Deuteronomio 34 - Ti Biblia (1973)

Ti ipapatay ni Moises.

¹ Ket ni Moises simmang-at nanipud iti tantanap ti Moab agingga iti bantay Nebo, iti tapaw ti Pisga, nga adda iti sango ti Jerico. Ket ni Jehova imparangna kencuana ti isu-amin a daga ti Galaad, agingga iti Dan,

² Ken amin ti Nephtali, ken ti daga ti Efraim ken Manases, ken amin a daga ti Juda, agingga iti taaw nga akinlicud,

³ Ken ti Abagatan, ken ti Tanap ti lobong ti Jerico nga ili a capalmaan, inggana iti Soar.

⁴ Ket ni Jehova kinunana kencuana, Daytoy ti daga nga insapatac ken Abraham, ken Isaac, ken ni Jacob a kinunac, Itedconto daytoy iti putotmo: impakitac kenca cadagiti matam, ngem dicanto macapan idiay.

⁵ Iti casta ni Moises nga adipen ni Jehova natay idiay iti daga ti Moab, cas mayannurot iti sao ni Jehova.

⁶ Ket isu naitabon iti lobong ti daga ti Moab iti sango ti Bethpeor: ngem awan ti macaammo iti tanemna agpapan ita nga aldaw.

⁷ Ket ni Moises agtawen iti sangagasut ket dua pulo idi natay: ti matana saan a nacullaapan, wenno nacsayan ti cadawyan a pigsana.

⁸ Ket dagiti annac ti Israel sinangitanda ni Moises iti tantanap ti Moab bayat iti tallopulo nga aldaw: casta ti pannacaungpot dagiti aldaw ti panagsangsangit iti panagliday a gapu ken Moises.

⁹ Ket ni Josue nga anac ni Nun napno idi iti espiritu ti kinasirib; ta ni Moises impatayna kencuana dagiti im-imana: ket dagiti annac ti Israel impangagda ket inaramidda ti cas ni Jehova imbilinna ken Moises.

¹⁰ Ket nanipud idi awan timmaud a mammadto iti Israel, a capada ni Moises nga inam-ammo ni Jehova iti sangonsango,

¹¹ Iti amin a pagilasinan ken datdatlag, nga imbaon kencuana ni Jehova tapno aramidenna ida iti daga nga Egipto, ken Faraon, ken iti isu-amin nga ad-adipenna, ken iti amin a dagana.

¹² Ken iti amin nga ima a mannacabalin, ken iti amin a dadackel a nacakigkigtot, a ni Moises inaramidna iti imatang ti dagup ti Israel.