Deuteronomio 6 - Ti Biblia (1973)

Pammagbaga ken pammatigmaan.

¹ Ita daytoy ti bilin, dagiti al-alagaden, ken linlinteg, nga imbilin ni Jehova a Diosyo nga isuroc cadacayo, tapno isuda ti aramidenyo iti daga nga incayo tagicuaen;

² Tapno agamangaca ken Jehova a Diosmo, a salimetmetam amin nga al-alagadenna ken bilbilinna, nga imbilinco kenca, sica, ken ti anacmo a lalaki, ken ti anac ti anacmo, bayat dagiti al-aldaw a panagbiagmo; ken tapno dagiti al-aldawmo manayonda.

³ Denggem ngarud, O Israel, ket tungpalem nga aramiden; tapno agbalinca a naimbag ken umaduca iti casta unay, cas ni Jehova a Dios dagiti ammam incarina kenca, iti maysa a daga nga agayus ti gatas ken diro.

⁴ Denggem, O Israel: ni Jehova a Diostayo isu ti maymaysa a Jehova;

⁵ Ket sica ayatemto ni Jehova a Diosmo iti isu-amin a pusom, ken iti isu-amin a cabaelam.

⁶ Ket dagitoy a sasao nga ibilinco kenca iti daytoy nga aldaw, agyandanto ita pusom;

⁷ Ket isuromto a siaagawa dagitoy cadagiti annacmo, ket dagitoy ti sasaoem cadacuada no situtugawca iti balaymo, ken no magmagnaca iti dalan, ken no agiddaca, ken no bumangonca.

⁸ Ket ibedbedmonto ida ita imam a maysa a tandaan, ket isudanto ti pannacabedbed ti baet dagita matam.

⁹ Ket isuratmonto ida cadagiti babaotec ti ruangan ti balaymo, ken cadagiti rikepmo.

¹⁰ Ket maaramidto, a no ni Jehova a Diosmo yegnacanto iti daga nga insapatana cadagiti ammam, a da Abraham, Isaac ken Jacob, nga itedna kenca, dagiti dackel ken naimbag nga il-ili a dica pinatacder,

¹¹ Ken dagiti balbalay a napno cadagiti nasayaat a banbanag, a dica indulin, ken bobbobon a kinutcutan, saan a sica ti nagcutcut, cauv-uvasan ken caol-olivaan, a saan a sica ti nagmula, ket mangancanto, ket mapneccanto;

¹² Agaluadca ngarud di la ket ta malipatam ni Jehova, a nangaon kenca iti daga nga Egipto, nanipud iti balay ti nacaadipnan.

¹³ Agamangaca ken Jehova a Diosmo; ket agservicanto kencuana, ket agsapatacanto iti naganna.

¹⁴ Dica agsapul iti sabali a dios, cadagiti didios dagiti il-ili a aglawlaw cadacayo;

¹⁵ Ta ni Jehova a Diosmo nga adda iti tengngam isu ti manangimun a Dios; di la ket ta ti pungtot ni Jehova a Diosmo sumged a maibusor kenca, ket isu dadaelennaca nga iccaten iti rabaw ti daga.

¹⁶ Dicay suuten ni Jehova a Diosyo, cas pinangsuutyo kencuana idiay Massa.

¹⁷ Salimetmetanyonto nga agawaan dagiti bilbilin ni Jehova a Diosyo, ken dagiti pamanecnecna, ken dagiti alagadenna nga imbilinna kenca.

¹⁸ Ket sica aramidemto ti nalinteg ken nasayaat iti imatang ni Jehova; tapno naimbagto laeng kenca, ken tapno macastrecca, ken macapagtagicuaca iti naimbag a daga nga ni Jehova insapatana cadagiti ammam,

¹⁹ A pagtalawenan amin a cabusormo iti sangoanam, cas sinao ni Jehova.

²⁰ No ti anacmo a lalaki saludsudenna kenca iti aldaw a masacbayan, a cunana, Ania ti caipapanan dagiti panpanecnec, ken al-alagaden, ken linlinteg, a ni Jehova a Diostayo imbilinna kenca?

²¹ Saoemto ngarud iti anacmo, Dacami idi dagiti ad-adipen ni Faraon sadi Egipto: ket ni Jehova inaonnacami sadi Egipto iti maysa a mannacabalin nga ima:

²² Ket ni Jehova imparangarangna dagiti pagtandaanan, ken pagsidsiddaawan, dackel ken nacadidigra iti Egipto, ken Faraon, ken isu-amin ti balayna, iti sango dagiti matami;

²³ Ket isu inaonnacami idiay, tapno ipastrecnacami ken itedna cadatayo ti daga nga insapatana cadagiti ammatayo.

²⁴ Ket ni Jehova imbilinna cadatayo nga aramidentayo amin dagitoy nga al-alagadenna, tapno agamangtayo ken Jehova a Diostayo, a pagimbagantayo iti agnanayon, tapno taginayonennatayo a biagen, cas itoy nga aldaw.

²⁵ Ket isunto ti kinalinteg cadatayo, no tungpalentayo nga aramiden amin daytoy a bilin iti saclang ni Jehova a Diostayo, cas imbilinna cadatayo.