Deuteronomio 13 - Ti Biblia (1973)

Pammagbaga tapno di mailaw-an iti panagdayaw cadagiti ladladawan.

¹ No tumacderto kenca ti maysa a mamadpadles, wenno managparparmata iti darepdep, ket iccannaca iti tanda wenno maysa a nacascasdaaw,

² Ket ti tanda wenno nacascasdaaw maaramid, isu a nagsaoanna kenca a cunana, Intan ala sumurot iti sabsabali a didios, a dica pay naammoan, ket agservita cadacuada;

³ Dicanto italtalec dagiti saosao dayta a mammadles, wenno dayta a managparparmata iti darepdep: ta ni Jehova a Diosyo suutennacayo, tapno maammoan no dacayo ayatenyo ni Jehova a Diosyo iti isu-amin a pusoyo, ken iti isu-amin a cararuayo.

⁴ Dacayo sumurotcayto ken Jehova a Diosyo, ket agamangacayo kencuana, ket salimetmetanyo dagiti bilbilinna, ket agtulnogcayo iti timecna, ket agservicayo kencuana, ket cumpetcayo kencuana.

⁵ Ket daydiay mammadles wenno managparparmata iti darepdep, mapapatayto; gapu ta nagsao iti panaglicud a maicaniwas ken Jehova a Diosyo a nangaon kenca iti daga nga Egipto, ken nangsubbot kenca nanipud iti balay ti nacaadipnan, tapno ilisinaca iti dalan a ni Jehova imbilinna kenca a pagdalanam. Casta ti panangiwacsimto iti kinadakes iti tengngam.

⁶ No ti cabsatmo a lalaki, nga anac ni inam, wenno ti anacmo a lalaki, wenno ti anacmo a babai, wenno ti asawa a babai ti barucongmo, wenno ti gayyemmo nga isu ti cas iti cararuam met laeng, aliugennaca iti nalimed, a cunana, Intan ket agservita iti sabsabali a didios a dica naammoan, sica wenno dagiti ammam:

⁷ Cadagiti didios dagiti il-ili a nailicmut kenca, asideg kenca, wenno adayu kenca, manipud iti maysa a pungto ti daga inggana iti sabali a pungto ti daga;

⁸ Dicanto umanamong kencuana, wenno umimdeng kencuana; wenno ti matam dinanto caasian, wenno dicanto isakit, wenno dicanto ilemmeng:

⁹ Ngem di bumurong a patayemto; dayta imam ti umunanto nga agdisso kencuana a mamapatay, ket ti calpasanna ti ima dagiti amin a tattao.

¹⁰ Ket uburemto iti batbato inggana iti di matay; gapu ta rinantanaca a pagsanuden ken Jehova a Diosmo a nangaon kenca iti daga nga Egipto nanipud iti balay ti nacaadipnan.

¹¹ Ket amin ti Israel denggennanto, ket agbutengto, ket dinto agararamiden iti uray ania a kinadakes cas daytoy iti tengngam.

¹² No mangngegmonto a masasao ti maipapan iti maysa cadagiti il-ili nga ni Jehova a Diosmo itedna kenca, tapno agnaedca sadiay, a cunana,

¹³ Dadduma a tattao a salawasaw pimmanawda iti tengngam, ket ginuyugoyda dagiti agnaed iti ilida, a cunada, Intayon, ket agservitayo iti sabsabali a didios a dicayo naammoan;

¹⁴ Taluntonemto ngarud, ket amirisemto, ken intuudemto a nalaing; ket, adtoy, no pudno ket nalawlawagan a dayta a macarimo naaramid iti tengngam.

¹⁵ Sica dinto lumbes a dadaelem dagiti agnaed iti dayta a ili iti tadem ti campilan, a matalipupus ti panangpucawmo, ken amin nga adda idiay ken amin dagiti an-animalna, iti tadem ti campilan.

¹⁶ Ket cayumcumento amin a samsamna iti tengnga ti calzadana, ket puuramto iti apuy ti ili, ken amin-amin a samsamna, a maipaay ken Jehova a Diosmo: isunto ti maysa a bunton iti agnanayon, dinto mabangonen a mabalbaliwan.

¹⁷ Ket awanto ti dumket iti imam cadagita a naidatag; tapno ibabawi ni Jehova ti rungsot ti pungtotna, ket caasiannaca ken makipagricna kenca, ket paaduennaca, cas insapatana cadagiti ammam;

¹⁸ No sica ipangagmonto ti timec ni Jehova a Diosmo tapno salimetmetam amin a bilbilinna nga ibilinco kenca itoy nga aldaw, tapno aramidem ti nalinteg cadagiti mata ni Jehova a Diosmo.