Eclesiastes 10 - Ti Biblia (1973)

Nadumaduma a pagalagadan.

¹ Dagiti natay a ngilngilaw pataudenna iti dakes nga angot iti lana ti agaramid iti bangbanglo; casta ti bassit a kinamaag nadagdagsen ngem ti sirib ken dayaw.

² Ti puso ti maysa a masirib adda iti macanawanna; ngem ti puso ti maysa a maag adda iti macatigidna.

³ Wen, casta met, no magna ti maag iti dalan, ti panagawatna nacurang, ket cunana iti tunggal maysa nga isu ti maysa a maag.

⁴ No ti espiritu ti agturay bumangon a bumusor kenca, dica panawan dayta yanmo; ta ti kinapakumbaba pasardengenna ti dackel a pannacaranggas.

⁵ Adda maysa a dakes a nakitac iti baba ti init, cas maysa a biddut a nagtaud iti agturay:

⁶ Ti kinamaag naisaad iti dackel a caicarian, ket ti bacnang agtugaw iti nanomo a disso.

⁷ Nakitac dagiti ad-adipen a nacacabayoda, ken dagiti principe nga agpagpagna a cas ad-adipen iti rabaw ti daga.

⁸ Ti mangcali iti abut matnagto kencuana; ket siasinoman a manggutbaw iti maysa a bacud, cagatento ti uleg.

⁹ Siasinoman a mangticap cadagiti batbato madunorto cadacuada; ket ti mangpisi iti cayo agpeggad kencuana.

¹⁰ No ti landoc mauped, ket awan ti mangasa ti tademna, maipapilit a maaramat iti ad-adda a pigsa: ngem ti sirib isu ti macagunguna a mangiturong.

¹¹ No ti uleg cumagat iti sacbay ti pannacapaamona, no casta saan a magundawayan ti mangpaamo.

¹² Dagiti balicas ti ngiwat ti maysa a masirib naparaburda; ngem dagiti bibig ti maysa a maag alununendanto ti bagina met laeng.

¹³ Ti punganay dagiti balicas ti ngiwatna kinamaag; ken ti gibus ti panagsaona isu ti macaranggas a kinamauyong.

¹⁴ Ti maag met paaduenna dagiti sasao: nupay casta saan nga ammo ti tao no anianto ti adda; ken ti addanto iti calpasanna, siasino ti macaibaga kencuana?

¹⁵ Ti bannog dagiti maag utuyanna ti tunggal maysa cadacuada; ta isu dina ammo no casano ti panagudongna.

¹⁶ Asica pay, O daga, no ti arim maysa nga ubing, ket dagiti pangpangoloen manganda iti bigat!

¹⁷ Nagasatca, O daga, no ti arim lalaki nga anac dagiti natacneng, ket dagiti pangpangoloen manganda iti maiparbeng a tiempo, gapu iti pigsa, ket saan a gapu iti panagbartec!

¹⁸ Gapu iti kinaliway agluyucan ti atep; ket gapu iti kinasadut dagiti im-ima agtedted ti balay.

¹⁹ Maysa a rambac maaramid a maipaay iti catawa, ket ti arac paragsakenna ti biag; ket ti cuarta sungbatanna dagiti amin a banbanag.

²⁰ Dica pagsasaoan ti ari, saan, uray ita panunotmo; ket dica umsien ita siledmo ti bacnang: ta maysa a tumatayab dagiti langlangit ipannanto ti timec, ket dagiti addaan paypayac ibagadanto ti panggep.