Deuteronomio 31 - Ti Biblia (1973)

Ti maudi nga igunamgunam ni Moises.

¹ Ket napan ni Moises, ket impalawagna dagitoy a sasao iti amin nga Israel.

² Ket isu kinunana cadacuada, Siac agtawenac ita nga aldaw iti sangagasut ket duapulo a tawen; diac mabalinen ti rumuar ken sumrec: ket ni Jehova kinunana caniac, Sica dicanto lumasat itoy Jordan.

³ Ni Jehova a Diosmo bumallasiwto iti sangom; isu dadaelennanto dagitoy nga il-ili manipud iti sangom, ket sica pagtalawemto ida: ket ni Josue bumallasiwto iti sangom, cas sinao ni Jehova.

⁴ Ket ni Jehova aramidennanto cadacuada, cas ti inaramidna ken Sehon, ken ni Og nga ar-ari dagiti Amorreo, ken iti dagada; isuda a dinadaelna.

⁵ Ket ni Jehova yawatnanto ida iti sangom, ket dacayo aramidenyonto cadacuada cas mayannurot iti amin a bilin nga imbilinco cadacayo.

⁶ Pumigsaca, ket umingelca a naimbag, dica agbuteng, wenno makigtot cadacuada: ta ni Jehova a Diosmo isu ti makicuyog kenca; dinto agcurang kenca, wenno di-met agliway kenca.

⁷ Ket ni Moises inayabanna ni Josue, ket kinunana kencuana iti imatang ti amin nga Israel, Pumigsaca, ken umingelca a naimbag: ta sica makicuyogcanto itoy nga ili, iti daga a ni Jehova insapatana cadagiti ammada nga ited cadacuada; ket pagtawidemto ida iti dayta a daga.

⁸ Ket ni Jehova isu ti mapan iti sangoanam: isu ti cumuyogto kenca, isu dinto agcurang kenca, wenno di-met agliway kenca: dica agbuteng, wenno agcullayaw.

⁹ Ket ni Moises insuratna daytoy a linteg, ket inyawatna cadagiti papadi nga annac ni Levi, isuda a mangaw-awit iti lacasa ti tulag ni Jehova, ken amin a lallacay ti Israel.

¹⁰ Ket ni Moises imbilinna cadacuada, a kinunana, Iti gibus ti tunggal pito a tawen iti nakedngan a tiempo ti tawen ti pammacawan, no fiesta dagiti tabtabernaculo,

¹¹ No ti dagup ti Israel umay agparang iti sango ni Jehova a Diosmo iti lugar a piliennanto, basaemto daytoy a linteg iti sango ti amin nga Israel iti pagdengngegda.

¹² Ummongemto dagiti tattao dagiti lallaki ken babbai, ken dagiti ubbing, ken ti gangannaet nga adda iti uneg dagiti ruruanganmo, tapno mangngeganda, ken masursuroda, ken agbutengda ken Jehova a Diosyo, ket tungpalenda nga aramiden amin dagiti sasao daytoy a linteg;

¹³ Ken tapno dagiti annacda a di nacaammo, mangngeganda, ken masursuroda ti agbuteng ken Jehova a Diosyo, bayat ti panagbiagyo iti daga a panglasatam iti Jordan tapno agtagicuaca.

¹⁴ Ket ni Jehova kinunana ken Moises, Adtoy, dagiti aldawmo dumtengdan ket matayca: ayabam ni Josue ket dumatagcayo iti tolda ti gimong, tapno itedco kencuana ti maysa nga annongen. Ket ni Moises ken ni Josue napanda ket dimmatagda iti tolda ti gimong.

¹⁵ Ket ni Jehova nagparang iti Tolda iti maysa a monmon nga ulep: ket ti monmon nga ulep nagyan iti rabaw ti ruangan ti Tolda.

¹⁶ Ket ni Jehova kinunana ken Moises, Adtoy, makiturogcanto cadagiti ammam: ket daytoy nga ili tumacderdanto ken makibalangcantisdanto cadagiti sabsabali a didios ti daga a papananda tapno maibaet cadacuada, ket baybay-andacto ket labsingendanto ti tulagco nga inwayangco cadacuada.

¹⁷ Iti casta sumgedto ti pungtotco cadacuada iti daydiay nga aldaw, ket baybay-acto ida, ket ilemmengconto cadacuada ti rupac, ket maalunundanto ket adu dagiti dakes ken rigat a umaydanto cadacuada; iti casta cunadanto iti daydiay nga aldaw, Saan aya nga immay cadatayo dagitoy a dakes a gapu ta awan cadatayo ti Diostayo?

¹⁸ Ket pudno nga ilemmengconto ti rupac iti daydiay nga aldaw, gapu iti amin a dakes a gapuananda, isu a panagbawingda a napan cadagiti sabsabali a didios.

¹⁹ Isu ti gapuna nga isuratyo ngarud daytoy a canta nga agpaay cadacayo, ket isurom cadagiti annac ti Israel: icabilmo cadagiti ngiwatda, tapno daytoy a canta isunto ti maysa a sacsi caniac a maicaniwas cadagiti annac ti Israel.

²⁰ Ta intono maiyegco ida iti daga nga insapatac cadagiti ammada, idinto nga agay-ayus ti gatas ken diro, ket macapangandanto ket mabsogda, ket lumucmegda; agbalicdanto a mapan cadagiti sabali a didios, ket agservidanto cadacuada, ket laisendacto, ket waraendanto ti tulagco.

²¹ Ket maaramidto a no adu ti dakes ken rigrigat a dumteng cadacuada, daytoy a canta panecnecannanto iti sangoda, cas maysa a sacsi; gapu ta dinto malipatan iti ngiwngiwat dagiti putotda: ta ammoc ti panunotda a buclenda ita nga aldaw a casacbayan ti panangyegco cadacuada iti daga nga insapatac.

²² Iti casta ni Moises insuratna daytoy a canta iti dayta met laeng nga aldaw, ket insurona cadagiti annac ti Israel.

²³ Ket intedna ken Josue nga anac ni Nun ti maysa a bilin, ket kinunana, Pumigsaca, ken umingelca a naimbag; ta sica ti mangipanto cadagiti annac ti Israel iti daga nga insapatac cadacuada, ket addaacto kenca.

²⁴ Ket naaramid nga idi ni Moises natorpusnan nga insurat dagiti sasao ti linteg iti maysa a libro, inggana iti nalpasda,

²⁵ Ni Moises imbilinna cadagiti Levitas nga agawawit idi ti lacasa ti tulag ni Jehova, a kinunana,

²⁶ Alaenyo daytoy a libro ti linteg, ket icabilyo iti abay ti lacasa ti tulag ni Jehova a Diosyo, tapno isu ti sacsi sadiay a maicaniwas kenca.

²⁷ Ta ammoc ti kinasukirmo, ken ti kinatangken ti lengngesmo: adtoy, ita ta sibibiagac pay iti arpadyo ita nga aldaw, nagsukircayon iti maicaniwas ken Jehova; ket casanonto ket din no calpasan ti ipapatayco?

²⁸ Ummongem caniac amin dagiti lallacay dagiti caputotanyo, ken dagiti turayenyo, tapno maipalawagco dagitoy a sasao cadagiti lapayagda, ket awagac ti langit ken daga a sacsi a maicaniwas cadacuada.

²⁹ Ta ammoc a calpasan ti ipapatayco, agdakescayto a matalipupus, ket sumiasicayto ti dalan nga imbilinco cadacayo; ket ti dakes maaramidto cadacayo iti maud-udi nga aldaw gapu ta dacayo aramidenyonto ti dakes iti imatang ni Jehova, a panggargari kencuana tapno agpungtot gapu iti gapuanan dagiti im-imayo.

³⁰ Ket ni Moises impalawagna cadagiti pagdengngeg ti amin ti gimong ti Israel dagiti sasao daytoy a canta, inggana iti nalpasda.