Deuteronomio 25 - Ti Biblia (1973)

Ti linteg maipapan iti panamaganac iti balo a babai a pannacabiang ti natay nga asawana. Sabsabali pay a linlinteg. Madadaelto ti Amalec.

¹ No addanto susic cadagiti tattao, ket umamangda iti pangocoman, ket dagiti oc-ocom ocomenda ida; panecnecandanto ngarud ti nalinteg, ket dusaendanto ti dakes;

² Ket maaramidto a no ti dakes a tao maicari a mabaot, ti ocom paipasagnanto ket pabaotnanto a bilangen iti sangona, cas mayannatup iti kinadakesna.

³ Uppat a pulo a saplit mabalinna nga ited kencuana, dinanto surocan: di la ket ta no malabsannanto, ket baotenna iti ad-adu ngem dagitoy iti adu a saplit, iti casta maibilang ti cabsatmo a nacas-ang kenca.

⁴ Dicanto bosbosalan ti vaca no agiric iti naapit.

⁵ No agcacanaed dagiti agcacabsat a lallaki, ket matay ti maysa cadacuada, ket awan ti anacna a lalaki, ti asawa ti natay saanto a makiasawa iti familia a sabali: ti cabsat ni asawana sumrecto kencuana, ket alaennanto nga asawa, ket aramidennanto kencuana ti annong ti maysa a cabsat ti asawa a lalaki.

⁶ Ket maaramidto a ti inauna a lalaki nga ipasngayna, sumononto iti nagan daydi cabsatna a natay, tapno di mapucaw ti naganna iti Israel.

⁷ No ti lalaki dina cayat nga alaen ti asawa daydi cabsatna, ti asawa daydi cabsatna ngarud dumanonto iti ruangan cadagiti lallacay ket cunananto, Ti cabsat ni asawac paglisianna a bangonen a maipaay ken cabsatna ti maysa a nagan iti Israel; dina cayat nga aramiden caniac ti annong ti maysa a cabsat ti asawa a lalaki.

⁸ Iti casta dagiti lallacay ti ilina ayabandanto ti lalaki, ket casaodanto: ket no isu tumacder, ket cunana, Diac cayat nga alaen ti babai;

⁹ Iti casta ti asawa daydi cabsatna umayto kencuana iti sango dagiti lallacay ket suctoennanto ti sapatos iti saca ni cayongna, ket tupraanna iti rupana; ket ti babai sumungbatto ket cunananto, Casta ti maaramidto iti lalaki a dina bangonen ti balay ti cabsatna.

¹⁰ Ket iti Israel, maigaladto a naganna, Ti balay ni naucsot ti sapatosna.

¹¹ No dagiti lallaki agcacabilda, ket ti asawa ti maysa umasideg a mangicanawa ken asawana iti ima ti mangcabil kencuana, ket igammatna ti imana, ket punggusenna ti bagi nga ibainna;

¹² Putdemto ngarud ti ima ti babai, ti matam dinanto caasian.

¹³ Awanto iti suputmo ti agduduma a titimbengan, maysa a dackel ken maysa a bassit.

¹⁴ Awanto iti balaymo ti agduduma a sucatan, maysa a dackel ken maysa a bassit.

¹⁵ Maysa nga apagtutop ken nalinteg a timbengan ti addanto kenca; maysa nga apagtutop ken nalinteg a sucatan ti addanto kenca; tapno dagiti al-aldawmo atiddugda iti daga a ni Jehova a Diosmo itedna kenca.

¹⁶ Ta amin dagiti agaramid iti cacasta, amin met laeng nga agaramid iti nakillo, macarimonda ken Jehova a Diosmo.

¹⁷ Laglagipem ti inaramid kenca ti Amalec iti dalan idi naggapucayo sadi Egipto;

¹⁸ No casano ti isasabatna kenca iti dalan, ken pinangsugatna iti udim, amin dagiti nacapuy idi iti licudam, idi a napacsuyan ken sibabannogca; ket isu saan a nagbuteng iti Dios.

¹⁹ Isu ti gapuna a maaramidto, a no ni Jehova a Diosmo maitedna kenca ti inana cadagiti amin a cabusormo nga aglawlaw, iti daga a ni Jehova a Diosmo itedna kenca a tawid a pagtagicuaam, punasemto ti pacalaglagipan ti Amalec iti babaen ti langit; saanmonto a liplipatan.