Deuteronomio 17 - Ti Biblia (1973)

Ti nadalus a panagdayaw. Ti panangocom cadagiti naricut a panggep. Bilbilin maipanggep cadagiti ar-ari.

¹ Dicanto mangipaay ken Jehova a Diosmo ti vaca wenno carnero nga adda pilawna, wenno uray ania a dakes; ta dayta ti macarimon ken Jehova a Diosmo.

² No addanto matumpungan iti tengngam iti uneg iti uray ania cadagiti ruruanganmo nga ni Jehova a Diosmo itedna kenca, lalaki wenno babai, a mangaramid iti dakes iti sango ni Jehova a Diosmo, iti panagsalungasing iti tulagna,

³ Ket napan ket nagservi cadagiti sabali a didios, ket nagdaydayaw cadacuada, wenno iti init, wenno iti bulan, wenno iti uray ania a buyot ti langit, isu nga diac imbilin kenca;

⁴ Ket maibaga kenca, ken mangngegam, malutmotemto ngarud a naimbag; ket, adtoy, no pudno, ket nalawlawagan, a dayta a macarurud maaramid iti Israel.

⁵ Iti casta alaemto dayta a lalaki wenno dayta a babai, a nangaramid iti daytoy dakes a banag cadagiti ruruanganmo, agpada ti lalaki wenno ti babai; ket sica uburemto ida tapno matayda iti batbato.

⁶ Iti panagsao dagiti dua a macasacsi, wenno dagiti tallo a macasacsi, ti maicari a matay mapapatayto; iti panagsao ti maymaysa a sacsi saanto a mapapatay.

⁷ Ti ima dagiti macasacsi isunto ti umuna nga agdisso kencuana a mangpatay; santo ti ima ti dagup ti umili, Casta ti panangiccatmo iti dakes iti tengngam.

⁸ No rumsua a naricut unay kenca iti panangeddeng ti maysa a panggep iti nagtengngaan ti dara ken dara, iti nagtengngaan ti subang ken subang, ken iti nagtengngaan ti cabil ken cabil, a pagtandan ti susic iti uneg dagiti ruruanganmo; tumacdercanto ngarud, ket mapancanto iti disso a ni Jehova a Diosmo piliennanto;

⁹ Ket pumarangcanto cadagiti papadi a Levitas, ken iti ocom nga addanto cadagidiay nga al-aldaw: ket agintuudcanto; ket isuda ipamatmatdanto kenca ti maipato iti panangocom.

¹⁰ Ket aramidemto ti mayannurot iti naikeddeng nga ipamatmatdanto kenca, manipud iti disso a ni Jehova piliennanto; ket tungpalemto nga aramiden ti mayannurot iti amin nga isurodanto kenca:

¹¹ Iti mayannurot iti linteg nga isurodanto kenca, ken mayannurot iti panangocom nga ibagadanto kenca, sica aramidemto; dicanto lumabsing iti naikeddeng nga isurodanto kenca iti macanawan wenno iti macatigid.

¹² Ket ti tao nga agaramid a sicucuspag, a dina ipangpangag ti padi nga adda nga agannong iti sango ni Jehova a Diosmo, wenno iti ocom, dayta met laeng a tao matayto: ket sica iccatemto ti dakes iti Israel.

¹³ Ket amin a tattao dumngegdanto, ket agbutengdanto, ket didanto agaramiden a sicucuspag.

¹⁴ No macadanoncanto iti daga ni Jehova a Diosmo nga inted kenca, ket matagicuamto, ket agnaedcanto idiay, ket cunamto, Mamangonacto iti maysa nga ari a mangituray caniac, cas cadagiti amin a nasnacion nga adda iti licmutco:

¹⁵ Di bumurong a bangonemto nga ari nga agari kenca, ti piliento ni Jehova a Diosmo: maysa cadagiti cacabsatmo ti icabilmonto nga ari a mangituray kenca; di maipalubos a dutokem ti maysa a gangannaet a mangituray kenca, isu a saanmo a cabsat.

¹⁶ Isuna laeng a dinanto paaduen a maipaay kencuana met laeng dagiti cabcabayo, wenno panggep a pagsublien ti umili idiay Egipto, tapno mapaaduna coma dagiti cabcabayo; ta cas sinao ni Jehova cadacayo, Manipud ita dicayto masublianen dayta a dalan.

¹⁷ Isu dinanto met paaduen dagiti assawana, tapno ti pusona di coma sumiasi: dinanto met paaduen unay kencuana ti pirac ken ti balitoc.

¹⁸ Ket maaramidto, a no isu macapagtugaw iti trono ti pagarianna, mangsuratto iti maysa a libro a maipaay kencuana ti catucad daytoy a linteg nga adda iti sango dagiti papadi a Levitas:

¹⁹ Ket addanto laeng kencuana, ket basbasaennanto idiay iti isu-amin nga al-aldaw ti panagbiagna; tapno masursurona ti agbuteng ken Jehova a Diosna, tapno salimetmetanna ti dagup ti sasaoen daytoy a linteg ken dagitoy nga al-alagaden, tapno aramidenna ida;

²⁰ Tapno di-mapatangsit ti pusona cadagiti cacabsatna, ken tapno di sumiasi iti bilin a mapan iti canawan, wenno iti catigid: tapno umatiddug dagiti al-aldawna iti pagarianna, isu ken dagiti annacna, iti tengnga ti Israel.