol dadaelenna ti adu nga imbag.