Deuteronomio 20 - Ti Biblia (1973)

Ti pannacalacsid iti kinasoldado. Al-alagaden iti gubat.

¹ No inca makigubat cadagiti cabusormo, ket makitam dagiti cabcabayo ken luglugan, ken maysa nga ili nga ad-adu ngem sica, dicanto agbuteng cadacuada; ta ni Jehova a Diosmo siaadda kenca, isu a nangaon kenca iti daga nga Egipto.

² Ket castoyto, no dandanicayo makigubat, ti padi umasidegto, ket cunananto iti umili,

³ Ket saoennanto cadacuada, Denggem, O Israel, ita nga aldaw dandanicayo makigubat cadagiti cabusoryo: saan coma a cumapoy ti pusoyo; dicayo agbuteng, dicayo agpigerger, wenno makigtot cadacuada;

⁴ Ta ni Jehova a Diosyo isu ti cumuyog cadacayo, a Makibacal a catulongyo cadagiti cabusoryo tapno ispalennacayo.

⁵ Ket dagiti agtuturay saoendanto iti ili a cunada, Asino daydiay a tao a namangon iti baro a balay a dina insibbo? Mapan coma agsubli iti balayna, di la ket ta matay iti gubat, ket sabali a tao ti mangisibbo.

⁶ Ket asino ti tao a nagmula iti cauvasan a dina lac-amen ti bungana? Mapan coma agsubli iti balayna, di la ket ta matay iti gubat, ket sabali a tao ti aglac-am iti bungana.

⁷ Ket asino a lalaki ti makitulag iti asawaenna, ket dina pay la inasawa? Mapan coma agsubli iti balayna, di la ket ta matay iti gubat, ket sabali a lalaki ti mangasawa.

⁸ Ket dagiti agtuturay inayondanto manen a saoen iti umili, ket cunadanto, Asino a lalaki nga addaan buteng, ken nacapuy ti pusona? Mapan coma agsubli iti balayna, di la ket ta ti puso dagiti cacabsatna marunaw cas ti pusona.

⁹ Ket castoyto no dagiti agtuturay nagibusandanton ti panagsaoda iti umili, bangonendanto dagiti capcapitan dagiti buybuyot nga akin-una cadagiti tattao.

¹⁰ No macaadanica iti maysa nga ili tapno gubatem, iwarragawagmonto ti cappia kencuana.

¹¹ Ket castoyto no isungbatna kenca ti cappia, ket luctannaca, maaramidto nga amin a tattao a masaracan idiay agbuisdanto kenca, ket agservidanto kenca.

¹² Ket no dinto makicappia kenca, ngem makigubat kenca, lacubemto ngarud:

¹³ Ket no ni Jehova a Diosmo yawatnanto ita imam, dadaelemto amin a lallaki idiay iti tadem ti campilan:

¹⁴ Ngem dagiti babbai ken dagiti ubbing, ken dagiti an-animal, ken amin nga adda iti ili, uray amin a samsam, kencuana alicumcumento a samsammo; ket canemto ti nasamsam cadagiti cabusormo, a ni Jehova a Diosmo intedna kenca.

¹⁵ Castoy ti aramidemto cadagiti amin nga il-ili nga adda iti adayu unay kenca, a saan a canayon dagiti il-ili dagitoy a nasnacion.

¹⁶ Ngem cadagiti il-ili dagitoy a tattao a ni Jehova a Diosmo intedna kenca a tawid, awanto ti biagem nga uray ania nga umanges:

¹⁷ Ngem talipupusemto a dadaelen ida: ti Heteo, ken ti Amorreo, ti Cananeo, ken ti Perezeo, ken ti Heveo, ken ti Jebuseo; cas ni Jehova a Diosmo imbilinna kenca;

¹⁸ Tapno didacayo isuro a tumulad cadagiti kinarimonda, isu nga inaramidda cadagiti didiosda; iti casta macabasolcayto iti maicaniwas ken Jehova a Diosyo.

¹⁹ No lacubemto ti maysa nga ili iti mabayag nga al-aldaw iti pannakigubatmo kencuana tapno maalam, dicanto dadaelen iti wasay dagiti caycayona ta mabalinmo a pagbiag dagita, ket dicanto pucpucanen ida, ta tao aya ti cayo iti talon tapno lacubem coma?

²⁰ Dagiti laeng caycayo, nga ammom a saanda a caycayo a taraon, ti dadaelemto ken pucanem; ket bangonemto a sarikedked a maibusor iti ili a makigubat kenca inggana iti di-maparmec.