Dungdung-aw 1 - Ti Biblia (1973)

Dagiti basbasol ken panagsagaba ti Sion.

¹ Anian ti panagwaywayas ti maysa nga ili a napno idi cadagiti tattao! Isu nagbalin a cas maysa a balo, daydi dackel idi iti nagtengngaan dagiti nasnacion! Daydi princesa cadagiti provincia nagbalin a paiturayan!

² Isu agsangit iti napait iti rabii ket dagiti luluana addada cadagiti pingpingna; cadagiti amin a caayanayatna awan ti mangliwliwa kencuana; amin dagiti gagayyemna nagaramidda kencuana a sigugulib; nagbalinda a cabusorna.

³ Ni Juda naipan iti pannacacayaw maipanggep iti panagsagaba, ken maipanggep iti nadagsen a panagservi; isu makipagtaeng cadagiti nasnacion, awan ti masaracna nga inana: amin dagiti mangamatcamat kencuana isu naabutanda cadagiti nailet a daldalan.

⁴ Dagiti daldalan ti Sion agpanesda, gapu ta awan ti umay iti gimongda a nangayed; amin dagiti ruanganna nabaybayan, dagiti papadina agsainnecda: dagiti virgenna matutoocda iti ladingit, ket isu met laeng adda iti kinapait.

⁵ Dagiti casuppiatna nagbalinda nga pangoloenna, dagiti cabusorna rumangayda; ta ni Jehova isu pinagladingitna gapu iti caadu dagiti salungasingna: dagiti ububbing nga annacna naipanda iti pannacacayaw iti sangoanan ti cabusor.

⁶ Ket manipud iti anac a babai ti Sion ti amin a dayagna pimmanaw: dagiti piprincipena nagbalinda a cas cadagiti ugsa a lalaki nga awan masaracanda a pagarabanda. Ket napanda nga awan pigsada iti sangoanan dagiti mangcamatcamat cadacuada.

⁷ Ti Jerusalem malagipna bayat dagiti al-aldaw ti panagtutooc ken panagladingitna dagiti amin a macaayayo a cucuana nga adda manipud idi ugma; idi dagiti tattaona natnagda iti ima ti cabusor, ket awan ti nangbadang kencuana, dagiti cabusor nakitada, ket nagang-angawanda dagiti pannacaparigatna.

⁸ Ti Jerusalem nacabasol iti nacalcaldaang unay; gapuna a nagbalin a cas narugit; amin dagiti nangdaydayaw kencuana uyuyawenda, ta nakitadan ti kinalamolamona: wen, agsainnec, ket aglicuden.

⁹ Ti kinarugitna adda idi cadagiti cainna; isu saanna a nalagip ti maududi a casasaadna; iti casta immulog a nacascasdaaw, awan ti mangliwliwa kencuana: kitaem, O Jehova, ti tuocco; ta ti cabusor pinadackelna ti bagina met laeng.

¹⁰ Ti cabusor inunnatna ti imana cadagiti amin a macaay-ayo a cucuana: ta nakitana a dagiti nasnacion simrecda iti santuariona, maipanggep cadagidiay nangibilinam a saanda coma a sumrec iti gimongmo.

¹¹ Amin dagiti tattaona agsainnecda, agsapulda iti tinapay; intedda dagiti macaay-ayo a cucuada nga insucat iti taraon a mangpakired iti cararua: kitaem, O Jehova, ket adtoy; ta siac nagbalinac a nacacaasi.

¹² Awan ti aniaman aya cadacayo, dacayo amin a lumabas? Adtoy, ket kitaem no adda aniaman a ladingit a mayasping iti ladingitco, a dimteng caniac, isu a pinangdusa ni Jehova caniac idi aldaw ti nacaro a pungtotna.

¹³ Nanipud ngato impawitna ti apuy iti uneg dagiti tultulangco, ket inatiwna ida; isu inyaplagna ti iket cadagiti sacsacac, insublinac: isu pinagbalinnac a walangwalang ken sicacapuy nga agmalmalem.

¹⁴ Ti sangol dagiti panagsalungasingco mareppet babaen ti imana; maisiglotda, dimtengda agingga iti tengngedco; isu pinucawna ti pigsac: ti Apo inyawatnac cadagiti im-imada, maibusor cadagidiay diac macatacderen.

¹⁵ Ti Apo inawanna dagiti amin a mannacabalin a tattaoc iti nagtengngaac; isu nangayab iti gimong a nangayed a maibusor caniac tapno parmekenna dagiti tattaoc nga agtutubo a lallaki: ti Apo imbaddecna ti anac a virgen ti Juda a cas iti pagpespesan ti uvas.

¹⁶ Gapu cadagitoy a banbanag agsangitac; ti matac, ti matac agarubos iti danum; gapu ta ti mangliwliwa a mangpapigsa coma iti cararuac adayu caniac; dagiti annacco walangwalangda, agsipud ta ti cabusor nangabac.

¹⁷ Ti Sion intag-ayna dagiti im-imana; awan ti mangliwliwa kencuana; ni Jehova nagbilin maipapan ken Jacob, a dagidiay adda iti licmutna isuda coma dagiti cabusorna; ti Jerusalem adda iti nagtengngaanda cas banag a narugit.

¹⁸ Ni Jehova nalinteg; ta siac sinalungasingco ti bilinna: denggenyo, dawatec cadacayo, dacayo amin a tattao, ket kitaenyo ti ladingitco: dagiti babbalasangco ken babbaroc macayawanda.

¹⁹ Inawagac dagiti caayanayatco, ngem inallilawdac: dagiti papadic ken dagiti panglacayec simmina dagiti cararuada iti uneg ti ili, bayat ti panagbirucda iti taraon a mangpapigsa cadacuada.

²⁰ Kitaem, O Jehova; ta siac addaac a naldaang; ti pusoc mariribuc; ti pusoc mabalictad iti unegco; ta nacalcaldaang ti panangsalungasingco: iti ruar ti campilan mangpaulila, ditoy taengco adda ni patay.

²¹ Nangngegda nga agsasainnecac; awan ti mangliwliwa caniac; amin dagiti cabusorco nangngegda ti riribucco; agragsacda gapu ta inaramidmo: sica yegmonto ti aldaw nga inwayangmo, ket isuda mayaspingdanto caniac.

²² Amin ti kinadakesda maisangoda coma kenca; ket aramidem cadacuada, cas inaramidmo caniac maipuon cadagiti amin a panangsalungasingco: ta dagiti sasainnecco aduda, ket toy pusoc nacapuy.