Eclesiastes 11 - Ti Biblia (1973)

Ti kinaayat ken kinagaget maaramidda coma a siinanama.

¹ Ipalladawmo ta tinapaymo iti rabaw dagiti dandanum; ta isu masaracamto iti calpasan dagiti adu nga al-aldaw.

² Itedmo ti sangcaapag cadagiti pito, wen, uray cadagiti walo; ta dica ammo no anianto ti adda a dakes iti rabaw ti daga.

³ No dagiti ul-ulep mapnoda cadagiti tudo, agibucbocda iti rabaw ti daga; no matuang ti cayo nga agpaabagatan, wenno agpaamianan, idiay disso a pacatuangan ti cayo, idiayto ti pagyananna.

⁴ Ti mangpaliiw iti angin dinto agmula; ket ti mangicancano cadagiti ul-ulep dinto agani.

⁵ Cas ti dica pannacaammo no ania ti dalan ti angin, wenno casano ti idadackel dagiti tultulang iti tian ti masicug; casta met laeng ti dica pannacaammo iti aramid ti Dios a mangaramid cadagiti isu-amin.

⁶ Iti bigat imulam ti bin-im, ket iti rumabii dica pagsardengen ta imam; ta dica ammo nga agrang-ayto, no daytoy wenno daydiay, wenno isuda nga agpadpada naimbagdanto.

⁷ Pudno a nasam-it ti lawag, ken banag a macaay-ayo a maipaay cadagiti mata a pangkita iti init.

⁸ Wen, no maysa a tao agbiag cadagiti adu a tawen, nga agrag-o coma cadacuada amin; ngem lagipenna coma dagiti al-aldaw ti sipnget, ta adudanto. Amin a sumungad kinaubbaw.

⁹ Agrag-oca, O agtutubo a lalaki, iti kinaagtutubom, ket paragsakennaca coma ta pusom cadagiti aldaw ti kinaagtutubom, ket magnaca cadagiti daldalan ta pusom, ken iti imatang dagita matam; ngem ammoem a gapu amin cadagitoy a banbanag iyegnacanto ti Dios iti pannacaocom.

¹⁰ Gapuna iccatem ti liday ita pusom, ket iccatem ti kinadakes ita lasagmo; ta ti kinaagtutubo ken panagbannawag ti biag ubbawda.