Deuteronomio 3 - Ti Biblia (1973)

Ti pannacaparmec ti Basan. Ti panagtagicua dagiti capcaputotan a taga baliw ti Jordan. Maiparit a lasaten ni Moises ti Jordan.

¹ Idin nagbaw-ingtayo ket simmang-attayo iti dalan nga agpa-Basan: ket ni Og nga ari ti Basan immay nakirupac cadatayo, isu ken amin a tattaona, a makibacal sadiay Edrei.

² Ket ni Jehova kinunana caniac, Dica agbuteng kencuana: ta isu inyawatco agraman amin a tattaona, ken ti dagana, ita imam; ket aramidemto kencuana ti cas inaramidmo ken Sehon nga ari ti Amorreo, a nagnaed idiay Hesbon.

³ Iti casta ni Jehova a Diostayo inyawatna met cadagiti imatayo ni Og, nga ari ti Basan, ken amin a tattaona; ket kinabiltayo agingga iti awan binay-antayo a natda kencuana.

⁴ Ket innalatayo amin dagiti il-ilina iti daydi a tiempo; awan ti maysa nga ili a ditay innala cadacuada; innem a pulo nga ili-ili, amin a sacup ti Argob a pagarian ni Og idiay Basan.

⁵ Amin dagitoy nga ili-ili nasarikedkedanda idi cadagiti nangato a bacbacud ruruangan ken balbalunet; sabali pay dagiti adu unay nga il-ili a saan a nabacudan.

⁶ Ket dinadaeltayo ida a tinalipupus, cas inaramidtayo ken Sehon nga ari ti Hesbon, a dinadaeltayo a tinalipupus ti tunggal ili nga adda agnaed, agraman babbai ken babassit.

⁷ Ngem amin nga animal ken samsam cadagiti il-ili innalatayo a samsam a maipaay cadatay met laeng.

⁸ Ket innalatayo ti daga iti daydi nga aldaw iti ima dagiti dua nga ar-ari dagiti Amorreo nga adda idi iti ballasiw ti Jordan, nanipud ti lobong ti Arnon agingga iti bantay Hermon;

⁹ (Nga Hermon a naganen dagiti Sidonios iti Sirion, ket dagiti Amorreos naganenda iti Senir;)

¹⁰ Amin dagiti il-ili iti tanap ken dagup ti Galaad ken amin ti Basan agingga iti Salcha ken Edrei, ti pagarian ni Og sadiay Basan.

¹¹ (Ta ni laeng Og, nga ari ti Basan, ti natda iti nabati, cadagiti Refaim; adtoy, ti pagiddaanna maysa a pagiddaan a landoc; saan aya daytoy ti adda ti Rabbat dagiti annac ti Ammon? siam a casico idi ti caatiddugna, ket uppat a casico ti caacabana, cas ti sico ti maysa a lalaki.)

¹² Ket daytoy a daga innalatayo a tagicuaen iti daydi nga aldaw: manipud Aroer nga adda iti abay ti lobong ti Arnon, ken guddua ti caturodan ti Galaad, ken dagiti il-ilina, intedco cadagiti Rubenitas ken cadagiti Gaditas:

¹³ Ket ti natda iti Galaad ken amin ti Basan a pagarian ni Og intedco iti caguddua ti caputotan ni Manases; amin ti sacup ti Argob, nga amin ti Basan met laeng. (Isu met laeng ti nanaganan daga dagiti Refaim.

¹⁴ Ni Jair anac a lalaki ni Manases innalana amin ti sacup ti Argob agingga iti igid dagiti Gessuritas, ken dagiti Macatitas, ket ninagananna ida ti Basan met laeng iti mayannurot iti naganna met laeng. Haboth-jair, agpapan itoy nga aldaw.)

¹⁵ Ket intedco ti Galaad ken Maquir.

¹⁶ Ket cadagiti Rubenitas ken cadagiti Gaditas intedco nanipud Galaad agingga iti lobong ti Arnon a tengnga ti lobong, ken ti beddengna nga agingga iti carayan a Jaboc, a beddeng dagiti annac ni Ammon;

¹⁷ Ti Araba met, ken ti Jordan ken ti igidna, nanipud Cineret agingga met laeng iti baybay ti Araba, a Baybay ti Asin, iti baba dagiti salogan ti Pisga iti daya.

¹⁸ Ket imbilinco cadacayo iti daydi nga aldaw, a kinunac, Ni Jehova a Diosyo intedna cadacayo daytoy a daga a tagicuaenyo: agbaliwcayto a siiigam iti sango dagiti cacabsatyo nga anac ti Israel, amin a lallaki a maingel.

¹⁹ Ngem dagiti assawayo, ken dagiti babassityo, ken dagiti an-animalyo, (ammoc nga adu ti an-animalyo,) agtaengdanto cadagiti il-iliyo nga intedco cadacayo,

²⁰ Agingga iti ited ni Jehova ti inana cadagiti cacabsatyo, cas cadacayo, ken tagicuaenda met ti daga nga ited cadacuada ni Jehova a Diosyo iti ballasiw ti Jordan: iti calpasanna agsublicayto, tumunggal maysa iti pagtagicuaanna nga intedco cadacayo.

²¹ Ket imbilinco ken Josue iti daydi nga aldaw a kinunac. Dagiti matam nakitada amin ti inaramid ni Jehova a Diosmo cadagiti dua nga ar-ari: casta ti aramidento ni Jehova cadagiti amin a pagpagarian a papanam.

²² Dicayto agbuteng cadacuada; ta ni Jehova a Diosyo, isu ti makibacal a maipaay cadacayo.

²³ Ket nagcararagac ken Jehova iti daydi nga aldaw, a kinunac,

²⁴ O Apo Jehova, rinugiam nga imparangarang iti adipenmo ta kinadackelmo ken ta imam a napigsa: ta asino a dios sadi langit wenno ditoy daga ti macabalin a mangaramid iti cas ti gapgapuanam ken cas cadagiti ar-aramidmo a mannacabalin?

²⁵ Ipalubosmo a lumasatac coma, dawatec ken, a kitaen ti nasayaat a daga nga adda iti bal-lasiw ti Jordan daydiay napanayag a bantay ken ti Libano.

²⁶ Ngem ni Jehova nacaunget caniac gapu cadacayo, ket dinac impangag; ket ni Jehova kinunana caniac, Umanayen coma kenca; dica agsaon caniac iti daytoy a panggep.

²⁷ Sumang-atca iti tapaw ti Pisga, ket itangadmo dagiti matam iti laud, ken iti amianan, ken iti abagatan ken iti daya, ket kitaem cadagita matam: ta dicanto lasaten daytoy Jordan.

²⁸ Ngem ibilinmo ken Josue, ket paing-elem, ken papigsaem: ta isu ti mapanto iti sangoanan daytoy nga ili, ket isu ti mangpatawidto cadacuada ti daga a makitamto.

²⁹ Iti casta nagnaedtayo iti lobong a sango ti Beth-pehor.