Deuteronomio 10 - Ti Biblia (1973)

Di maicadua a panagtaeng ni Moises iti bantay. Maigunamgunam ti panagraem ken Jehova.

¹ Iti daydi nga aldaw kinuna ni Jehova caniac, Mangdalumpinasca iti dua a taptapi a bato, a capada dagidi immuna ket sumang-atca caniac iti bantay, ket mangaramidca iti maysa a lacasa a cayo.

² Ket isuratconto iti rabaw dagiti taptapi dagiti sasao nga adda cadagidi immuna a taptapi a binuracmo, ket icabilmonto ida iti lacasa.

³ Gapuna a nangaramidac iti maysa a lacasa a cayo ti acacia, ket nangdalumpinasac iti dua a tapi a bato a capada dagidi immuna, ket simmang-atac idi bantay a siiiggemac cadagiti dua a tapi a bato.

⁴ Ket insuratna iti rabaw dagiti taptapi ti cas cadagidi immuna a naisurat, dagiti sangapulo a bilin, a ni Jehova sinaona cadacayo iti bantay nanipud idi tengnga ti apuy iti daydi nga aldaw a pannacagimgimong: ket ni Jehova intedna ida caniac.

⁵ Ket siac nagsubliac ket simmalogac idi bantay, ket incabilco dagiti taptapi iti lacasa nga inaramidco; ket addada idiay cas ni Jehova imbilinna caniac.

⁶ (Ket dagiti annac ti Israel nagnada nanipud iti Beerot-bene-jaacan agingga iti Mosera. Ni Aaron natay idiay ket idiay ti nagtabonanna: ket ni Eleazar nga anacna ti nangannong iti takem ti kinapadi a sonona.

⁷ Nanipud idiay nagnada agingga iti Gudgoda ket nanipud Gudgoda agingga iti Jotbat, maysa a daga dagiti wa-waig ti danum.

⁸ Iti daydi nga aldaw ni Jehova inlasinna ti caputotan ni Levi a mangawit idi lacasa ti tulag ni Jehova, tapno agyanda nga agannong kencuana iti sango ni Jehova, ket tapno mamendicionda iti naganna agpapan itoy nga aldaw.

⁹ Isu ti gapuna a ni Levi awan bagina wenno tawidna a pacairamananna cadagiti cacabsatna; ni Jehova isu ti tawidna cas ni Jehova a Diosmo sinaona kencuana.)

¹⁰ Ket siac nagyanac iti bantay cas idi naminsan, iti uppat a pulo nga aldaw ken uppat a pulo a rabii: ket ni Jehova impangagnac met iti daydi nga aldaw; ni Jehova saannaca a cayat idi a dadaelen.

¹¹ Ket ni Jehova kinunana caniac, Tumacderca, magnaca iti sango ti umili; ket sumrecdanto nga agtagicua iti daga nga insapatac cadagiti ammada nga ited cadacuada.

¹² Ket ita ngarud, Israel, ania ti sapulen ni Jehova a Diosmo kenca, no di la ti panagbuteng ken Jehova a Diosmo, ti panagnam cadagiti dalanna, ken ti panagayatmo kencuana, ken ti panagservim ken Jehova a Diosmo iti isu-amin a pusom ken cararuam,

¹³ Ti panangsalimetmet cadagiti bilbilin ni Jehova, ken dagiti al-alagadenna nga ibilinco kenca itoy nga aldaw tapno agimbagca?

¹⁴ Adtoy, ni Jehova a Diosmo ti agtagicua iti langit, ken iti langit dagiti langlangit, iti daga agraman amin nga adda kencuana.

¹⁵ Ni laeng Jehova ti naay-ayo cadagiti ammam a nagayat cadacuada, ket pinilina dagiti putotda a sonoda, a dacayo a naipangrona ngem amin a tattao, cas ita nga aldaw.

¹⁶ Cugitenyo ngarud nga iccaten ti abbong ti pusoyo, ket saancayo metten a natangken ti panaglenglengngesna.

¹⁷ Ta ni Jehova a Diosyo isu ti Dios dagiti didios, ken Apo dagiti ap-appo, ti dackel a Dios, ti mannacabalin, ken nacabutbuteng, nga awan idadumana a tao, wenno di agala iti panocsoc.

¹⁸ Isu aramatenna ti kinajusticia cadagiti ul-ulila ken balo, ket ayatenna ti gangannaet iti panangited iti taraon ken pagan-anay.

¹⁹ Gapuna ayatenyo ti gangannaet: ta naggangannaetcayo met iti daga nga Egipto.

²⁰ Agbutencanto ken Jehova a Diosmo; agservicanto kencuana ket cumpetcanto kencuana, ket iti naganna agsapatacanto.

²¹ Isu ti pacaidayawam, ket isu ti Diosmo a nangaramid cadagiti maipaay kenca cadagiti naindaclan ken nacabutbuteng a gapuanan, a nakita dagita matam.

²² Dagiti ammam simmalogda a napan sadi Egipto a pitopuloda a tattao; ket ita ni Jehova a Diosmo inaramidnaca a cas caadu dagiti bitbitwen sadi langit.