Dungdung-aw 5 - Ti Biblia (1973)

Ti panagsagaba ti pannacacayaw masangitan.

¹ Lagipem, O Jehova, no ania ti dimteng cadacami: adtoy, ket kitaem ti pacaumsianmi.

² Ti tawidmi mayawat cadagiti gangannaet, dagiti balbalaymi cadagiti sangsangaili.

³ Ulilacami ket awan ti ammami; dagiti innami casda la balbalo.

⁴ Ininummi ti danummi babaen ti pirac; ti cayomi mailaco cadacami.

⁵ Dagiti mangparigat cadacami addada cadagiti tengngedmi: nabannogcami, ket awan ti inanami.

⁶ Intulocmi ti imami cadagiti Egipcios, ken cadagiti Asirios, tapno mapneccami iti tinapay.

⁷ Dagiti ammami nagbasolda, ket awandan; ket inawitmi dagiti kinadakesda.

⁸ Dagiti ad-adipen iturayandacami: awan ti asinoman a mangruc-at cadacami iti imada.

⁹ Gun-odenmi ti tinapaymi babaen ti peggad dagiti biagmi, a gapu ti campilan iti let-ang.

¹⁰ Ti cudilmi nangisit a cas horno, maipuon iti sumsumged a pudot ti bisin.

¹¹ Pinilitda dagiti babbai idiay Sion, dagiti babbalasang cadagiti il-ili ti Juda.

¹² Dagiti piprincipe naibitinda cadagiti imada. Dagiti rupa dagiti panglacayen saanda; a nadaydayaw.

¹³ Dagiti agtutubo a lallaki baclayenda ti gilingan; ket dagiti ububbing maitibcolda iti baba ti pagsungrod.

¹⁴ Dagiti panglacayen binay-bayanda ti ruangan, dagiti agtutubo iti panagtocarda.

¹⁵ Ti ragsac ti pusomi naawan: ti panagsalami nagbalin a ladingit.

¹⁶ Ti balangat natnag nanipud iti olomi: asicami pay! ta nagbasolcami.

¹⁷ Gapu itoy ti pusomi mapacsoyan; gapu cadagitoy a banbanag dagiti matami nacudrepda;

¹⁸ Maipuon iti bantay Sion isu a langalang: dagiti lobo magnada iti rabawna.

¹⁹ Sica, O Jehova, mataginayonca; ti tronom agtalinaed manipud caputotan agingga iti caputotan.

²⁰ Apay lipatannacami iti agnanayon, ken baybay-annacami iti castoy a cabayag?

²¹ Isublinacami kenca, O Jehova, ket maipulangcamto; pabaroem dagiti al-aldawmi cas idi ugma.

²² Ngem sica naglictadannacami a naananay; napungtotca unay a maibusor cadacami.