Dungdung-aw 3 - Ti Biblia (1973)

Ti inanama ti bang-ar gapu iti asi ti Dios.

¹ Siac ti tao a nacakita iti ladingit babaen ti sarucod ti pungtotna.

² Indalannac ket pinapagnanac iti sipnget, a saan nga iti lawag.

³ Pudno unay nga iturongna ti imana a maibusor caniac a masansan iti agmalem.

⁴ Ti lasagco ken ti cudilco pinalacayna; binungbungtolna dagiti tultulangco.

⁵ Imbangonna ti maibusor caniac, ket linacubnac iti kinapait ken panagpasical.

⁶ Pinagyannac cadagiti nasipnget a disso a cas cadagidiay nabayagen a natay.

⁷ Binacudnac iti aglicmut, a diac mabalin ti rumuar; pinadagsenna ti cawarco.

⁸ Wen, no agickisac, ket umawagac iti badang, isu serraanna ti cararagco.

⁹ Binacudna dagiti daldalanco iti tinagaan a bato; pinakillona dagiti dandanac.

¹⁰ Isu caniac ti cas maysa nga oso nga agdadaan, cas maysa a leon cadagiti nalemmeng a disso.

¹¹ Binawingna dagiti daldalanco, ket pinisangpisangnac; inaramidnac a walangwalang.

¹² Biniatna ti ba-ina, ket insaadnac a cas ginoan ti pana.

¹³ Pinastrecna dagiti pana ti tagubanna cadagitoy lomoc.

¹⁴ Nagbalinac a pacaumsian cadagiti amin nga ilic, ken daniwda iti agmalmalem.

¹⁵ Pinunnonac iti pait, inumanac iti ajenjo.

¹⁶ Binungtolna met dagiti ngipenco cadagiti bisil; inabbongannac iti dapu.

¹⁷ Ket inyadayum ti cararuac iti talna; nalipatac ti rang-ay.

¹⁸ Ket kinunac, Ti pigsac napucaw, ken ti namnamac ken Jehova.

¹⁹ Lagipem ti leddaangco ken ti panagsagabac, ti ajenjo ken ti apro.

²⁰ Ti cararuac laglagipenna pay laeng ida, ket agrucub iti unegco.

²¹ Daytoy ti panpanunutec; gapuna nga adda inanamac.

²² Isu ti kinamanangngaasi ni Jehova a saantay a maibus, ta dagiti caasina saan nga aggibus.

²³ Mapabaroda a binigat; dackel ti kinamatalecmo.

²⁴ Ni Jehova ti bingayco, cuna ti cararuac; gapuna a manginanamaacto kencuana.

²⁵ Ni Jehova naimbag cadagiti aguray kencuana, iti cararua nga agsapul kencuana.

²⁶ Naimbag a ti maysa a tao manginanama coma ken aguray a siuulimec iti panangisalacan ni Jehova.

²⁷ Naimbag iti tao nga awitenna ti sangol iti kinaagtutubona.

²⁸ Isu agtugaw coma nga agpacni a siuulimec, ta Isu impabaclayna kencuana.

²⁹ Isu icabilna coma ti ngiwatna iti tapoc, iti casta adda coma inanama.

³⁰ Isu iparangna coma ti pingpingna iti mangcabil kencuana; naananay coma iti pannacaibabainna.

³¹ Ta ti Apo saanto a mangibelleng iti agnanayon.

³² Ta nupay pinaldaangna, addanto pay laeng asina a cas mayalubog iti caadu ti kinamanangngaasina.

³³ Ta isu dina pacaayayoan ti mamarigat, wenno mamaldaang cadagiti annac dagiti tao.

³⁴ Ken iti panangibaddec cadagiti amin a balud ti daga,

³⁵ Ken iti panangballicug iti calintegan ti tao, iti sangoanan ti Cangatoan,

³⁶ Ken iti panangkillo iti panggep ti tao, ti Apo saanna nga anamungan.

³⁷ Asino aya dayta nga agcuna, ket matungpal, idinto a saan nga ibilin ti Apo?

³⁸ Iti ngiwat ti Cangatoan saan aya a rumuar ti dakes ken naimbag?

³⁹ Apay ngarud nga agtanabutob ti tao a sibibiag, ti tao a madusa maipanggep cadagiti basbasolna?

⁴⁰ Sukimaten ken imatangantayo coma dagiti dalantayo, ket agsublitayo manen ken Jehova.

⁴¹ Itayagtayo coma ti pusotayo agraman dagiti im-imatayo iti Dios sadi langit.

⁴² Nagsalungasingcami ken nagsukircami; sica dinacami pinacawan.

⁴³ Inabbongam ti bagim iti pungtot ket kinamatnacami; nagpapatayca, saanca a nangngaasi.

⁴⁴ Inabbongam ti bagim iti ulep, iti casta awan ti macalasat a cararag.

⁴⁵ Sica pinagbalinnacami a rugit ken naibelleng iti nagtengngaan dagiti il-ili.

⁴⁶ Amin dagiti cabusormi nginangada unay ti ngiwatda a maibusor cadacami.

⁴⁷ Buteng ken ti dariwangwang dumtengda cadacami, pannacalangalang ken pannacarbec.

⁴⁸ Ti danum agayus iti matac gapu iti pannacarbec ti anac a babai ti ilic.

⁴⁹ Ti matac agibuyat, ket di-agsarday, awan ti panagressatna.

⁵⁰ Agingga iti itatannawag ni Jehova, ket umimatang manipud langit.

⁵¹ Ti matac tignayenna ti cararuac gapu cadagiti amin nga annac a babbai ti ilic.

⁵² Inanupdac a nalaing cas tumatayab, dagidiay cabusorco nga awan gapuna.

⁵³ Pinutedda ti biagco iti nasipnget a bito ket incabilda ti bato iti rabawco.

⁵⁴ Dagiti danum nagayusda iti rabaw ti oloc; kinunac, Madadaelacon.

⁵⁵ Siac inawagac dayta naganmo, O Jehova, nanipud iti adalem a bito.

⁵⁶ Impangagmo ti timecco; dica cadi ilemmeng dayta pagdengngegmo iti sainnecco, iti ickisco.

⁵⁷ Immasidegca idi aldaw nga immawagac kenca; sica kinunam, Saanca nga agbuteng.

⁵⁸ O Apo, sinusicmo dagiti banag toy cararuac; sinubbotmo ti biagco.

⁵⁹ O Jehova, nakitam ti danarco; ocomem coma ti panggepco.

⁶⁰ Nakitam dagiti amin a pammalesda ken dagiti sicatda a maibusor caniac.

⁶¹ Nangngegmo ti panangbabainda, O Jehova, ken amin dagiti gandatda a maibusor caniac,

⁶² Dagiti bibig dagidiay a timmacder a maibusor caniac, ken ti sicatda a maibusor caniac iti agmalmalem.

⁶³ Kitaem ti panagtugawda, ken ti panagtacderda; siac ti daniwda.

⁶⁴ Sica itedmonto cadacuada ti supapac, O Jehova, cas mainugot iti aramid dagiti im-imada.

⁶⁵ Iccamto ida ti kinatangken ti puso, ti lunodmo cadacuada.

⁶⁶ Camatemto ida iti pungtot, ket dadaelemto ida iti baba dagiti langlangit ni Jehova.