Deuteronomio 5 - Ti Biblia (1973)

Ti nacapucpucan ti linteg. Dagiti sangapulo a bilbilin. Ti buteng dagiti tattao sadiay Sinai.

¹ Ket ni Moises inayabanna amin nga Israel, ket kinunana cadacuada, Denggenyo, O Israel, dagiti al-alagaden ken bilbilin a saoec ita nga aldaw cadagita lapayagyo, tapno adalenyo ida, ket tungpalenyo nga aramiden ida.

² Ni Jehova a Diostayo inaramidna ti maysa a tulag cadatayo idiay Horeb.

³ Ni Jehova saanna nga inaramid daytoy a tulag cadagidi ammatayo, no di ket cadatayo, cadatayo met laeng nga addatayo amin ditoy a sibibiag ita nga aldaw.

⁴ Ni Jehova nakisao cadacayo iti sangonsango iti bantay manipud idi tengnga ti apuy.

⁵ (Addaac idi iti baet ni Jehova ken dacayo iti daydi nga aldaw, tapno ibatadco cadacayo ti sao ni Jehova: ta agbutengcayo met idi gapu idi apuy, ket dicay simmang-at idi bantay:) a kinunana,

⁶ Siac ni Jehova a Diosmo, a nangaon kenca iti daga nga Egipto, iti balay ti nacaadipnan.

⁷ Awan ti sabali a didiosmo ti sangoc.

⁸ Dica mangaramid iti maipaay kenca a ladawan a kinitikitan, uray ania a catulad ti adda idiay ngato sadi langit, wenno iti baba ditoy daga, wenno ti adda iti danum iti uneg ti daga:

⁹ Dica irucnoy ti bagim cadacuada, uray pagservian ida; ta siac ni Jehova a Diosmo manangimonac a Dios, a mangipasarungcar iti kinadakes dagiti amma cadagiti annac, cadagiti maicatlo ken maicapat a caputotan dagiti gumura caniac;

¹⁰ Ken mangipaay iti imbag a naayat cadagiti rinibribu nga agayat caniac, ken mangsalimetmet cadagiti bilbilinco.

¹¹ Dica aramaten nga ipabpabareng ti nagan ni Jehova a Diosmo; ta ni Jehova saannanto a di pabasolen ti mangaramat iti naganna iti barengbareng.

¹² Laglagipem ti aldaw a panaginana, tapno salimetmetam a nasantoan, cas ni Jehova a Diosmo imbilinna kenca.

¹³ Innem nga aldaw agtrabajoca, ket aramidem amin nga aramidmo;

¹⁴ Ngem ti maicapito nga aldaw isu ti maysa a panaginana ken Jehova a Diosmo: iti dayta nga aldaw, dica agtrabajo iti uray ania, sica, wenno ti anacmo a lalaki, wenno ti anacmo a babai, wenno ti adipenmo a lalaki wenno ti adipenmo a babai, wenno ti vacam, wenno asnom, wenno uray ania nga animalmo, wenno ti gangannaetmo nga adda iti uneg dagiti ruruanganmo; tapno dagiti adipenmo a lalaki, ken adipenmo a babai aginanada a cas met kenca.

¹⁵ Ket laglagipemto a maysaca met idi nga adipen iti daga nga Egipto, ket ni Jehova a Diosmo inaonnaca sadiay iti ima a mannacabalin ken tackiag a sitatag-ay: gapuna a ni Jehova a Diosmo imbilinna kenca a salimetmetam ti aldaw a panaginana.

¹⁶ Dayawem ni amam ken ni inam, cas ni Jehova a Diosmo imbilinna kenca; tapno manayon dagiti aldawmo, ken tapno agbalincanto a naimbag iti daga nga ited kenca ni Jehova a Diosmo.

¹⁷ Dica mamapatay.

¹⁸ Dica met makiabig iti dica asawa.

¹⁹ Dica met agtacaw.

²⁰ Dica met agsacsi iti ulbod a maibusor iti padam a tao.

²¹ Dica met aguman ti asawa ti padam a tao; dica met aguman ti balay ti padam a tao, ti talonna, wenno ti adipenna a lalaki, wenno adipenna a babai, ti vacana, wenno ti asnona, wenno ti uray ania a cucua ti padam a tao.

²² Dagitoy dagiti sasao a ni Jehova binalicasna iti natbag a timec iti dagup ti gimong idiay bantay nanipud iti tengnga ti apuy, ti ulep, ken ti napuscol a sipnget: ket awanen ti innayonna. Ket insuratna ida iti rabaw ti dua a taptapi a bato, sana inted idi caniac.

²³ Ket naaramid, idi a nangngegyo ti timec nanipud iti tengnga ti sipnget, idi a sumsumged di bantay iti apuy, immasidegcayo caniac, uray amin dagiti pangpangolo ti capcaputotanyo, ken lallacayyo;

²⁴ Ket dacayo kinunayo, Adtoy, ni Jehova a Diosmi imparangarangna cadacami ti dayagna ken ti kinadackelna, ket nangngegmi ti timecna nanipud iti tengnga ti apuy: nakitami itoy nga aldaw a ti Dios makisao iti tao. Ket isu agbiag.

²⁵ Ita ngarud, apayapay a mataycamto? Ta daytoy dackel nga apuy ibusennacamto: no mangegmi pay manen ti timec ni Jehova, mataycamto ngarud.

²⁶ Ta asino ti adda iti isu-amin a lasag a nacangeg iti timec ti sibibiag a Dios a nagsao nanipud ti tengnga ti apuy cas cadacami, ket nagbiag,

²⁷ Umadanica ket denggem amin a saoen ni Jehova a Diostayo: ket ibagam cadacami dagup ti saoento kenca ni Jehova a Diostayo; ket denggenminto, ket aramidenminto.

²⁸ Ket ni Jehova nangngegna ti timec dagiti sasaoyo, idi nga casasaodac; ket ni Jehova kinunana caniac, Nangngegco ti timec dagiti sasao daytoy nga ili, isuda a nakisao kenca: isuda nasayaat ti panagcunada iti dagup ti sinaoda.

²⁹ O anian coma no adda cadacuada dayta a puso, tapno agbutengda coma caniac, ken salimetmetanda dagiti amin a bilbilinco iti agnanayon, tapno agbalinda a naimbag ken cadagiti annacda iti agnanayon!

³⁰ Inca, cunam cadacuada, Agsublicayo cadagiti toltoldayo.

³¹ Ngem no sica, agyanca ditoy caniac, ket saoecto kenca ti dagup dagiti linlinteg, ken al-alagaden, ken bilbilin, nga isuromto cadacuada, tapno aramidendanto ida iti daga nga itedco cadacuada a tagicuaen.

³² Dacayo tungpalenyonto nga aramiden ngarud ti cas imbilin cadacayo ni Jehova a Diosyo, dicayto sumiasi uray iti macanawan wenno iti macatigid.

³³ Magnacayto laeng iti amin a dana nga ni Jehova a Diosyo imbilinna cadacayo tapno agbiagcayo ken agbalincayo a naimbag ken tapno manayon dagiti al-aldawyo iti daga a tagicuaenyonto.