Deuteronomio 8 - Ti Biblia (1973)

Maipalagip ti aramid a naparabur ni Jehova idi.

¹ Amin a bilin nga ibilinco kenca iti daytoy nga aldaw tungpalenyonto nga aramiden, tapno agbiagcayo, ken umaducayo, ken macastreccayo nga agtagicua iti daga nga insapata ni Jehova cadagiti ammayo.

² Ket laglagipemto amin a dalan a nangiturongan kenca ni Jehova a Diosmo cadagitoy uppat a pulo a tawtawen iti let-ang, tapno pagpacumbabaennaca, tapno masuutca, tapno maammoan ti adda ita pusom, no salimetmetamto met laeng dagiti bilbilinna wenno saan.

³ Ket pinagpacumbabanaca, ket pinagbisinnaca, ket tinaraonannaca iti mana, a saanmo pay idi nga ammo, uray dagidi ammam saanda a naammoan: tapno ipaammona kenca a ti tao saan laeng a ti canen ti pagbiagna, no di ket ti isu-amin a rumuar iti ngiwat ni Jehova ti pagbiagan ti tao.

⁴ Ta pagan-anaymo saan a dimmaan kenca, wenno limteg dayta sacam cadagitoy uppat a pulo a tawtawen.

⁵ Ket panpanunotemto ita pusom, a cas ti pannusa ti maysa a tao iti anacna, casta ti pannusa ni Jehova a Diosmo kenca.

⁶ Ket dagiti bilbilin ni Jehova a Diosmo salimetmetamto, tapno magnaca cadagiti daldalanna, ken agamangaca kencuana.

⁷ Ta ni Jehova a Diosmo yegnaca iti maysa a nasayaat a daga, maysa a daga a yan ti waig ti danum, ti burburayoc ken ub-ubbog nga agayus cadagiti lob-lobong ken turturod:

⁸ Maysa a daga a catrigoan, ken cacebadaan, ken cauv-uvasan, ken cahiggosan, ken cagranadaan; maysa a daga caol-olivaan ken cadiroan;

⁹ Maysa a daga nga panganamto iti taraon nga di agcurang, awanto ti uray ania a pagcurangan idiay; maysa a daga a dagiti batbatona, landocda, ket cadagiti turturodna mabalinmo ti cumutcut iti gambang.

¹⁰ Ket sica mangancanto, ket mapneccanto, ket benditoemto ni Jehova a Diosmo gapu iti daga a nasayaat nga intedna kenca.

¹¹ Agaluadca di la ket ta malipatam ni Jehova a Diosmo iti dica panangsalimetmet cadagiti bilbilinna ken al-alagadenna, ken linlintegna, nga ibilinco kenca itoy nga aldaw:

¹² Di la ket ta, no nacapanganca ket nabsogca, ken nacaibangoncan iti nasayaat a balbalay ket pagyanam ida;

¹³ Ken no dagiti pangpangenmo ken ar-arbanmo immaduda, ken ti piracmo, ken ti balitocmo immaduda, ken dagup amin nga adda kenca immaduda;

¹⁴ Iti casta ti pusom timmangsiten ket malipatamto ni Jehova a Diosmo a nangaon kenca iti daga nga Egipto, a nangipanaw kenca iti balay ti nacaadipnan;

¹⁵ Ken nangilasat kenca iti dackel ken nacabutbuteng a tay-ac, a yan idi dagiti immapuy nga ul-uleg ken manggagama, ken naticag a daga nga awanan danum idi, nga inruarannaca ti danum idi pamulinawen:

¹⁶ A nangtaraon kenca iti mana idiay tay-ac a di-naam-ammo dagiti ammam; tapno pinagpacumbabanaca ken pinadasnaca, tapno aramidenna kenca ti naimbag iti maudi a banagmo:

¹⁷ Ken di la ket ta cunaem iti pusom, Ti bilegco ken ti pannacabalin ti imac ti namaadda caniac itoy a sanicua.

¹⁸ Ngem laglagipemto ni Jehova a Diosmo ta isu ti mangted kenca iti bileg a mamaadda iti sanicua; tapno ibuangayna ti tulagna nga insapatana cadagiti ammam, cas iti daytoy nga aldaw.

¹⁹ Ket maaramidto, a no malipatamto ni Jehova a Diosmo, ket sumurotca cadagiti sabsabali a didios, ket agservica cadacuada, ken agdaydayawca cadacuada, panecnecac ti maibusor cadacayo itoy nga aldaw, a di bumurong a mapucawcayo.

²⁰ Cas cadagiti nasnacion a pucawen ni Jehova iti sangoyo, casta ti pannacapucawyonto; gapu ta dicay impangag ti timec ni Jehova a Diosyo.