Eclesiastes 5 - Ti Biblia (1973)

Maigunamgunam ti panagdayaw. Ti ulbod ken pudno a pannacaaramat dagiti kinabacnang. Kinaubbaw dagiti naimbag a banbanag a saan a malac-aman.

¹ Aluadam ta sacam no mapanca iti balay ti Dios, ta ti yaadani a panagdengngeg naimimbag ngem iti panangipaay ti sacrificio dagiti maag: ta dida ammo nga agaramidda iti dakes.

² Dica pagdarasudusen ti ngiwatmo, ket dica palubosan nga agdaras ta pusom nga agsao iti aniaman iti sangoanan ti Dios; ta ti Dios adda sadi langit, ket sica iti rabaw ti daga: gapuna a manmano coma dagiti saom.

³ Ta ti maysa a tagtagainep umay a buyugen ti caadu dagiti ar-aramid, ket ti timec ti maag buyugen ti caadu dagiti sasao.

⁴ No mangicarica iti maysa a cari iti Dios, dica bayagen a tungpalen; ta isu saan a maayayo cadagiti maag: tungpalem ti icarim.

⁵ Naimimbag a dica coma mangicari, ngem iti mangicarica ket dica tungpalen.

⁶ Dica palubusan a ta ngiwatmo pagbasolenna ta lasagmo; dica met agsao iti sangoanan ti angel, a cunaem maysa nga ibibiddut: ta apay nga agpungtot coma ti Dios gapu iti timecmo, ken dadaelenna ti aramid dagita imam?

⁷ Ta iti kinaadu dagiti darepdep adda dagiti kinaubbaw, ken cadagiti adu a sasao: ngem agbutengca iti Dios.

⁸ No makitam ti pannacaparigat ti napanglaw, ken ti maipapilit a pannacaiccat ti kinajusticia ken kinalinteg iti maysa a provincia, dica masdaaw iti maaramid; ta maysa a nangatngato ngem iti ngato ti mangicancano; ket adda dagiti nangatngato ngem dagidiay.

⁹ Maysa pay ti gunguna ti daga maipaay iti isu-amin: ti ari met laeng maservian gapu cadagiti aw-away.

¹⁰ Ti agayat iti pirac dinto mapnec iti pirac: wenno ti agayat iti kinawadwad, agraman yaaduna: daytoy kinaubbaw met.

¹¹ No umadu dagiti sanicua umadu dagiti mangan cadacuada; ket ania ti gundaway ti akincucua kencuana, no di-laeng ti panangkitana cadagidiay cadagiti matana.

¹² Ti turog ti agbanbannog a tao nasam-it, uray no mangan iti bassit wenno adu; ngem ti pannacabsog ti bacnang dinanto palubosan a maturog.

¹³ Adda maysa a nabantut a dakes a nakitac iti baba ti init, nga isu dagiti kinabacnang nga indulin ti agtagicua a pacadadaelanna met laeng:

¹⁴ Ket dagidiay a kinabacnang mapucawda gapu iti dakes a mapasamac; ket no nagputot iti maysa nga anac a lalaki, awan iti aniaman iti imana.

¹⁵ Cas iti iruruarna iti tian ni inana, lamolamonto a mapan manen a cas iti iyaayna idi, ket awanto ti maalana iti nagbannoganna a maiggamanna.

¹⁶ Ket daytoy met isu ti maysa a nabantut a dakes, a cadagiti amin a casasaad cas iti yaayna idi, casta ti ipapannanto: ket ania ti magungunana ti agbannog gapu iti angin?

¹⁷ Amin met dagiti aldawna isu manganto idiay sipnget, ket isu maparigat iti nacaro, ken addaan sakit ken pungtot.

¹⁸ Adtoy, ti nakitac a naimbag ken nasayaat isu ti pannangan ken panaginum, ken panagrag-o iti kinaimbag ti nagbannoganna, a nagbannoganna iti baba ti init, cadagiti amin nga al-aldaw ti biagna nga inted kencuana ti Dios: ta daytoy isu ti apagna.

¹⁹ Tunggal tao met nga iniccan ti Dios cadagiti kinabacnang ken cucua, ket intedna kencuana ti pannacabalin a mangan cadagidiay ken umawat iti apagna, ken agrag-o iti pagbannoganna, daytoy ti sagut ti Dios.

²⁰ Ta dinanto unay malagipen dagiti al-aldaw ti biagna; agsipud ta isu supapacan ti Dios babaen ti panagrag-o ti pusona.