Deuteronomio 18 - Ti Biblia (1973)

Dagiti bagi dagiti Levitas. Maiparit ti panagipadles. Ti pudno a mammadto. Ti naulbod a mammadto.

¹ Dagiti papadi a Levitas, nga amin met laeng a caputotan ni Levi, awanto ti bagida wenno didanto makipagtawid iti Israel: isuda canendanto dagiti datdaton a maaramid iti apuy, ken Jehova ken ti tawidna.

² Ket isuda awanto ti tawidda cadagiti cacabsatda: ni Jehova ti tawidenda, cas sinaona cadacuada.

³ Ket daytoy isunto ti utang nga ited dagiti tattao, cadagiti papadi dagiti mangidaton iti sacrificio, vaca man wenno carnero, iteddanto iti padi ti abaga, ken dagiti dua a pingping, ken ti bitoca.

⁴ Dagiti umuna a bungbunga ti bukelmo, ti baro nga aracmo, ken ti lanam, ken ti umuna a dutdutdut ti carnerom, itedmonto kencuana.

⁵ Ta ni Jehova a Diosmo pinilina cadagiti amin a capcaputotam, nga agsaad tapno agannong iti nagan ni Jehova, isu ken dagiti annacna a lallaki iti agnanayon.

⁶ Ket no maysa a Levita aggapu iti maysa cadagiti ruruanganmo a pagnaedan, iti amin ti Israel ket umay a sicacalicagum ti cararuana iti disso a ni Jehova piliennanto;

⁷ Agannongto ngarud iti nagan ni Jehova a Diosna, cas aramiden amin a cacabsatna a Levitas nga agyan sadiay iti sango ni Jehova.

⁸ Isuda addanto maipada nga apagda a canen, sabali pay ti aggapu iti pacalacoan ti sigud a cucuana.

⁹ No macadanonca iti daga a ited ni Jehova a Diosmo kenca, dicanto sursuroen nga aramiden ti cas cadagiti kinarimon dagidiay a nasnacion.

¹⁰ Awanto ti masaracan kenca, uray maysa, nga agpalasat iti anacna a lalaki wenno iti anacna a babai iti apuy, a maysa a mangaramat iti panagpadpadles, a maysa a mammuyon, wenno maysa nga manangsalamangca, wenno managanito,

¹¹ Wenno maysa a managilabeg, wenno mannakiuman cadagiti mangcuculam, wenno maysa nga asuang, wenno maysa nga adda carcaradingna.

¹² Ta siasinoman a mangaramid cadagitoy isu ti macarimon ken Jehova: ket gapu cadagitoy a kinarimon, ni Jehova a Diosmo pagtalawenna ida iti sangoanam.

¹³ Sica napalungdocanto ken Jehova a Diosmo.

¹⁴ Cadagitoy a nasnacion a pasiaemto, umimdengda cadagiti mammuyon, ken dagiti agpadpadles; ngem iti maipapan kenca, ni Jehova a Diosmo saanna nga impalubos kenca tapno aramidem ti casta.

¹⁵ Ni Jehova a Diosmo mamangonto kenca iti maysa a mammadto nga aggapu iti nagtengngaam, cadagiti cacabsatmo, cas caniac; isu ti ipangagyonto;

¹⁶ Cas mayannurot iti amin a kinalicagumam ken Jehova a Diosmo idiay Horeb iti aldaw ti pannacagimgimong, a kinunam, Diac coma mangngeganen ti timec ni Jehova a Diosco, wenno diac coma makitan daytoy dackel nga apuy, tapno diac coma matay.

¹⁷ Ket ni Jehova kinunana caniac, Naimbag ti panangisaoda iti insawangda.

¹⁸ Mamangonacto cadacuada iti mammadto nga aggapu cadagiti cacabsatda, a cas kenca; ket icabilconto dagiti sasaoc iti ngiwatna, ket saoennanto cadacuada amin ti ibilinconto kencuana.

¹⁹ Ket maaramidto, nga ti siasinoman a dinto mangipangag cadagiti sasaoc a saoennanto iti naganco, isingirconto iti daydiay.

²⁰ Ngem ti mammadto, a mangyebcasto iti sao a sicucuspag iti naganco, a diac imbilin kencuana a saoenna, wenno saoennanto iti nagan dagiti sabsabali a didios, dayta met la a mammadto matayto.

²¹ Ket no saoem iti pusom, Casano ti panangammominto iti sao a di-imbaga ni Jehova?

²² No ti mammadto agsao iti nagan ni Jehova, no ti banag saan a sumaruno, wenno di-maaramid dayta ti banag a ni Jehova saanna nga imbaga: ti mammadto sinaona dayta a sicucuspag, dicanto agbuteng kencuana.