Eclesiastes 4 - Ti Biblia (1973)

Dagiti kinadakes dagiti pammarigat, di pannacapnec, panagwaywayas, ken nasubeg nga agtuturay.

¹ Idin nagbawingac ket nakitac amin a pammarigat a maaramid iti baba ti init; ket adtoy, dagiti lulua dagiti naparigat, ket isuda awananda iti mangliwliwa; ket iti biang dagiti mangparparigat cadacuada adda idi pannacabalin; ngem awan ti mangliwliwa cadacuada.

² Gapuna a dinaydayawco dagiti natay a natayen idi nabayag a pannawen a nangnangrona ngem cadagiti sibibiag nga agbibiag pay laeng;

³ Wen, naimimbag ngem isuda a dua isu daydiay dipay timmaud a saan pay a nacakita iti dakes a maararamid iti baba ti init.

⁴ Idin nakitac amin nga aramid ken tunggal napnoan-laing nga aramid, a gapu itoy ti tao inaguman ti caarrubana. Daytoy met isu ti kinaubbaw ken maysa a panagagawa iti angin.

⁵ Ti maag pagacubenna dagiti im-imana ket ibusenna ti lasagna met laeng.

⁶ Naimimbag ti maysa a petpet a napno a buyugen ti kinatalna, ngem ti dua a petpet a napno a buyogen ti bannog ken panagagawa iti angin.

⁷ Idin nagbawingac ket kinitac ti kinaubbaw iti baba ti init.

⁸ Adda maysa nga agwaywayas, ket isu awan ti caduana; wen, isu awanan anac a lalaki, wenno cabsat a lalaki; awan met ti panagsardeng ti amin a panagbannogna, uray dagiti matana dida mapnec cadagiti kinabacnang. Asino ti pagpaayanna ngarud, cunana, ti pagbannogac, ken panangilacsidco itoy cararuac iti naimbag? Daytoy met ti kinaubbaw, wen, isu ti nacaro a panagrigat.

⁹ Ti dua naimimbagda ngem iti maysa, agsipud ta isuda addaanda iti naimbag a gunguna gapu iti bannogda.

¹⁰ Ta no matuangda, ti maysa bangonennanto ti caduana; ngem asi pay daydiay nga agwaywayas intono matuang, ket awanan iti sabali a mangbangon kencuana.

¹¹ Maysa pay, no dagiti dua agcaiddada agpinnudotda ngarud; ngem casano ti pannacapapudot ti maymaysa?

¹² Ket no ti maysa a tao agballigi a maibusor iti agwaywayas, dagiti dua dumaerdanto kencuana; ket ti tinallo a lubid saan a madaras a magsat.

¹³ Naimimbag ti maysa a napanglaw ken masirib nga agtutubo ngem iti lacay ken maag nga ari, a dina maawatanen ti patigmaan.

¹⁴ Ta rimmuar iti pagbaludan tapno agari; wen, idiay pagarianna met laeng nayanac a napanglaw.

¹⁵ Nakitac amin nga agbibiag a magna iti baba ti init, a nakicuyogda iti daydiay agtutubo, ti maicadua, a sumucat iti saadna.

¹⁶ Awan idi ti gibus ti amin nga umili, amin met laeng cadagidiay nagturayanna; nupay casta dagiti sumaganad didanto agrag-o kencuana. Pudno a daytoy kinaubbaw met ken panagagawa iti angin.