Eclesiastes 7 - Ti Biblia (1973)

Maigunamgunam ti kinaparbeng kinamatalec, kinaanus, ken sirib. Pannacaaramat ti sirib, ken kinamaag ti kinadangcoc.

¹ Ti naimbag a nagan napatpateg ngem iti nangina a lana; ket ti aldaw ti patay, ngem iti aldaw ti pannacayanac.

² Naimimbag ti mapan iti balay a pagdudung-awan ngem iti mapan iti balay a pagrarambacan: ta dayta isu ti tungpal dagiti amin a tattao; ket ti sibibiag isu ti ipapusonanto.

³ Ti ladingit naimimbag ngem iti catawa; ta gapu iti liday ti rupa mapasayaat ti puso.

⁴ Ti puso ti masirib adda idiay balay a pagdung-awan; ngem ti puso dagiti maag adda idiay balay ti ragsac.

⁵ Naimimbag a denggen ti panangtubngar ti masirib, ngem iti panagdengngeg ti maysa a tao iti daniw dagiti maag.

⁶ Ta cas iti panagragutoc dagiti sisiit iti siroc ti banga, casta ti catawa ti maag: daytoy kinaubbaw met.

⁷ Pudno a ti panaggamsaw pagmaagenna ti masirib a tao; ket ti pannocsoc dadaelenna ti panagawat.

⁸ Naimimbag ti pannacalpas ti maysa a banag ngem iti rugina; ket ti naanus iti espiritu naimimbag ngem iti napusong iti espiritu.

⁹ Saan coma a nadarasudos ti espiritum nga agpungtot; ta ti pungtot agsaad iti barucong dagiti maag.

¹⁰ Dica cunaen, Ania ti gapuna a dagiti immuna nga aldaw naimimbagda ngem cadagitoy? ta sica dica tontonen a sisisirib ti maipapan itoy.

¹¹ Ti sirib naimbag a cas iti maysa a tawid; wen, isu nasudi a maipaay cadagidiay a macakita iti init.

¹² Ta ti sirib isu ti maysa a salacnib, a cas met laeng iti cuarta isu ti maysa a salacnib; ngem ti kinamangnibinibi ti pannacaammo isu, a ti sirib igagana ti biag ti agicut kencuana.

¹³ Otobem ti aramid ti Dios: ta asino ti macapalinteg iti kinillo ti Dios?

¹⁴ Iti aldaw ti kinarang-ay agrag-oca, ket iti aldaw ti rigat otobem; wen, ti Dios inaramidna nga agdenna ti maysa ken maysa, iti panggep a ti tao dina maawatan ti aniaman nga addanto iti calpasanna.

¹⁵ Amin daytoy nakitac cadagiti al-aldawco a kinaubbaw: adda nalinteg a tao a mapucaw iti kinalintegna, ket adda nadangcoc a tao a paatiddugenna ti biagna iti panagaramidna iti dakes.

¹⁶ Dica aglabes nga aglinteg; dica met agsirib nga aglablabes: apay a dadaelem coma ta bagim?

¹⁷ Dica agdangcoc a napalalo, dica met agmaag: apay a matayca coma iti sacbay ti tiempom?

¹⁸ Naimbag a petpetam coma daytoy; wen, casta met nga iti daytoy dica ilisi ta imam: ta ti agbuteng iti Dios macalisi cadacuada amin.

¹⁹ Ti sirib isu ti pigsa iti masirib a tao nga ad-adda ngem cadagiti sangapulo nga agturturay nga adda iti ili.

²⁰ Pudno unay nga awan ti nalinteg a tao iti rabaw ti daga, nga agaramid iti naimbag, ket saan nga agbasol.

²¹ Casta met a dica icancano dagiti amin a sasao a naisao, di la ket ta mangngegmo nga ilunodnaca ti adipenmo;

²² Ta masansan met a ta pusom met laeng ammona a sica met laeng ilunodmo met dagiti sabali.

²³ Amin daytoy sinuutco babaen iti sirib: kinunac, Nasiribacto; ngem adayu idi caniac.

²⁴ Daydiay nga adda, adayu ken napalaus a naguneg; asino ti macatonton kencuana?

²⁵ Nagbawingac, ket ti pusoc naisaad a mangammo ken mangsukimat, ken mangsapul iti sirib ken ti gapu dagiti banbanag, ken mangammo a ti kinadangcoc isu ti kinamaag, ken ti kinamaag isu ti kinamauyong.

²⁶ Ket matontonac pay a napapait ngem ni patay ti babai a ti pusona isu ti silsilo ken bateng ken dagiti im-imana isuda dagiti pangbalud: ti siasinoman a mangayayo iti Dios macalisinto kencuana; ngem ti managbasol matiliwto gapu kencuana.

²⁷ Adtoy, daytoy nasaracac, cuna ti Mangascasaba, idinto nga icabilco ti maysa a banag iti sabali, tapno tontonec ti pagpaayanda;

²⁸ Ti sapulen pay ti cararuac, ngem diac nasaracan: maysa a lalaki cadagiti sangaribu nasaracac; ngem maysa a babai cadagidiay amin diac nasaracan.

²⁹ Adtoy, daytoy laeng ti nasaracac: a ti Dios inaramidna dagiti tattao a nalinteg; ngem isuda nasaracanda dagiti adu a palpaltuad.