Dungdung-aw 4 - Ti Biblia (1973)

Ti pannacalacub ti Sion.

¹ Anian ti panagbalin ti balitoc a nacudrep! ken anian ti pannacabalbaliw ti casudian a balitoc! Dagiti batbato ti santuario maibucbucda iti oloanan ti tunggal lansangan.

² Dagiti napateg nga annac ti Sion, maipadpad iti nasudi a balitoc, anian ti pannacaipategda cas cadagiti gorgorita a damili, ti aramid dagiti im-ima ti agdamdamili!

³ Uray pay dagiti aso ti bakir iruarda ti barucongda, pasusoenda dagiti annacda: ti anac a babai ti ilic nagbalin a nadawel, a cas cadagiti avestruz iti let-ang.

⁴ Ti dila ti agsuso nga ubing dumket iti ngadasna gapu iti waw: dagiti annac nga ububbing dumawatda iti tinapay, ket awan ti tao a mangpispisi a maipaay cadacuada.

⁵ Dagidiay nangnangan iti naimas addada a walangwalang cadagiti lanlansangan. Dagidiay napadackel iti escarlata aracupenda dagiti bonbonton ti pagibblengan.

⁶ Ta ti kinadakes ti anac a babai ti ilic dacdackel ngem ti basol ti Sodoma, a narbec iti maysa a canito, ket awan ti im-ima a kimmalbit kencuana.

⁷ Dagiti natan-ocna nadaldalusda idi ngem nieve, napudpudawda ngem gatas; nalablabagada idi iti bagi ngem cadagiti rubi, ti silengda casla ti zafiro.

⁸ Ngem itan ti langada nangisngisit ngem ti uging; saan ida a mabigbig cadagiti calcalsada: ti cudilda dumket cadagiti tultulangda; malaylay nga agbalin a cas maysa a bislac.

⁹ Dagidiay napapatay iti campilan nasaysayaatda ngem dagidiay napatay iti bisin; ta dagitoy cumapsutda, samayenna ida, gapu iti kinakirang dagiti bungbunga ti tanap.

¹⁰ Dagiti im-ima dagiti naasi a babbai linutoda dagiti annacda met laeng; isuda idi ti taraonda iti pannacarbec ti anac a babai ti ilic.

¹¹ Ni Jehova tinungpalna ti ungetna, imbucbucna ti nacaamamac a pungtotna; ket ginangtanna ti apuy idiay Sion, a nangalun-un cadagiti pamuonna.

¹² Dagiti ar-ari ti daga, castamet dagiti amin nga agnaed ditoy lubong, dida pinati, a ti cusuppiat ken ti cabusor sumrecda coma cadagiti ruangan ti Jerusalem.

¹³ Maipuon cadagiti basbasol dagiti mammadtona, ken cadagiti kinadakes dagiti papadina, a nangiparucpuc ti dara ti nalinteg iti nagtengngaanna.

¹⁴ Isuda agalla-allada cas cadagiti bulsec cadagiti calsada, natulawanda iti dara, nga iti casta dagiti tattao saanda a macalbit dagiti pagan-anayda.

¹⁵ Umadayucayo, impuccawda cadacuada, Narugit! umadayucayo, pumanawcayo, dicayo calbiten! Idi pimmanawda ken nagalla-allada, dagiti tattao cadagiti nasnacion, kinunada, Isuda saandanton nga agdagus ditoy.

¹⁶ Ti pungtot ni Jehova winarawarana ida; saannanton ida nga icancano: saanda a dinayaw dagiti kinatao dagiti papadi, saanda incancano dagiti panglacayen.

¹⁷ Dagiti matami mapacapuyanda pay laeng iti panangimatang iti awan capapayanna a tulong: iti panagpadaanmi nacauraycami iti maysa a nacion a di macaisalacan.

¹⁸ Anupenda dagiti addangmi, iti casta dicami macapan cadagiti calsadami: ti tungpalmi asideg, dagiti al-aldawmi matungpalda; ta ti panungpalanmi dumtengen.

¹⁹ Dagiti mangcamat cadacami nasigsiglatda ngem dagiti aguila iti tangatang: inanupandacami iti rabaw dagiti banbantay, nagsanebda cadacami iti let-ang.

²⁰ Ti anges dagiti agongmi, ti pinulotan ni Jehova, natiliw cadagiti bitoda; isu a nagcunaanmi, iti baba ti linongna agbiagcamto cadagiti nasnacion.

²¹ Agragsac ken agrag-oca, O anac a babai ti Edom nga agnaed iti daga ti Uz: ti copa dumtengto met kenca; mabarteccanto, ket aglamolamocanto.

²² Ti dusa ti kinadangkesmo natungpalen, O anac a babai ti Sion; saannacanton nga ipan iti pannacacayaw: sarungcarannanto ti kinadakesmo, O anac a babai ti Edom; lucasannanto dagiti basbasolmo.