Deuteronomio 24 - Ti Biblia (1973)

Linlinteg a maipapan iti panagsina dagiti agaassawa; cadagiti maipautang, tangtangdan, panangapit.

¹ No ti maysa a lalaki mangala iti maysa a babai ket asawaenna, maaramidto ngarud a no ti babai dina masaracan ti parabur cadagiti mata ni lalaki, gapu ta ti lalaki nasaracanna kencuana ti maysa nga aramid a di-tumutop, isuratannanto ti pacdaar ti panagsina ket ipaiggennanto iti imana, ket papanawennanto iti balayna.

² Ket no ti babai napapanaw iti balay ni lalaki, mabalinna ti mapan makiasawa iti sabali a lalaki.

³ Ket no ti naudi a nangasawa gumura kencuana, ket isuratanna ti pacdaar ti panagsina, ket ipaiggenna iti imana, ket papanawenna iti balayna; wenno no ti naudi a nangasawa matay, isu a nangala kencuana tapno asawaenna;

⁴ Daydi immuna nga asawana isu a namapanaw kencuana, dina mabalin a sublian nga alaen, tapno asawaenna, calpasan ti pannacamulitna; ta dayta ti kinarimon iti sango ni Jehova; ket dicanto pagbasolen ti daga nga ni Jehova a Diosmo itdena kenca a tawiden.

⁵ No ti maysa a lalaki caas-asawa na dinto mapan agsoldado, castamet a saanto a maican iti annongen nga uray ania: agwayawayanto iti balay iti maysa a tawen ket ragragsakennanto ti asawana nga innalana.

⁶ Awanto ti tao a mangala a salda iti gilingan, wenno iti akinngato a bato ti gilingan: ta isu alaenna a salda ti pagbiag ti maysa a tao.

⁷ No ti maysa a tao masalamaan nga agtacaw iti siasino cadagiti cacabsatna nga annac ti Israel ket aramidenna a cas maysa nga adipen, wenno ilacona: dayta a nagtacaw matayto ngarud: casta ti panangiccatmonto ti dakes iti tengngam.

⁸ Annadam no adda sakit a cucutel nga agawaan a tungpalen ken aramiden ti mayannurot iti isu-amin nga isuro cadacayo dagiti papadi a Levitas: ti cas imbilinco cadacuada, isu ti tungpalenyonto nga aramiden.

⁹ Laglagipenyo ti inaramid ni Jehova a Diosmo ken Miriam iti dalan idi a naggapucayo sadi Egipto.

¹⁰ No ipabolodmo iti padam a tao ti uray ania nga ipautang, dicanto sumrec iti balayna a mangala iti isaldana.

¹¹ Agyancanto iti ruar, ket ti tao a pautangam yegnanto iti ruar ti maisalda kenca.

¹² Ket no isu napanglaw a tao, dicanto maturog a siaadda kenca ti insaldana;

¹³ Di agcurang nga isublimto kencuana ti insaldana no lumnec ti init, tapno maiturogna ti cawesna, ket bendicionannaca: ket daytoy isunto ti kinalinteg kenca iti sango ni Jehova a Diosmo.

¹⁴ Dicanto parigaten ti maysa a mangmangged, nga napanglaw ken macasapol, uray cadagiti cacabsatmo, wenno cadagiti gangannaet nga adda iti dagam nga uneg dagiti ruruanganmo:

¹⁵ Iti aldawna itedmonto ti tangdanna, a dinto malnecan ti init; (ta isu napanglaw, ket isadagna ti pusona iti dayta); di la ket ta umawag ken Jehova iti maicaniwas kenca, ket maysanto a basol kenca.

¹⁶ Dagiti amma didanto mapapatay gapu cadagiti annac, wenno dagiti annac didanto mapapatay gapu cadagiti amma: tunggal tao mapapatayto gapu iti basolna met laeng.

¹⁷ Dicanto pakilloen ti calintegan a carbengan ti gangannaet, wenno iti ulila, wenno awaten a saldaen ti pagan-anay ti balo a babai;

¹⁸ Ngem laglagipemto a maysaca idi nga adipen idiay Egipto ket ni Jehova a Diosmo sinubbotnaca sadiay: isu ti gapuna nga ibilinco kenca nga aramidem daytoy a banag.

¹⁹ Intono aniem ti apitmo iti talonmo, ket nalipatam ti maysa a bettec iti talonmo, dicanto sublian nga alaen: daytoy maipaayto iti gangannaet, iti ulila, ken iti balo a babai; tapno ni Jehova a Diosmo bendicionannaca iti amin nga aramid dagiti imam.

²⁰ Intono aprasem ti cayom nga oliva dicanto sublien a pendaen dagiti sangsanga: maipaayto iti gangannaet, iti ulila ken iti balo a babai.

²¹ Intono burasem dagiti uvas iti cauvasam, dicanto adasen: bagiento ti gangannaet, ti ulila, ken ti balo a babai.

²² Ket laglagipemto a maysaca nga adipen idi iti daga nga Egipto: isu ti gapuna nga ibilinco kenca nga aramidem daytoy a banag.