Deuteronomio 11 - Ti Biblia (1973)

Maipalagip dagiti pacaigapgapuanan ti panagtulnog. Dagiti gunguna ti panagsungpot. Bilin a maipanggep iti Ebal ken Gerizim.

¹ Gapuna nga ayatemto ni Jehova a Diosmo, ket salimetmetamto ti ipaannongna, ken al-alagadenna, ken dagiti linlintegna, ken dagiti bilbilinna iti agnanayon.

² Ket ammoenyo itoy nga aldaw: ta diac makisao cadagiti annacyo a saan a nacaammo ken saan a nacakita iti panangdusa ni Jehova a Diosmo, ti kinadackelna ken ti imana a mannacabalin, ken ti siuunnat a tackiagna,

³ Ket dagiti pagilaslasinanna, ken dagiti gapuananna nga inaramidna iti tengnga ti Egipto ken Faraon nga ari sadi Egipto, ken iti amin a dagana:

⁴ Ken ti inaramidna cadagiti buyot ti Egipto, ken cadagiti cabcabayoda, ken cadagiti lugluganda; no casano ti inaramidna iti danum ti Baybay a Nalabaga a pinanglapunosna cadacuada idi camatendacayo, ken no casano ti pinangdadael ni Jehova cadacuada inggana itoy nga aldaw;

⁵ Ken no ania ti inaramidna cadacayo idiay let-ang, agpapan yaayyo itoy a disso;

⁶ Ken no ania ti inaramidna ken Dathan ken Abiram, nga annac a lallaki ni Eliab nga anac ni Ruben; no casano ti pananglucat ti daga iti ngiwatna ken panangalununna cadacuada, ken ti sangacabbalayanda, ken dagiti toltoldada, ken tunggal nabiag a simmurot cadacuada iti tengnga ti isu-amin nga Israel:

⁷ Ngem dagiti matayo nakitada amin ti dackel nga aramid a gapuanan ni Jehova.

⁸ Isu ti gapuna a salimetmetanyonto amin a bilin nga ibilinco kenca itoy nga aldaw, tapno pumigsacayo, ken sumreccayo, ket agtagicuacayo iti daga a paglasatanyo a pagtagicuaan;

⁹ Ken tapno mapaatiddugyo dagiti al-aldawyo iti daga, a ni Jehova insapatana cadagiti ammayo, nga ited cadacuada, ken cadagiti putputotda, maysa a daga nga agay-ayus ti gatas ken diro.

¹⁰ Ta ti daga a sercam a pagtagicuaan saan a cas ti daga nga Egipto a naggapuam, a nagmulaan iti bin-im, ken sinibugam a naaramat ti sacam, cas maysa a bangcag ti natnateng;

¹¹ Ngem ti daga a papanam a pagtagicuaan maysa a daga a caturturodan, ken caloblobongan, ket danum ti tudo sadi langit ti inumenna,

¹² Maysa a daga nga taripatoen ni Jehova a Diosmo: dagiti mata ni Jehova a Diosmo siaaddada idiay, manipud panangrugi ti tawen inggana iti panaggibus ti tawen.

¹³ Ket maaramidto a no imdenganyo a sigagaget dagiti bibilinco nga ibilinco cadacayo itoy nga aldaw, tapno ayatenyo ni Jehova a Diosyo, ken agservicayo kencuana iti isu-amin a pusoyo, ken amin a cararuayo,

¹⁴ Iti casta itedconto ti tudo iti catutupanna nga aldaw iti dagayo, ti masapa ken ti maladaw a tudo, tapno mabalinmo nga occonen dagiti iricmo, ken ti aracmo a baro, ken ti lanam.

¹⁵ Ket itedconto ti root iti taltalonmo nga agservi iti an-animalmo, ket mangancanto ket maneccanto.

¹⁶ Agannadcayo iti bagbagiyo, di la ket ta maallilaw ti pusoyo, ket mayaw-awancayo, ket agservicayo iti sabali a didios, ket dayawenyo ida;

¹⁷ Ket ti pungtot ni Jehova sumgedto a maibusor cadacayo, ket ripcannanto dagiti langlangit tapno awan ti tudo, ket ti daga dinto mangted iti bungana; ket mapucawcayo iti madaras iti naimbag a daga nga ited ni Jehova cadacayo.

¹⁸ Isu ti gapuna nga ipasnecyonto dagitoy a sasaoc cadagita pusoyo ken cararuayo, ket ibedbedyonto ida a cas maysa a tandaan ita imayo, ket isudanto ti pannacabedbed ti baet dagiti matayo.

¹⁹ Ket isuroyonto dagitoy cadagiti annacyo, a dagitoy ti sasaoenyo cadacuada no agtugawca iti balaymo, ken no magmagnaca iti dalan, ken no agiddaca ken bumangonca.

²⁰ Ket isuratmonto ida cadagiti baotec ti ruangan ti balaymo, ken iti ricrikepmo;

²¹ Tapno dagiti aldawmo umaduda ken dagiti aldaw dagiti annacmo, iti daga a ni Jehova insapatana cadagiti ammam nga ited cadacuada, a cas cadagiti aldaw dagiti langlangit a ngatoen ti daga.

²² Ta no regtaanyonto a salimetmetan amin a bilin nga ibilinco cadacayo, a sungputenyo, tapno ayatenyo ni Jehova a Diosyo, a magnacayo cadagiti daldalanna, ken cumpetca kencuana;

²³ Iti casta ni Jehova papanawennanto amin dagitoy a nasnacion iti sangoyo, ket pasiaenyonto dagiti nasnacion a daddadackel ken manmannacabalin ngem dacayo.

²⁴ Tunggal disso a mabaddecan dagiti dapanyo cucuayonto: manipud iti tay-ac ken ti Libano, manipud iti carayan, a carayan Eufrates, agingga iti taaw nga akinlicud, isunto ti beddengyo.

²⁵ Awanto ti tao a macabael iti sangoyo: ni Jehova a Diosyo icabilnanto ti panagbutengda cadacayo, ken panagamesda cadacayo iti isu-amin a daga a mabaddecanyonto, cas sinaona cadacayo.

²⁶ Adtoy, siac icabilco iti sangoyo ita nga aldaw ti bendicion ken lunod:

²⁷ Ti bendicion no ipangagyo dagiti bilbilin ni Jehova a Diosyo, nga ibilinco cadacayo itoy nga aldaw:

²⁸ Ket ti lunod no dicayo ipangag dagiti bilbilin ni Jehova a Diosyo, ngem sumiasicayo iti dalan nga ibilinco cadacayo itoy nga aldaw, tapno sumurotcayo cadagiti sabsabali a didios, a dicayo am-ammo.

²⁹ Ket maaramidto a no ni Jehova a Diosmo yegnaca iti daga nga papanam a pagtagicuaan, icabilmonto ti bendicion iti bantay Gerizim, ket ti lunod iti bantay Ebal.

³⁰ Saanda aya nga adda iti ballasiw ti Jordan, iti licud ti dalan nga agpalelennecan ti init, iti daga dagiti Cananeo nga agnaed idiay Araba a sango ti Gilgal, a sikigan ti cayo a lugo ti More?

³¹ Ta masapul nga aglasatcayo iti Jordan tapno sumreccayo nga agtagicua iti daga nga ited cadacayo ni Jehova a Diosyo, ket cucuayonto, ket agtaengcayo idiay.

³² Ket tungpalenyonto nga aramiden amin ti al-alagaden ken linlinteg nga icabilco iti sangoyo itoy nga aldaw.