Deuteronomio 2 - Ti Biblia (1973)

Ti panagbariw-as nanipud iti Cades inggana iti Zared. Ti pannacalasat ti Ar ken ti Arnon. Ti pannacaparmec ti Hesbon.

¹ Idi ngarud pimmanawtayo, ket linasattayo a nagnaan ti let-ang nga agpa-Baybay a Nalabaga, cas imbaga ni Jehova caniac; ket linawlawtayo ti bantay Seir, cadagiti adu nga al-aldaw.

² Ket ni Jehova nakisao caniac, a kinunana,

³ Nilawlawyo daytoy a bantay iti umdas a cabayag: agpaamianancayo.

⁴ Ket ibilinmo cadagiti tattao a cunam, Masapul nga sumreccayo iti beddeng dagiti cacabsatyo nga annac ni Esau, nga agnaed idiay Seir; ket isuda agbutengdanto cadacayo: gapuna nga annadanyo a naimbag ti bagbagiyo;

⁵ Dicay makicabcabil cadacuada, tangay diacto met mangted cadacayo iti dagada, saan, saan, uray la no ti pagdissoan ti dapan ti saca: ta intedco ti bantay a Seir ken Esau a pagtagicuaanna.

⁶ Igatangyonto ti pirac iti taraon cadacuada tapno mangancayo: ket igatangyonto met ti pirac iti danum tapno uminumcayo.

⁷ Ta ni Jehova a Diosmo bendicionannaca iti isu-amin nga aramiden ti imam; naammoanna ti pannagnam a nagbaliasat iti daytoy dackel a tay-ac: cadagitoy uppat a pulo a tawen, ni Jehova a Diosmo siaadda idi kenca; sica awan nagcurangam.

⁸ Iti casta linabsantayo ti ayan dagiti cacabsattayo nga annac ni Esau, nga agnaed idiay Seir, manipud idi dalan ti Araba, ti Elat, ken ti Esiongeber. Ket nagbaw-ingtayo ket naglasattayo iti dalan ti let-ang ti Moab.

⁹ Ket ni Jehova kinunana caniac, Dica gargarien ni Moab, dica carupac ida iti gubat; ta diacto mangted kenca iti dagana a tagicuaem, ta intedcon ti Ar cadagiti annac ni Lot, a tagicuaenda.

¹⁰ (Dagiti Emimeos nagnaedda idiay idi cua, tattao a dadackel ken aduda, ken natayagda cas cadagiti Anaceos:

¹¹ Dagitoy met ti naibilang a Refaimeos, cas cadagiti Anaceos; ngem dagiti Moabitas naganenda ida nga Emimeos.

¹² Dagiti Horeos casta met a nagnaedda iti Seir idi unana a tiempo, ngem dagiti annac ni Esau ti simmuno cadacuada; ket dinadaelda ida iti sangoda, ket nagnaedda iti lugarda; cas ti inaramid ti Israel iti daga a pagtagicuaanna mga inted ni Jehova cadacuada.)

¹³ Ita tumacdercayo ket lasatenyo ti waig a Zered. Ket nagbaliwtayo iti waig a Zered.

¹⁴ Ket dagiti aldaw a panaggaputayo iti Cades-barnea agingga iti panagbaliwtayo iti waig a Zered tallopulo ket walo a tawen; inggana iti di-naibus ti dagup ti caputotan dagiti tattao ti gubat iti tengnga ti pacarso, cas insapata ni Jehova cadacuada.

¹⁵ Maysa pay, ti ima ni Jehova maibusor idi cadacuada, a mangdadael cadacuada iti tengnga ti pacarso inggana iti dida naibus.

¹⁶ Iti casta naaramid, nga idi amin dagiti tattao ti gubat naibusda, ket nataydan iti nagtengngaan dagiti tattao,

¹⁷ A ni Jehova nakisao caniac, a kinunana,

¹⁸ Masapul a lumasatca itoy nga aldaw iti Ar a beddeng ti Moab:

¹⁹ Ket no macadanonca iti asideg a sangoanan dagiti annac ni Ammon, dica carcariten ida, dica met makirupac cadacuada: ta diacto mangted kenca iti daga dagiti annac ni Ammon a tagicuaem; ta intedco dayta cadagiti annac ni Lot a tagicuaenda.

²⁰ (Isu a naibilang met a daga ti Refaim: ti Refaim nagnaed idiay idi unana nga al-aldaw; ngem dagiti Ammonitas naganenda ida iti Zomzommeos,

²¹ Tattaoda a dadackel, ket aduda, ken natayagda a cas cadagiti Anaceos; ngem ni Jehova, dinadaelna ida iti sangoda; ket sinucatanda ida, ket nagnaedda iti lugarda;

²² Cas ni Jehova inaramidna a maipaay cadagiti annac ni Esau nga agnaed idiay Seir idi panangdadaelna cadagiti Horeos iti sangoananda; ket sinucatanda ida ket nagnaedda iti lugarda agpapan itoy nga aldaw.

²³ Ket dagiti Heveos a nagnaed cadagiti il-ili agingga iti Gaza, dagiti Caftoreos a nagtaud iti Caftor, dinadaelda ida ket nagnaedda iti lugarda.)

²⁴ Tumacdercayo, irubbuatyo ti panagnagnayo ket lasatenyo ti lobong ti Arnon: adtoy, inyawatco iti imam ni Sehon nga Amorreo, ari ti Hesbon, ken ti dagana; irugim ti panagtagicuaum, ket makicabilca kencuana iti pagbabacalan.

²⁵ Ita nga aldaw rugiacto ti mangicabil cadagiti tattao nga adda iti babaen ti isu-amin a langit a macangngeg iti damagmo, ti panagamac kenca, ken panagbuteng kenca, ket mamayegpegdanto, ken matuocandanto maipuon kenca.

²⁶ Ket pinalubosac nanipud iti let-ang ti Cademot ken Seon nga ari ti Hesbon, dagiti babaonen a mangipadamag iti talna, a kinunada,

²⁷ Ipalubosmo coma nga lasatec ti dagam: surotecto a pagnaan ti napatac a dalan, diacto sumiasi iti macanawan wenno iti macatigid.

²⁸ Ilacomto caniac ti taraon iti pirac tapno manganac; ket iccannacto ti danum gapu iti pirac, tapno uminumac: ipalubosmo la coma caniac nga aglasat dagiti sacsacac:

²⁹ Cas inaramid caniac dagiti annac ni Esau nga agnaed idiay Seir, ken dagiti Moabitas nga agnaed iti Ar; agpapan lumasatacto iti Jordan agingga iti daga a ni Jehova a Diostayo itedna cadatayo.

³⁰ Ngem ni Sehon nga ari ti Hesbon, dina impalubos a limmasattayo; ta ni Jehova a Diosmo pinatangkenna ti espirituna, ket pinatibkerna ti pusona; tapno yawatna ita imam a cas itoy nga aldaw.

³¹ Ket ni Jehova kinunana caniac, Kitaem, ta rinugiac nga iyawat ni Sehon ken ti dagana iti sangom: rugiam a tagicuaen, tapno mabalinmo a tawiden ti dagana.

³² Ni Sehon ngarud immay a bimmusor cadatayo, isu ken amin a tattaona a makibacal idiay Jaas.

³³ Ket ni Jehova a Diostayo inyawatna iti sangotayo; ket kinabiltayo agraman dagiti annacna ken amin a tattaona.

³⁴ Ket innalatayo amin dagiti il-ilina iti daydi a tiempo, ket dinupractayo a intalipupus ti tunggal ili nga adda agnaed, agraman babbai ken ub-ubbing; awan binay-antayo a natda:

³⁵ Isuna laeng dagiti an-animal ti innalatayo a samsam a maipaay cadatayo met laeng agraman ti samsam cadagiti il-ili nga innalatayo.

³⁶ Nanipud Aroer nga adda iti igid ti lobong ti Arnon, ken nanipud iti ili nga adda iti lobong, agingga iti Galaad met laeng, awan ti maysa nga ili a nabilbileg ngem cadatayo; ni Jehova a Diostayo inyawatna amin iti sangotayo:

³⁷ Isuna laeng iti daga dagiti annac ni Ammon, dicayo immasideg; amin ti bangir ti carayan nga Jaboc, ken dagiti il-ili ti caturodan, ken sadinoman nga imparit cadatayo ni Jehova a Diostayo.