Deuteronomio 1 - Ti Biblia (1973)

Ni Moises saritaenna ti panagluas sadiay Horeb. Ti pannacadutoc dagiti tumultulong. Ti pannacaibaon dagiti agsimisim. Ti di pammati dagiti tattao; ti pannacaabacda sadiay Jorma.

¹ Dagitoy dagiti sasao nga imbaga ni Moises iti dagup ti Israel iti ballasiw ti Jorda idiay let-ang, idiay Araba a sangoanan ti Suph, a nagbaetan ti Paran ken Thofel, ken Laban, Haserot, ken Dizahab.

² Sangapulo ket maysa nga aldaw a panagbaliasat manipud Horeb a magna iti bantay Seir inggana iti Cades-barnea.

³ Ket naaramid nga iti maicapat a pulo a tawen, iti maicasangapulo ket maysa a bulan, iti umuna nga aldaw ti bulan; ni Moises nakisao cadagiti annac ti Israel ti mayannurot cadagiti amin nga inted ni Jehova kencuana a maibilin cadacuada;

⁴ Idi nga dinadaelna ni Sehon nga ari dagiti Amorreos a nagnaed iti Hesbon, ken ni Og nga ari ti Basan a nagnaed iti Astarot sadi Edrei.

⁵ Iti ballasiw ti Jordan, idiay daga ti Moab, rinugian ni Moises nga impalawag daytoy a linteg, a kinunana,

⁶ Ni Jehova a Diostayo nakisao cadatayo idiay Horeb, a kinunana, Dacayo nagnaedcayo iti umdas a cabayag iti daytoy a bantay:

⁷ Umacarcayo ket irubbuatyo ti pannagnayo, ket incayo iti caturodan dagiti Amorreo, ken agtungpal cadagiti amin a disdisso nga asideg idiay Araba, iti caturodan ken iti tanap, ken iti Abagatan, ken iti abay ti baybay, a daga dagiti Cananeo, ken Libano, agingga iti dackel a carayan, ti carayan a Eufrates.

⁸ Adtoy, insagannac ti daga iti sangoyo, sumreccayo ket tagicuaenyo ti daga nga ni Jehova insapatana cadagiti ammayo a da Abraham, Isaac, ken Jacob, nga itedna cadacuada ken cadagiti putputotda a sumaruno cadacuada.

⁹ Ket imbagac cadacayo iti daydi a tiempo, a kinunac, Diac mabalinan no sisiac laeng a maymaysa ti mangawit cadacayo:

¹⁰ Ni Jehova a Diosyo pinagadunacayo, ket adtoy, ta ita cascayo la cadagiti bitbitwen sadi langit iti caadu.

¹¹ Ni Jehova a Dios dagiti ammayo inayonna coma iti bilangyo ti maminribu, ket bendicionannacayo, a cas incarina cadacayo!

¹² Casano ti panangawitco a maymaysa cadagiti rengrengyo, ken awityo, ken culculyo?

¹³ Alaenyo dagiti lallaki a masirib ken mannacagaw-at ken naam-ammoanen, cas mayannurot cadagiti capcaputotanyo, ket icabilconto ida a pangpangolo cadacayo.

¹⁴ Ket sinungbatandac a kinunayo, Ti sinaom cadacami nga aramidenmi nasayaat.

¹⁵ Iti casta innalac dagiti pangpangoloen dagiti capcaputotanyo, a masirib a lallaki, ken naam-ammoanen, ket insaadco ida a pangpangoloyo a capcapitan dagiti rinibu, ken capcapitan dagiti ginasut, ken capcapitan dagiti saglilimapulo, ken capcapitan dagiti pinullo, ken agturturay, cas mayannurot cadagiti caputotanyo.

¹⁶ Ket ingunamgunamco cadagiti oc-ocomyo iti daydi nga aldaw, a kinunac, Imdenganyo dagiti pangpanggep a rumsua cadagiti cacabsatyo, ket mangocomcayo a sililinteg iti maysa a tao iti cabsatna, ken ti gangannaet nga adda kencuana.

¹⁷ Dicanto pagdudumaen dagiti tattao iti panangocom; agpadpadanto nga imdenganyo ti bassit ken dackel; dicayto agamac iti rupa ti tao; ta ti panangocom isu ti biang ti Dios: ket ti panggep a naricut unay cadacayo, yegyonto caniac, ket siac dengngecto.

¹⁸ Ket imbilinco cadacayo iti daydi nga aldaw ti dagup ti rebbengyo coma nga aramiden.

¹⁹ Ket pimmanawtayo iti Horeb, ket linasattayo amin daydiay dackel ken nacaam-amac a let-ang a nakitayo idi, iti nagbaliasatanyo a mapan iti caturodan ti Ammoreo, cas imbilin ni Jehova a Diostayo; cadatayo; ket dimmanontayo iti Cades-barnea.

²⁰ Ket kinunac cadacayo, Dacayo dimmanoncayo iti caturodan ti Amorreo nga ited cadatayo ni Jehova a Diostayo.

²¹ Adtoy, ni Jehova a Diosmo insaganana ti daga iti sangoanam: sumangatca, agtagicuaca cas ni Jehova a Dios dagiti ammam sinaona kenca; dica agbuteng, dica met agcullayaw.

²² Ket immadanicayo caniac, tunggal maysa cadacayo ket kinunayo, Mangipaunatayo coma cadagiti lallaki tapno sukimatenda ti daga gapu cadatayo sada ipadamag cadatayo ti dalan a masapul a sang-atantayo ken dagiti i-ili nga ayentayo.

²³ Ket daydi nacaparag-o a naimbag caniac; ket nangalaac iti sangapulo ket dua a lallaki cadacayo, maysa a lalaki iti tunggal caputotan:

²⁴ Ket napanda ket simmang-atda iti caturodan ket dimmanonda iti lobong ti Escol, ket sinimisimanda.

²⁵ Ket nangalada iti bunga ti daga nga iniggamanda ket insalogda nga inyeg cadatayo, ket impadamagda cadatayo, ket kinunada, Nasayaat ti daga nga ited cadatayo ni Jehova a Diostayo.

²⁶ Nupay casta dicayo kinayat ti sumang-at, ngem simmalungasingcayo iti maicaniwas iti bilin ni Jehova a Diosyo:

²⁷ Ket nagtantanabutobcayo cadagiti toltoldayo a kinuncunayo, Gapu ta ni Jehova ginuranacami, inaonnacami iti daga nga Egipto, tapno yawatnacami iti ima dagiti Amorreo tapno dadaelennacami.

²⁸ Adino ti papanantayo? Dagiti cacabsatmi pinaggarawda dagiti puspusomi a kinunada, Dagiti tattao daddadackel ken nataytayagda ngem datayo: dagiti il-ili dadackelda ken nabacudanda inggana sadi langit: ket maysa pay, nakitami dagiti annac dagiti Anaceos sadiay.

²⁹ Sinaoc ngarud cadacayo, Dicayo, agkigtot, wenno agbuteng cadacuada.

³⁰ Ni Jehova a Diosyo a mapan iti sangoyo isu ti makibacalto a pannacabagiyo, cas ti amin nga inaramidna gapu cadacayo idiay Egipto iti imatang dagiti matayo,

³¹ Ken idiay let-ang a nacakitaam idi no casano ti panangkibin kenca ni Jehova a Diosmo, cas ti maysa a lalaki kibinenna ti anacna, iti isu-amin a dalan a nagnaanyo agpapan dimmanoncayo ditoy a disso.

³² Nupay casta iti daytoy saanyo a pinati ni Jehova a Diosyo,

³³ Isu immuna cadacayo iti dalan tapno cumita iti disso a pamangonanyo iti toltoldayo, iti apuy iti rabii tapno maipamatmat cadacayo ti dalan a pagnaanyo, ken iti ulep iti aldaw.

³⁴ Ket ni Jehova nangngegna ti timec dagiti sasaoyo, ket nacapungtot, ket insapatana, a kinunana,

³⁵ Kinaagpaysona nga awanto ti maysa cadagitoy a lallaki iti daytoy dakes a caputotan a macakita iti nasayaat a daga, a sinapataac nga ited cadagidi ammayo,

³⁶ Malacsid ni Caleb nga anac ni Jefone; isu makitananto; ket kencuana itedconto ti daga nga nagbadbaddecanna, ken cadagiti annacna, gapu ta sinurotna a naananay ni Jehova.

³⁷ Casta met a ni Jehova nagunget caniac gapu cadacayo, a kinunana, Sica dicanto met sumrec idiay:

³⁸ Ni Josue nga anac ni Nun, nga adda iti sangom, isu ti sumrecto idiay: paturdem; ta isu ti mamagtawidto iti Israel iti daydiay.

³⁹ Maysa pay, dagiti babassityo a kinunayo, Isudanto ngata ti maysa a sinamsam, ken dagiti annacyo nga iti daytoy nga aldaw awan ti ammoda a naimbag wenno dakes, isuda ti sumrecto idiay, ket itedconto cadacuada, ket tagicuaendanto.

⁴⁰ Ngem no cadacayo, agbawingcayo, ket agpagpagnacayo iti dalan ti let-ang nga agpa-Baybay a Nalabaga.

⁴¹ Idin simmungbatcayo, ket kinunayo, caniac, Dacami nacabasolcami iti maicaniwas ken Jehova, sumang-atcamto ket makibacalcami, cas maiyalubog iti amin nga imbilin cadacami ni Jehova a Diosmi. Ket imbarikesyo iti tunggal maysa a lalaki dagiti ig-igamna iti gubat, ket nagpangascayo a sumang-at iti caturodan.

⁴² Ket ni Jehova kinunana caniac, Saoem cadacuada, Dicayo sumang-at, dicayo met makibacal; ta awanac cadacayo; di la ket ta maabaccayo iti sangoanan dagiti cabusoryo.

⁴³ Casta ti sinaoc cadacayo, ket dicay nangipangpangag; ngem simmupringcayo a maibusor iti bilin ni Jehova, ket nagpangascayo, a simmang-at iti caturodan.

⁴⁴ Ket dagiti Amorreo a nagnaed idiay caturodan, rimmuarda a simmaranget cadacayo, ket pinataraydacayo, cas aramiden dagiti uyucan, ket inabacdacayo idiay Seir, agingga idiay Jorma.

⁴⁵ Ket dacayo nagsublicayo, ket nagsangsangitcayo iti sango ni Jehova; ngem ni Jehova dina impangag ti timecyo, dina met inyallingag ti pagdengngegna cadacayo.

⁴⁶ Dayta ti nacapagyananyo idiay Cades iti adu nga al-aldaw, cas cadagiti al-aldaw a panagyanyo idiay idi.