Eclesiastes 3 - Ti Biblia (1973)

Amin a banbanag adda tiempoda, ket naimbagda iti tiempoda a nakedngan. Ti kinadangcoc ti tao, ken ti pannacayaspingna cadagiti an-animal.

¹ Maipaay iti tunggal banag adda nakedngan a tiempo, ket maysa a tiempo maipaay iti tunggal panggep iti baba ti langit:

² Pannawen ti pannacayanac, ken pannawen ti pannacatay, pannawen ti panagmula, ken pannawen ti panagparot iti naimula;

³ Pannawen ti panangpapatay, ken pannawen ti panangagas; pannawen ti panangrugpo, ken pannawen ti panangbangon;

⁴ Pannawen ti panagsangit, ken pannawen ti panagcatawa; pannawen ti panagdung-aw, ken pannawen ti panagsala;

⁵ Pannawen ti panagibelleng cadagiti batbato, ket pannawen ti panagurnong cadagiti batbato; pannawen ti panagaracup ket pannawen ti panangmedmed iti panagaracup;

⁶ Pannawen ti panagbiroc, ket pannawen ti panangpucaw; pannawen ti panangsalimetmet, ket pannawen ti panagibelleng;

⁷ Pannawen ti panagpigis, ken pannawen ti panagdait; pannawen ti panagulimec, ken pannawen ti panagsao;

⁸ Pannawen ti panagayat, ken pannawen ti panaggura; pannawen a maipaay iti gubat, ken pannawen a maipaay iti talna.

⁹ Ania ti magunguna iti agaramid iti daydiay a nagbannoganna?

¹⁰ Nakitac ti panagbannog nga inted ti Dios cadagiti annac dagiti tattao tapno agwatwatda kencuana.

¹¹ Isu inaramidna ti tunggal banag a naimnas iti pannawenna: casta met nga isu insaadna ti kinaagnanayon idiay pusoda, nupay casta ti tao, dina matontonan ti aramid nga inaramid ti Dios nanipud idi punganay agingga iti panungpalan.

¹² Ammoc nga awan ti aniaman a naimimbag a maipaay cadacuada, ngem ti panagrag-o ken iti panagaramidda ti naimbag iti bayat ti panagbiagda.

¹³ Ket casta met a tunggal tao mangan coma ken uminum, ken agrag-o iti kinaimbag iti amin a pagbannoganna, isu a sagut ti Dios.

¹⁴ Ammoc a ti aniaman nga aramiden ti Dios, addanto iti agnanayon: awan ti aniaman a mainayon kencuana, wenno aniaman a makissay kencuana; ket ti Dios inaramidna tapno agbuteng coma dagiti tattao iti sangoananna.

¹⁵ Ti adda addan idi ugma: ket ti addanto nabayagen nga adda: ket paaddaen manen ti Dios ti naglabasen.

¹⁶ Ket maysa pay nakitac iti baba ti init, iti disso a pangocoman adda met kinadangcoc sadiay; ket iti ayan ti kinalinteg, adda sadiay ti kinadangkes.

¹⁷ Kinunac itoy pusoc, Ocomento ti Dios ti nalinteg ken ti nadangcoc; ta adda pannawen sadiay a maipaay iti tunggal panggep ken maipaay iti tunggal aramid.

¹⁸ Kinunac itoy pusoc, dagitoy, maipuon cadagiti annac dagiti tattao, tapno suuten coma ida ti Dios, ken tapno makitada coma nga isuda met laeng cacasda la cadagiti animal.

¹⁹ Ta ti mapasamac cadagiti annac dagiti tattao mapasamac cadagiti animal; maymaysa met laeng a banag ti mapasamac cadacuada: cas ti pannacatay ti maysa, casta ti pannacatay ti sabali; wen, addaanda amin iti maymaysa nga angsen, ket ti tao awanan iti kinasaysayaat ngem cadagiti animal: ta isuda amin kinaubbaw.

²⁰ Isuda amin mapanda iti maymaysa a disso; isuda amin aggapuda iti tapoc, ket isuda amin agsublida manen ti tapoc.

²¹ Asino ti macaammo iti espiritu ti tao, no agpangato, ken ti espiritu ti animal no agpababa iti daga?

²² Gapuna a nakitac nga awan ti aniaman a naimimbag ngem iti panagrag-o coma ti maysa a tao cadagiti gapuananna; ta dayta ti apagna: ta asino ti mangisublinto kencuana tapno makitana no ania ti addanto iti calpasanna?