Deuteronomio 12 - Ti Biblia (1973)

Amin a datdaton maaramidto iti maymaysa a disso. Ti lasag ngem saan a ti dara wenno dagiti naidatag mabalin a canen iti balbalay.

¹ Dagitoy dagiti al-alagaden ken linlinteg a tungpalenyonto nga aramiden iti daga a tagicuaem nga ited kenca ni Jehova a Dios dagiti ammam, iti amin nga al-aldaw a panagbiagyo iti rabaw ti daga.

² Racrakenyonto a di-agcurang amin a disdisso a nagserservianda cadagiti didiosda dagiti nasnacion a pasiaenyonto, iti rabaw dagiti banbantay a nangato, ken rabaw dagiti turturod ken siroc ti tunggal cayo a nalasbang:

³ Ket rugpoenyonto dagiti al-altarda, ken waraenyonto dagiti monmonmonda, ken puuranyonto iti apuy ti Asherimda; ket balsigenyonto dagiti kinitikitan a ladladawan dagiti didiosda; ken pucawenyonto ti naganda iti daydiay a lugar.

⁴ Dicayto aramiden ti casta ken Jehova a Diosyo.

⁵ Ngem iti disso a ni Jehova a Diosyo piliennanto nga aggapu cadagiti amin a capcaputotanyo tapno icabilna idiay ti naganna, uray iti taengna sapulenyonto, ket idiay ti papanamto;

⁶ Ket idiay ti pangyeganyonto cadagiti datdatonyo a mapuuran ken cadagiti sacrificioyo, ken dagiti apagcapulloyo, ken ti daton a mailili dagiti imayo, ken dagiti carcariyo, ken dagiti datdaton ti sibubulos a nakemyo, ken dagiti inauna nga annac a lallaki dagiti pangenyo ken arbanyo.

⁷ Ket idiay mangancayto iti sango ni Jehova a Diosyo, ket agragragsaccayto iti amin a nangaramatanyo iti imayo, dacayo ken dagiti sangacabbalayanyo a nangbendicionan kenca ni Jehova a Diosmo.

⁸ Dicayto ar-aramiden cas ti amin nga aramidentay ditoy ita nga aldaw, tunggal tao iti aniaman a nalinteg cadagiti matana met laeng;

⁹ Ta dacayo dicayo pay met la nacagteng iti inana, ken tawid nga ited kenca ni Jehova a Diosmo.

¹⁰ Ngem no lasatenyo ti Jordan ket agnaedcayo iti daga nga ipatawid cadacayo ni Jehova a Diosyo, ket itedna cadacayo ti inana cadagiti amin a cabcabusoryo nga aglawlaw, a ti casta sitatalged ti panagtaengyo:

¹¹ Maaramidto ngarud, nga iti disso a piliento ni Jehova a Diosyo, a panginaedanna ti naganna, sadiay ti pangyeganyonto ti amin nga ibilinco cadacayo: dagiti mapuuran a datdatonyo, ken dagiti sacrificioyo, dagiti apagcapulloyo, ken ti daton a mailili dagiti imayo, ken amin a napili a carcariyo nga icariyo ken Jehova.

¹² Ket agragragsaccayto iti sango ni Jehova a Diosyo, dacayo ken dagiti annacyo a lallaki, ken dagiti annacyo a babbai ken dagiti bagenyo a lallaki ken dagiti bagenyo a babbai, ken ti Levita nga adda iti uneg ti ruruanganyo, numanpay saan a makibagi ken makipagtawid cadacayo.

¹³ Aluadam ti bagim ta dica mangipaay cadagiti datdaton a mapuuran iti amin a disso a makitam:

¹⁴ Ngem iti disso a piliento ni Jehova iti maysa cadagiti caputotam, idiay ti pangidatagamto cadagiti datdatonmo a mapuuran, ken sadiay ti pangaramidamto ti amin nga ibilinco kenca.

¹⁵ Nupay casta, mabalinmo ti agparti ken mangan ti lasag iti uneg ti amin a ruruanganmo, amin a cas ti calicaguman ti cararuam a mayannurot iti bendicion ni Jehova a Diosmo, isu nga impaayna kenca: ti di-nadalus, ken ti nadalus mabalinna ti mangan iti daydiay, cas iti gacela ken cas iti ugsa.

¹⁶ Isuna laeng a dicayto canen ti dara: ibucbucmonto a cas danum iti daga.

¹⁷ Sica dicanto mabalin a canen iti uneg dagiti ruanganmo ti apagcapullo ti bagasmo, wenno ti baro nga aracmo, wenno ti lanam, wenno ti inauna nga annac dagiti arbanmo ken pangenmo, uray ania cadagiti carcarim nga incarim, wenno dagiti datdaton ti sibubulos a nakemmo, wenno ti daton a mailili dagiti imam;

¹⁸ Ngem canemto ida iti sango ni Jehova a Diosmo iti disso a ni Jehova a Diosmo piliennanto, sica ken ti anacmo a lalaki ken ti anacmo a babai, ken ti bag-enmo a lalaki, ken ti bag-enmo a babai, ken ti Levita nga adda iti uneg ti ruanganmo: ket agragragsaccanto iti sango ni Jehova a Diosmo iti amin a pangaramatam iti imam.

¹⁹ Aluadam ti bagim a dica baybay-an ti Levita iti bayat ti panagbiagmo iti dagam.

²⁰ No ni Jehova a Diosmo padackelennanto ti beddengmo, cas incarina kenca, ket cunamto, Siac manganacto iti lasag, ta ti cararuam calicagumanna ti mangan iti lasag: sica mabalinmonto ti mangan iti lasag a mayannurot iti amin nga esman ti cararuam.

²¹ No ti disso a ni Jehova a Diosmo piliennanto, a pangicabilan idiay ti naganna, nalabes ti caadayuna kenca, pumarticanto ngarud iti arbanmo ken iti pangenmo, a ni Jehova intedna kenca, cas imbilinco kenca; ket sica mabalinmo ti mangan iti uneg dagiti ruanganmo, cas iti amin a calicaguman ta cararuam.

²² Uray cas iti panagsida iti gacela ken iti ugsa, casta ti pannanganmonto cadagidiay: ti di-nadalus ken ti nadalus agpadada a mabalinda ti mangan iti dayta.

²³ Isuna laeng a dicanto mangan a pudno iti dara: ta ti dara isu ti biag, ket dicanto mangan iti biag agraman lasag.

²⁴ Dicanto canen dayta; ibucbucmonto a cas danum iti daga.

²⁵ Dicanto canen dayta, tapno agbalinca a naimbag, ken cadagiti annacmo a sumononto kenca, no aramidemto ti nalinteg cadagiti mata ni Jehova.

²⁶ Isuna laeng a dagiti nasantoan nga adda kenca, ken dagiti carcarim alaemto ida ket incanto iti disso a ni Jehova piliennanto:

²⁷ Ket sica ipaaymonto dagiti datdatonmo a mapuuran, a ti lasag ken ti dara, iti rabaw ti altar ni Jehova a Diosmo: ket ti dara ti datonmo ibuyatmonto iti rabaw ti altar ni Jehova a Diosmo: ket canemto ti lasag.

²⁸ Tungpalem ket imdengam amin dagitoy a sasao nga ibilinco kenca a macapaimbag kenca, ken cadagiti annacmo iti calpasam iti agnanayon, no aramidem ti naimbag ken ti nalinteg cadagiti mata ni Jehova a Diosmo.

²⁹ No ni Jehova a Diosmo pagtalawenna dagiti nasnacion iti sangoanam sadiay a papanam tapno mapasiada, ket sica pasiaem ida, ket agnaedca iti dagada;

³⁰ Aluadam ti bagim, tapno dicanto masiloan a sumurot cadacuada, calpasan ti pannacadadaelda iti sangom; ken tapno dica agin-intuud maipapan cadagiti didiosda, a cunam, Casano ti panagservi dagitoy a nasnacion cadagiti didiosda? No casta castanto met ti aramidec.

³¹ Sica dicanto aramiden ti casta ken Jehova a Diosmo: ta amin a macarimon ken Jehova dagidiay cagurana, isu ti inaramidda cadagiti didiosda; ta uray pay dagiti annacda a lallaki, ken dagiti annacda a babbai puuranda iti apuy a maipaay cadagiti didiosda.

³² Uray aniaman nga ibilinco cadacayo dayta ti tungpalenyonto nga aramiden: saanmonto a naynayonan, wenno curangan.