Deuteronomio 26 - Ti Biblia (1973)

Ti pannacaidaton dagiti umuna a bungbunga. Dagiti apagcapulo ti maicatlo a tawen. Ti maudi a pammagbaga.

¹ Ket maaramidto a no macastrecca iti daga a ni Jehova a Diosmo itedna kenca a maysa a tawid ken pagtagicuaam, ket agnaedcanto sadiay.

² Mangalacanto iti umuna cadagiti amin a bunga ti daga nga igapumto iti dagam a ni Jehova a Diosmo itedna kenca; ket icabilmonto iti labba, ket incanto iti disso a ni Jehova a Diosmo piliennanto, tapno itaengna sadiay ti naganna.

³ Dumanoncanto iti yan ti padi nga addanto cadagidiay nga al-aldaw, ket cunamto kencuana, Ipudnoc itoy nga aldaw ken Jehova a Diosmo, a nacaumayac iti daga a ni Jehova insapatana cadagiti ammatayo nga ited cadatayo.

⁴ Ket ti padi awatennanto ti labba iti imam, ket idissonanto iti sango ti altar ni Jehova a Diosmo.

⁵ Ket sumungbatcanto, ket cunamto iti sango ni Jehova a Diosmo, Maysa a taga Siria a nganngani matay isu idi ni amac; ket simmalog a napan iti Egipto, ket nagnaed idiay, bassit iti bilang; ket nagbalin a maysa a nacion sadiay, dackel, mannacabalin ken adu a tattao.

⁶ Ket dagiti taga Egipto inaramidda cadatayo ti dakes, ket pinarigatdatayo, ket incabilda cadatayo ti nabantot a pannacaadipen:

⁷ Ket immawagtayo ken Jehova a Dios dagiti ammatayo, ket ni Jehova dinengngegna ti timectayo, ket nakitana ti leddaangtayo, ken panagbannogtayo, ken pannacaparigattayo;

⁸ Ket iti maysa nga ima a mannacabalin ken tackiag a sinuunnat, ken dackel a nacakigkigtot, ken dagiti pagilaslasinan, ken dagiti nacascasdaaw ti pinangaon ni Jehova cadatayo sadi Egipto;

⁹ Ket inyegnatayo ditoy a lugar, ket intedna cadatayo daytoy a daga, a maysa a daga nga agayus ti gatas ken diro.

¹⁰ Ket ita, adtoy, inyegco ti umuna a bunga ti daga a sica, O Jehova, intedmo caniac. Ket sica idissomto iti sango ni Jehova a Diosmo, ket agdaydayawca iti sango ni Jehova a Diosmo:

¹¹ Ket sica agragsaccanto iti isu-amin nga imbag a ni Jehova a Diosmo intedna kenca, ken iti balaymo, sica ken ti Levita, ken ti gangannaet nga adda iti tengngam.

¹² No maungpotmo nga ilasin ti amin nga apagcapullo ti apit iti maicatlo a tawen, isu a tawen ti panamagcapullo, itedmonto ngarud iti Levita, iti gangannaet, iti ulila ken iti balo a babai, tapno manganda iti uneg dagiti ruruanganmo, ket agpennecda.

¹³ Ket sica cunamto ken Jehova a Diosmo. Ingapuc idiay balayco dagiti banbanag a napasanto, ket intedco met ida iti Levita, ken iti gangannaet, ken iti ulila ken iti balo a babai, cas mayannurot iti amin a bilinmo, isu nga imbilinmo caniac: diac sinalungasing iti uray ania cadagiti bilbilinmo, diac met nalipatan ida:

¹⁴ Saanac a nangan iti dayta bayat ti panagpanesco, diac met nangiccat iti dayta sidadakes, wenno nangtedac iti dayta a maipaay iti natay: impangagco ti timec ni Jehova a Diosco; inaramidco ti mayannurot iti amin nga imbilinmo caniac.

¹⁵ Tumannawagca manipud iti naedmo a nasantoan, manipud sadi langit, ket bendicionam ti ilim nga Israel, ken ti daga nga intedmo cadacami, cas insapatam cadagiti ammami, maysa a daga nga agay-ayus ti gatas ken diro.

¹⁶ Itoy nga aldaw ni Jehova a Diosmo ibilinna kenca tapno aramidem dagitoy nga alagaden ken linlinteg: salimetmetamto ngarud ket aramidemto ida iti isu-amin a pusom, ken iti isu-amin a cararuam.

¹⁷ Sica pinanecnecan ni Jehova itoy nga aldaw nga isu ti Diosmo, ken magnacanto cadagiti dalanna, ken salimetmetamto dagiti al-alagadenna, ken dagiti bilbilinna ken dagiti linlintegna, ken ipangagmonto ti timecna:

¹⁸ Ket ni Jehova pinanecnecannaca itoy nga aldaw a maysa nga ili a cucuana a naisingayan, cas incarina kenca, ken tapno salimetmetam amin a bilbilinna;

¹⁹ Ken tapno aramidennaca a naipadpaduma cadagiti isu-amin a nacion nga inaramidna, iti dayaw, iti nagan, ken iti tan-oc; ken tapno maysaca a nasantoan nga ili ken Jehova a Diosmo, cas sinaona.