Eclesiastes 6 - Ti Biblia (1973)

Dagiti kinabacnang, ti familia, ken annac, ken kinalacay ubbawda no dida mabuyogan iti kinaimbag. Dadduma pay a kinaubbaw.

¹ Adda maysa a dakes a nakitac iti baba ti init, ket nadagsen cadagiti tattao:

² Maysa a tao nga iniccan ti Dios cadagiti kinabacnang, sanicua, ken dayaw, iti casta saan nga agcurang ti aniaman a maipaay iti cararuana iti amin a calicagumna, nupay casta isu saan nga iniccan ti Dios ti pannacabalin a mangan kencuana, no di ket canen ti maysa a gangannaet; daytoy ti kinaubbaw, ket maysa a nadagsen a sakit.

³ No ti maysa a tao agputot cadagiti sangagasut nga annac, ket agbiag cadagiti adu a tawtawen, iti casta a dagiti al-aldaw dagiti tawenna aduda, ngem ti cararuana saan a mapno iti imbag, ket maysa pay isu saan a maiponpon; cunac, a ti maysa nga alis naimimbag ngem isu:

⁴ Ta umay iti kinaubbaw, ket mapan iti sipnget, ket ti naganna maabbongan iti sipnget;

⁵ Maysa pay dina nakita ti init ket isu ti dina naammoan; daytoy ad-adda ti inanana ngem iti daydiay:

⁶ Wen, nupay isu agbiag iti sangaribu a tawen a naibilang a namindua, ket saan nga agrag-o iti aniaman nga imbag, dida aya mapan amin iti maymaysa a yan?

⁷ Amin a pagbannogan ti tao isu ti maipaay iti ngiwatna, ket nupay casta ti gartemna saan a mapno.

⁸ Ta ania ti gundaway nga adadda iti masirib ngem iti maag? wenno ania ti adda iti napanglaw a tao, nga ammona ti pannagnana iti sangoanan dagiti sibibiag?

⁹ Nasaysayaat ti pannacakita cadagiti mata ngem iti panagcallautang ti tarigagay: daytoy kinaubbaw met ken maysa a panagagawa iti angin.

¹⁰ Ti aniaman nga adda idi, ti naganna naiteden a nabayag; ket maammoan no ania ti tao; dina met mabalin ti makisusic iti adadda pannacabalinna ngem isu.

¹¹ Idinto nga adda adu a banbanag a mangpawadwad iti kinaubbaw, ania ti pagservianna iti tao?

¹² Ta asino ti macaammo no ania ti naimbag a maipaay iti tao iti biagna, amin dagiti al-aldaw ti ubbaw a biagna isuda nga ibusenna a cas aniniwan? ta asino ti macaibaga iti maysa a tao no anianto iti calpasanna iti baba ti init?