Deuteronomio 32 - Ti Biblia (1973)

Ti canta ni Moises. Maibilin ken Moises a sumang-at iti bantay Nebo.

¹ Dumngegcayo, dacayo a langlangit, ket agsaoacto; ket denggen coma ti daga dagiti balbalicas ti ngiwatco.

² Ti pannursuroc agtedtedto cas tudo, ti palawagco agtinnagto cas ti linnaaw: cas arimucamoc iti rabaw ti root a nalasbang, ken cas ti arbis iti rabaw ti nateng:

³ Ta ti nagan ni Jehova yawagconto: ipacumityo ti kinadackel iti Diostayo.

⁴ Ti Bato, naananay ti aramidna; ta amin a dalanna kinalinteg: maysa a Dios ti kinamatalec ket awanan damca, isu awan pagcuranganna ken nalinteg.

⁵ Dakes ti inaramidda kencuana, isuda saanna ida nga annac, dayta ti pilawda; isuda ti naindacsan ken nakillo a caputotan.

⁶ Castoy aya ti panupapacyo ken Jehova, O namaag nga umili ken nanengneng? Saan aya nga isu ti amam a gimmatang kenca? Isu ti nangaramid kenca, ken nangbangon kenca.

⁷ Laglagipem dagiti al-aldaw idi ugma, panpanunotem dagiti tawtawen dagiti adu a capcaputotan: Agintuudca ken amam, ket isu iparangnanto kenca; cadagiti lallacaymo, ket isuda saoendanto kenca.

⁸ Idi ti Cangatoan unay intedna cadagiti nasnacion dagiti tawidda, idi pinagsisinana dagiti annac dagiti tattao, inwayangna dagiti bedbeddeng dagiti il-ili mayannatup iti bilang dagiti annac ti Israel.

⁹ Ta ti bagi ni Jehova isu ti ilina; ni Jacob isu ti bagina a tawid.

¹⁰ Isu sinaracna iti maysa a caticagan a daga, ken iti walang a nacaalalingnget a let-ang; isu nilictubna, isu nangaywan kencuana, isu nagaluad kencuana cas ti bukel ti matana.

¹¹ Cas maysa nga aguila a mangwagwag iti umocna, nga agpayacpac iti rabaw ti urbonna, isu inucradna dagiti payacna, innalana ida, inawitna ida iti rabaw dagiti paypayacna.

¹² Ni Jehova laeng ti nangitulod kencuana, ket awan idi ti sabali a dios kencuana.

¹³ Isu ti nangisacay kencuana cadagiti nangato a disso ti daga, ket nangan iti apit ti talon; ket isu pinasusopna ti diro a nagtaud iti bato, ken lana iti natangken a bato:

¹⁴ Mantequilla dagiti vacvaca, ken gatas ti pangen, agraman taba dagiti corcordero, ken carcarnero a lallaki a tubo iti Basan, ken dagiti calcalding, agraman ti casayaatan ti trigo; ken iti dara ti uvas, sica imminumca iti arac.

¹⁵ Ngem ti Jesurum naglucmeg, ket kimmugtar: sica limmucmegca, bimmanegca, timmabacan; Iti casta binaybay-anna ti Dios a nangaramid kencuana, ket parparawpaw ti pinangipategna iti Bato a salacanna.

¹⁶ Isuda pinagimunda gapu cadagiti sabsabali a didios; agraman macarimon ginargarida tapno agunget.

¹⁷ Isuda nagidatonda cadagiti sasairo, a saan a ti Dios, cadagiti didios a dida ammo idi, cadagiti didios a babaro a calcaltuad, a saan a nagbutngan dagiti ammayo.

¹⁸ Iti Bato a nangputot kenca sica dica linagip, ket linipatam ti Dios a nangyanac kenca.

¹⁹ Ket ni Jehova nakitana, ket kinagurana ida, gapu iti pananggargari dagiti annacna a lallaki, ken annacna a babbai.

²⁰ Ket kinunana, Ilemmengconto ti rupac cadacuada, siac kitaecto no anianto ti banagda: ta isuda dakesda unay a caputotan, annac a saan a mapagtalcan.

²¹ Isuda tinignaydac nga agimun iti dayta saan a Dios; ginargaridac nga agpungtot gapu cadagiti kinaubbawda: ket tignayecto ida nga agimun cadagidiay saan nga umili; gargariecto ida nga agpungtot iti nanengneng a nacion.

²² Ta maysa nga apuy dimmarang iti pungtotco, ket sumged inggana ti cababaan a tanem, ket alun-unenna ti daga agraman kinalabonna, ket silmutanna ti puon dagiti banbantay.

²³ Pagdadarisonecto dagiti dakes cadacuada; ibusecto dagiti panpanac cadacuada:

²⁴ Umresdanto iti bisin, ket maalun-undanto iti nadarang a pudot ken ti napait a pannacadadael; ket ibaonconto cadacuada dagiti ngipen dagiti narungsot nga an-animal, agraman gita dagiti agcarcarayam iti tapuc.

²⁵ Iti ruar mamagtalipungawto ti campilan, ket iti uneg dagiti silsiled kigtot; ti babbaro ken virgen agpada a dadaelennanto, ti agsusu agraman agubanen.

²⁶ Kinunac, inwarac coma ida iti adayu, pinagsardengco coma ti lagip cadacuada iti nagtengngaan dagiti tattao;

²⁷ No coma no diac inamac ti pangargari ti cabusor, di la ket ta dagiti casupiatda di umisu ti panangipatoda coma, di la ket ta cunada coma, ti imami naitan-oc, ket ni Jehova saanna nga inaramid amin daytoy.

²⁸ Ta isuda maysada a nacion nga awanan bagbaga, ket awan cadacuada ti pannacaawat.

²⁹ O no coma no masiribda, daytoy maawatanda coma, panpanunotenda coma ti maud-udi a banagda!

³⁰ Casano ti panangpataray ti maymaysa iti sangaribu, ket ti dua patarayenna ti sangapulo ribu, malacsid no ti Batoda inlacona ida, ken ni Jehova inyawatna ida?

³¹ Ta ti batoda saan a cas ti Batotayo, uray dagiti cabcabusor met laeng ti mangipato.

³² Ta ti lanutda isu ti nayon ti lanut ti Sodoma, ken aggapu iti taltalon ti Gomorra: dagiti uv-uvasda, uv-uvas ti apro, dagiti sarsar-ayda napait:

³³ Ti aracda isu ti gita dagiti ul-uleg, ken ti nadawel a sabidong dagiti carasaen.

³⁴ Saan aya nga adda caniac daytoy a sidudulin, nabungon cadagiti gamgamengco?

³⁵ Cuac ti pammales ken panggunguna, iti aldaw a pannacaigalisto dagiti sacada: ta ti aldaw ti panagladingitda asidegen, ket dagiti dumteng cadacuada napardasdanto.

³⁶ Ta ni Jehova ocomennanto ti ilina, ket agbabawinto gapu cadagiti ad-adipenna; no makitana a naibusen ti bilegda, ken awan ti matda a balud wenno agwayawaya.

³⁷ Ket isu cunananto, sadino ti yan dagiti didiosda, ti bato a nagcamanganda;

³⁸ A nangnangan ti taba dagiti datdatonda, ken immininum iti arac nga inumen a datonda? Tumacderda coma, ket tumulongda cadacayo, isuda coma ti mangsalacnib cadacayo.

³⁹ Kitaenyo ita a siac, a siac met laeng daydiay, ket awan dios a caduac: siac pumatayac ken mangbiagac; sumugatac ken mangagasac; ket awan uray asinoman a macalasut iti imac.

⁴⁰ Ta ingatoc sadi langit ti imac, ket cunac, Idinto nga agnanayon a sibibiagac,

⁴¹ No asaec ti campilanco a sumilsilap, ket ti panangocom petpetan ti imac; idissocto ti pammales cadagiti casupadic, ket supapacacto ida dagidiay gumura caniac.

⁴² Bartekecto iti dara dagiti panac ket ti campilanco alun-unennanto ti lasag; agraman ti dara dagiti napatay ken dagiti nacaycayawan, manipud olo dagiti mangidalan ti cabusor.

⁴³ Agragragsaccayo, O dacayo a nasnacion, a maitimpuyog iti ilina: ta ibalesnanto ti dara dagiti ad-adipenna, ket itednanto ti pammales cadagiti cabcabusorna, ket subbotennanto ti dagana ken ti ilina.

⁴⁴ Ket ni Moises immay ket sinaona amin dagiti sasao daytoy a canta cadagiti pagdengngeg dagiti tattao, isu, ken ni Josue nga anac ni Nun.

⁴⁵ Ket ni Moises tinurposna ti nagsao cadagitoy a balicas iti amin nga Israel;

⁴⁶ Ket kinunana cadacuada, Icabilyo ita pusoyo dagiti amin a sasao nga ipanecnecco cadacayo itoy nga aldaw, isu nga ibilinyonto cadagiti annacyo a tungpalenda nga aramiden, a ti dagup met laeng dagiti sasaoen daytoy a linteg.

⁴⁷ Ta saan a barengbareng cadacayo; gapu ta isu ti pacabiaganyo, ket gapu itoy mapaatiddugyo dagiti al-aldawyo iti daga a panglasatanyo iti Jordan tapno tagicuaenyo.

⁴⁸ Ket ni Jehova nakisao ken Moises iti daydi met la nga aldaw, a kinunana,

⁴⁹ Sumang-atca iti daytoy a bantay ti Abarim, agingga iti bantay Nebo, nga adda iti daga ti Moab, nga adda iti sango ti Jerico; ket kitaem ti daga a Canaan, nga itedco a cucua dagiti annac ti Israel;

⁵⁰ Ket matayca iti bantay a sang-atam, ket maitiponca iti ilim, cas pannacatay ni Aaron a cabsatmo iti bantay Hor, ket naitipon iti ilina:

⁵¹ Gapu ta naglabsingcayo iti maicaniwas caniac iti tengnga dagiti annac ti Israel iti yan ti dandanum ti Meriba ti Cades iti let-ang ti Zin; gapu ta didac sinantificar iti tengnga dagiti annac ti Israel.

⁵² Ta sica makitamto ti daga iti sangoanam, ngem dicanto sumbrec idiay daga nga itedco cadagiti annac ti Israel.