Deuteronomio 14 - Ti Biblia (1973)

Maiparit ti panangpalaad iti bagi maipoon iti natay. Nadalus ken saan a nadalus nga an-animal. Maibilin ti panamagcapulo.

¹ Dacayo ti annac ni Jehova a Diosyo: dicayto sugaten dagiti bagbagiyo, wenno kiskisan iti uray ania iti baet dagiti matayo maipuon iti natay.

² Ta sica maysaca nga ili a nasantoan ken Jehova a Diosmo, ket ni Jehova pinilinaca a maysa nga ili a cucuana a naisalsalumina, naipangpangrona ngem iti amin nga il-ili nga adda iti rabaw ti daga.

³ Dicanto mangan iti uray ania a nacarimrimon.

⁴ Dagitoy isuda dagiti an-animal nga mabalinyo a canen: ti vaca, ti carnero, ken ti calding.

⁵ Ti ugsa ken ti gacela ken ti corso, ken ti calding nga atap, ken ti unicornio, ken ti vaca nga atap, ken ti gamusa.

⁶ Ket tunggal animal a nagpisi ti cucuna ken nagguddua ti dapanna, ken agngatingat cadagiti an-animal, dayta ti mabalinyo a canen.

⁷ Nupay casta, dagitoy dicayto canen cadagiti agngatingat wenno naggudca ti dapanna: ti camello, ken ti liebre, ken ti conejo; gapu ta dagitoy agngatingat ngem saan a nagguddua ti cucuda, dagitoy saanda a nadalus cadacayo.

⁸ Ket ti babuy, gapu ta nagpisi ti cucuna ngem saan nga agngatingat, daytoy saan a nadalus cadacayo: iti lasagna dicayto mangan, ket ti bangcayna a natay dicayto sagiden.

⁹ Dagitoy ti mabalinyo a sidaen cadagiti amin nga adda iti dandanum: uray ania nga adda pigarna ken sicsicna, mabalinyo a sidaen;

¹⁰ Ket uray ania nga awan pigarna wenno sicsicna dicayto sidaen; saanto a nadalus cadacayo daytoy.

¹¹ Cadagiti dagup ti nadalus a tumtumatayab, mabalinyo a sidaen.

¹² Ngem dagitoy isuda dagiti saanmonto a sidaen; ti aguila, ken ti azor, ken ti aguila ti taaw,

¹³ Ken ti cacoc, ken ti sawi, ken ti cali, ken cakitana,

¹⁴ Ken amin a wac, ken cakitana,

¹⁵ Ken ti avestruz, ken ti calaw, ken ti garceta, ken ti cali, ken cakitana,

¹⁶ Ken ti puec, ken ti cullaaw, ken calamon,

¹⁷ Ken ti pelicano, ken ti buitre, ken ti gaviota,

¹⁸ Ken ti ticbabuy, ken ti cannaway, ken cakitana, ken ti abubilla, ken ti panniki.

¹⁹ Ken amin a nagpayac nga agcaradap saanda a nadalus cadacayo: dagitoy saanto a masida.

²⁰ Cadagiti amin a nadalus a tumatayab a mabalinyo a sidaen.

²¹ Dacayo saancayto nga agsida iti uray ania a natay latta: mabalinyo nga ited iti gangannaet nga adda iti uneg dagiti ruanganmo, tapno isu ti agsida; wenno mabalinmo nga ilaco iti gangannaet: ta sica maysaca nga ili a nasantoan ken Jehova a Diosmo. Dicanto pagluto iti urbon a calding ti gatas ni inana.

²² Pagcapulloemto a di agcurang ti amin a maapit iti bin-im nga agtaud iti talon iti tinawentawen.

²³ Ket mangancanto iti sango ni Jehova a Diosmo iti lugar a piliennanto, tapno itaengna ti naganna sadiay, ti apagcapullo ti iricmo, ken ti baro nga aracmo, ken ti lanam, ken dagiti umuna nga annac a lallaki dagiti arbanmo ken pangenmo; tapno masursurom ti agbuteng ken Jehova a Diosmo nga agnanayon.

²⁴ Ket no ti dalan, ta nawatiwat unay kenca, a dica cabaelan nga awiten, gapu ta adayu unay kenca ti disso a piliento ni Jehova a Diosmo tapno icabilna sadiay ti naganna, no bendicionannacanto ni Jehova a Diosmo:

²⁵ Iti casta, papirakemto, ket siglotamto ti pirac ita imam, ket incanto iti disso a ni Jehova a Diosmo piliennanto:

²⁶ Ket gastoemto ti pirac iti pagayatan ta cararuam, vaca man wenno carnero, wenno arac, wenno naingel nga inumen, wenno uray ania a tarigagayan ta cararuam; ket mangancanto sadiay iti sango ni Jehova a Diosmo, ket agragragsaccanto, sica ken dagiti cabbalaymo.

²⁷ Ket ti Levita nga adda iti uneg dagiti ruanganmo, dicanto agliway kencuana; ta isu awan ti bagina wenno pannakipagtawidna kenca.

²⁸ Iti pagtapusan ti tunggal tallo a tawen, yegmonto amin nga apagcapullo ti apitmo iti daydiay met la a tawen, ket idulinmonto iti uneg dagiti ruanganmo:

²⁹ Ket ti Levita, gapu ta awan bagina ken pannakipagtawidna kenca, ken ti gangannaet, ken dagiti ul-ulila ken ti balo a babai, nga adda iti uneg dagiti ruanganmo, umaydanto ket mangandanto ken mapnecdanto; tapno ni Jehova a Diosmo bendicionannacanto iti amin nga aramidem a pagbannogan ta imam.