Dungdung-aw 2 - Ti Biblia (1973)

Dagiti leddaang ti Sion aggapuda ken Jehova.

¹ Anian ti panangabbong ti Apo iti anac a babai ti Sion iti maysa nga ulep iti pungtotna! Intappuacna manipud langit agingga iti daga ti kinaimnas ti Israel, ket saanna a nalagip ti pangibatayanna iti sacana iti aldaw ti pungtotna.

² Ti Apo inalimonna amin dagiti pagtaengan ni Jacob, ket dina kinaasian: rineb-bana babaen ti pungtotna dagiti sarikedked ti anac a babai ti Juda; impababana ida iti daga; tinulawanna ti pagarian ken dagiti piprincipena.

³ Pinutedna babaen ti nacaro a pungtot amin a sara ti Israel; inawidna ti macanawan nga imana manipud iti sangoanan ti cabusor: ket pinuuranna ni Jacob cas maysa a gumilgilayab nga apuy, a mangalunun iti aglicmut.

⁴ Biniatna ti ba-ina cas maysa a cabusor, nagtacder ket ti macanawan nga imana cas maysa a cumaniwas, ket pinatayna amin dagidiay macaay-ayo iti mata; iti tolda ti anac a babai ti Sion imbucbucna ti pungtotna a casla apuy.

⁵ Ti Apo nagbalin a cas cabusor, isu inalun-unna ti Israel; inalun-unna amin dagiti palaciona, rineb-bana dagiti sarikedkedna; ket pinaaduna ti dung-aw ken un-unnoy iti anac a babai ti Juda.

⁶ Ket rinabsutna ti tabernaculona a casla sapaw iti minuyongan; dinadaelna ti disso a paggimonganna; ni Jehova pinalipatanna idiay Sion ti gimong a nangayed ken ti aldaw a panaginana, ket inuyawna ti ari ken ti padi iti pannacaunget ti pungtotna.

⁷ Ni Jehova imbellengna ti altarna, ginurana ti santuariona; Inyawatna iti ima ti cabusor ti bacud dagiti palaciona; nagariwawada iti balay ni Jehova, cas iti aldaw ti gimong a nangayed.

⁸ Ni Jehova pinanggepna a dadaelen ti bacud ti anac a babai ti Sion; binennatna ti singdan, saanna nga inaccal ti imana iti panangdadael: ket pinagladingitna ti sarikedked ken bacud; isuda nagcapuyda nga agpada.

⁹ Dagiti ruanganna limmedda iti daga; dinadaelna ken binungtolna dagiti balunetna: ti arina ken dagiti piprincipena addada cadagiti nasnacion idiay awanen ti linteg; wen, dagiti mammadtona awan ti masaracanda a sirmata nga aggapu ken Jehova.

¹⁰ Dagiti panglacayen ti anac a babai ti Sion agtugawda iti daga, agulimecda; nangicabilda iti tapuc iti rabaw dagiti ol-oloda; nagbarikesda iti lupot a nakersang; dagiti babbalasang ti Jerusalem itamedda dagiti ol-oloda iti daga.

¹¹ Dagiti matac agcapuyda gapu cadagiti lulua, ti pusoc mariribuc; ti dalemco maibelleng iti daga, gapu iti pannacadadael ti anac a babai ti ilic, ta dagiti ububbing a babassit ken dagiti agsuso matalimudawda cadagiti lansangan ti ili.

¹² Cunaenda cadagiti innada, sadino ti yan ti bagas ken arac? Indinto a matalimudawda cas cadagiti nasugat cadagiti lansangan ti ili, idinto a ti cararuada maibuyat iti saclot dagiti innada.

¹³ Ania ti pangpanecnecconto kenca? ania ti pangipadpadacto kenca, O anac a babai ti Jerusalem? Ania ti pangidiligacto kenca, tapno mabalinca a liwliwaen, O anac a balasang ti Sion? Ta ti gutbawmo dackel cas iti baybay: asino ti macaagas kenca?

¹⁴ Dagiti mammadtom nacakitada iti maipaay kenca cadagiti ulbod ken maag a sirmata; ket saanda a linucasan ti kinadakesmo, tapno agbawing ti pannacacayawmo, ngem nacakitada iti maipaay kenca cadagiti ulbod a padpadto ken dagiti nacaigapuan ti pannacaibelleng.

¹⁵ Amin dagiti lumabas pagsipatenda dagiti imimada kenca; agsanamticda ken iwingiwingda dagiti ol-oloda iti anac a babai ti Jerusalem, a cunada, isu daytoy aya ti ili a ninagan dagiti tattao, Ti awan pagcuranganna a pintas, Ti ragsac ti sangalubongan?

¹⁶ Amin dagiti cabusormo inngangada unay ti ngiwatda a maibusor kenca; agsanamticda ken pagngaretngetenda dagiti ngipenda; cunada, isu inalimonmi; pudno unay daytoy ti aldaw a binirbirucmi; nasaracanmin, nakitamin.

¹⁷ Ni Jehova inaramidna daydiay pinanggepna; tinungpalna ti saona nga imbilinna idi ugma; intappuacna, ket saanna a kinaasian: ket pinaragsacna ti cabusor gapu kenca; intan-ocna ti sara dagiti cumaniwas kenca.

¹⁸ Ti pusoda nagpuccawda iti Apo: O bacud ti anac a babai ti Sion, pagayusem coma dagiti lulua a cas carayan iti aldaw ken rabii; dica agsardeng; dica ipalubos ti tao-tao ti matam a sumardeng.

¹⁹ Tumacderca, agickisca iti rabii, iti pangrugianan dagiti panagpuyat; ibucbucmo ta pusom a cas danum iti sangoanan ti Apo: itag-aymo dagiti imam kencuana gapu iti biag dagiti annacmo nga ububbing nga agtalimudaw iti bisin iti oloanan ti tunggal lansangan.

²⁰ Kitaem, O Jehova, ket adtoy, asino ti nangaramidam iti castoy! Dagiti babbai sidaendanto aya ti bungada, dagiti ububbing a maipallayog cadagiti imima? Ti padi ken ti mammadto mapapataydanto aya iti santuario ti Apo?

²¹ Ti ubing ken ti lacay agpasagda iti daga cadagiti lanlansangan; dagiti babbalasangco ken babbaroc mapasagda babaen ti campilan: pinataymo ida idi aldaw ti pungtotmo; rinucrucmo, ket dica kinaasian.

²² Inayabam, cas iti aldaw ti gimong a nangayed, dagiti pagbutbutngac iti isu-amin nga aglicmut; ket awan ti nacatalaw wenno nabati iti aldaw ti pungtot ni Jehova: dagidi impallayogco ken pinadackelco inibus ti cabusorco.