Deuteronomio 27 - Ti Biblia (1973)

Rebbengna a maimaldit sadiay Ebal ti linteg. Rebbengna a dagiti lunlunod maibalicasda sadi Ebal.

¹ Ket ni Moises ken dagiti lallacay ti Israel imbilinda iti ili a kinunada, Salimetmetanyo amin a bilin nga ibilinco cadacayo itoy nga aldaw.

² Ket maaramidto nga iti aldaw a ilalasatyo iti Jordan agingga iti daga a ni Jehova a Diosmo itedna kenca, ipatacdermonto a maipaay kenca iti dadackel a batbato, ket paletadaamto iti masa;

³ Ket isuratmonto iti rabawda ti dagup dagiti sasao daytoy a linteg no macalasatca: tapno macastrecca iti daga a ni Jehova a Diosmo itedna kenca, daga nga agay-ayus iti gatas ken diro, cas incari kenca ni Jehova a Dios dagiti ammam.

⁴ Ket maaramidto a no macalasatcayo iti Jordan mamangoncayto cadagidiay a batbato nga ibilinco cadacayo itoy nga aldaw, idiay bantay Ebal, ket paletadaamto ida iti masa.

⁵ Ket idiay mamangoncanto iti maysa nga altar ken Jehova a Diosmo, maysa nga altar a batbato; dicanto parabaw ti alicamen a landoc cadacuada.

⁶ Bangonemto ti altar ni Jehova a Diosmo cadagiti batbato a saan a natagaan; ket iti rabawna mangipaaycanto cadagiti datdaton a mapuuran ken Jehova a Diosmo.

⁷ Ket mangidatagcanto cadagiti datdaton ti cappia, ket mangancanto idiay; ket agrag-ocanto iti sango ni Jehova a Diosmo.

⁸ Ket isuratmonto iti nalawag unay iti rabaw dagiti batbato dagiti amin a sasao daytoy a linteg.

⁹ Ket ni Moises ken dagiti papadi a Levitas sinaoda iti dagup ti Israel, a kinunada, Agulimeccayo, ket imdenganyo, O Israel: Itoy nga aldaw nagbalincan nga ili ni Jehova a Diosmo.

¹⁰ Iti casta agtulnogcanto iti timec ni Jehova a Diosmo, ken tungpalenyonto dagiti bilbilinna ken linlintegna nga ibilinco kenca iti daytoy nga aldaw.

¹¹ Ket ni Moises imbagana iti umili iti dayta met la nga aldaw, a kinunana,

¹² Dagitoy ti agyanto iti rabaw ti bantay Gerizim, tapno bendicionanda ti umili, apaman a macalasatcayo iti Jordan: da Simeon ken Levi, Juda, Isacar, Jose, ken Benjamin.

¹³ Ket dagitoy ti agyanto iti rabaw ti bantay Ebal tapno mangilunod; da Ruben, Gad, ken Aser, Zabulon, Dan, ken Neftali.

¹⁴ Ket dagiti Levitas sumungbatdanto, ket cunadanto cadagiti amin a tattao ti Israel iti natbag a timec,

¹⁵ Mailunod ti tao nga agaramid ti ladawan a kinitikitan wenno sinocog, a maysa a macarimon ken Jehova, a gapuanan dagiti ima ti agar-aramid, ket pagtacderenna iti nalmeng. Ket amin a tattao sumungbatdanto ket cunadanto, Sapay coma.

¹⁶ Mailunod ti di-mangipateg iti amana ken inana. Ket amin a tattao cunadanto, Sapay coma.

¹⁷ Mailunod ti mangyalis iti dulon ti daga ti padana a tao. Ket amin a tattao cunadanto, Sapay coma.

¹⁸ Mailunod ti mangyaw-awan iti bulsec iti dalan. Ket amin a tattao cunadanto, Sapay coma.

¹⁹ Mailunod ti mangipakillo iti calintegan ti gangannaet, ti ulila, ken ti balo a babai. Ket amin a tattao cunadanto, Sapay coma.

²⁰ Mailunod ti makicaidda iti asawa ni amana, gapu ta linucaisanna ti cawes ni amana. Ket amin a tattao cunadanto, Sapay coma.

²¹ Mailunod ti makicaidda iti uray ania a kita ti animal. Ket amin a tattao cunadanto, Sapay coma.

²² Mailunod ti makicaidda iti cabsatna a babai, nga anac ni amana, wenno anac ni inana. Ket amin a tattao cunadanto, Sapay coma.

²³ Mailunod ti makicaidda iti catuganganna a babai. Ket ti amin a tattao cunadanto, Sapay coma.

²⁴ Mailunod ti manglipot iti padana a tao. Ket amin a tattao cunadanto, Sapay coma.

²⁵ Mailunod ti umawat iti tangdan ti pammapatay iti maysa a tao nga awan basolna. Ket amin a tattao cunadanto, Sapay coma.

²⁶ Mailunod ti di umannugut cadagiti sasao daytoy a linteg tapno sungpoten ida. Ket amin a tattao cunadanto, Sapay coma.