Daniel 8 - Ti Biblia (1973)

Ti sirmata ni Daniel ken ti panangipatarus ni Gabriel.

¹ Iti maicatlo a tawen iti panagari ni ari Balsasar nagparang caniac ti maysa a sirmata, caniac met laeng, Siac ni Daniel, calpasan daydi a nagparang caniac nga immun-una.

² Ket nakitac iti sirmata; ket naaramid nga idi nakitac, addaac idi idiay Susan ti palacio, nga adda iti provincia ti Elam; ket nakitac iti sirmata, ket addaac idi iti denna ti carayan Ulai.

³ Idin intangadco dagiti matac, ket nakitac, ket adtoy a nagtacder iti sango ti carayan ti maysa a carnero a lallaki nga adda dua a sarana: ket dagiti dua a sarana nangatoda; ngem ti maysa nangatngato ngem ti sabali, ket daydi nangatngato timmubo a naud-udi.

⁴ Nakitac ti carnero a lalaki nga agdiros nga agpalaud, ken agpaamianan, ken agpaabagatan; ket awan ti uray ania nga animal a macabalin nga agtacder iti sangoananna, ket awan met ti aniaman a macalapsut iti imana; ngem inaramidna ti mayannurot iti pagayatanna, ket intan-ocna ti bagina met laeng.

⁵ Ket idi a panpanunutec, adtoy, maysa a calding a lalaki immay a naggapu iti laud iti ngatoen ti amin a daga, ket saanna a sinagid ti daga: ket ti calding adda idi sarana a nacadildillaw iti nagbaetan dagiti matana.

⁶ Ket isu immay iti carnero a lalaki nga adda idi dua a sarana, isu a nakitac a nagtacder iti sango ti carayan, ket timmaray a nagturong kencuana babaen ti rungsot ti pannacabalinna.

⁷ Ket isu nakitac nga immay iti asideg ti carnero a lalaki, ket isu natignay iti pungtot a bumusor kencuana, ket kinabilna ti carnero a lalaki, ket binungtolna dagiti dua a sarana; ket awan ti pannacabalin iti carnero a lalaki a tumacder iti sangona; iti casta impasagna iti daga, ket impayatpayatna; ket awan ti nacabalin a nangisalacan iti carnero a lalaki iti imana.

⁸ Ket daydi calding a lalaki intan-ocna ti bagina met laeng iti napalalo; ket idin nga isu napigsa, daydi, dackel a sarana nabungtol; ket iti saadna immay dagiti uppat a nacadildillaw a sara nga agturong cadagiti uppat nga angin ti langit.

⁹ Ket iti maysa cadacuada rimmuar ti maysa a sara a bassit, a dimmackel iti napalalo unay a tumurong iti abagatan, ken tumurong iti daya, ken tumurong iti nadayag a daga.

¹⁰ Ket isu dimmackel unay agingga met laeng iti buyot ti langit, ket ti dadduma iti buyot ken cadagiti bitbitwen intappuacna iti daga, ket impayatpayatna ida.

¹¹ Wen, intan-ocna ti bagina met laeng, agingga met laeng iti principe ti buyot; ket innalana kencuana ti di agsarday a daton a mapuuran, ket ti disso ti santuariona naitappuac.

¹² Ket ti buyot nayawat kencuana a naicuyog iti di-agsarday a daton a mapuuran, gapu iti salungasing; ket impurruacna ti pudno iti daga, ket inaramidna ti kinaycayatna ket rimmang-ay.

¹³ Idin nangngegco ti maysa a santo a nagsao; ken maysa a sabali a santo kinunana iti daydi a nagsao, Casanonto ti cabayag ti sirmata a maipapan iti di agsarday a daton a mapuuran, ken ti salungasing mangpalangalang, a mangted nga apada iti santuario ken iti buyot tapno mapayatpayatda.

¹⁴ Ket isu kinunana caniac, Aginggana iti dua ribo ket tallo gasut a malem ken bigat; calpasanna ti santuario madalusanto.

¹⁵ Ket naaramid, nga idi a siac, siac met laeng ni Daniel, nakitac idi ti sirmata, ket sinapulco ti caipapananna, ket adtoy, ti maysa a cas la langa ti tao a nagtacder itoy sangoanac.

¹⁶ Ket nangngegco ti timec ti maysa a tao iti nagbaetan dagiti teppang ti Ulai, a nagickis, ket kinunana, Gabriel, ipaawatmo itoy a tao ti sirmata.

¹⁷ Iti casta immay iti asideg ti nagtacderac; ket idi nga immay, nakigtotac, ket nagpaclebac: ngem kinunana caniac, Awatem, O anac ti tao; ta ti sirmata maipaay iti pannawen ti panungpalan.

¹⁸ Idi a nakisasao caniac, napasagac iti nargaan a turog a sipapaclebac iti daga; ngem isu sinagidnac, ket pinatugawnac.

¹⁹ Ket kinunana, Adtoy, ipaawatconto kenca ti mapasamacto iti panungpalan ti pungtot; ta isu agpaay iti nakedngan a pannawen ti panungpalan.

²⁰ Daydi carnero a lalaki a nakitam nga adda idi dua a sarana, isuda dagiti ar-ari ti Media ken Persia.

²¹ Ket ti burangen a calding a lalaki isu ti ari ti Grecia: ket ti dackel a sara nga adda kencuana iti baet dagiti matana isu ti umuna nga ari.

²² Ket no maipapan daydi nabungtol nga iti saadna timmacder dagiti uppat, uppat a pagpagarian tumacderdanto iti nacion ngem saan a mairaman ti pannacabalinna.

²³ Ket itinto maud-udi a pannawen ti pagarianda, inton dagiti managsalungasing madanonanda, maysa nga ari a nauyong ti langana, ket mannacaawat cadagiti nauneg a balbalicas tumacderto.

²⁴ Ket iti pannacabalinna nabilegto, ngem saan a gapu iti bucodna a pigsa, ket racrakennanto a nacascasdaaw unay; ket rumang-ayto, ken aramidennanto ti pagayatanna; rebbekennanto dagiti napigsa ken dagiti nasantoan a tattao.

²⁵ Ket gapu iti wagasna parangayennanto iti allilaw iti imana: ket itan-ocnanto ti bagina iti pusona, ket iti talgedda rebbekennanto ti adu: tumacderto met a bumusor iti principe dagiti principes; ngem isu marumrumecto a saan a gapuanan ti ima.

²⁶ Ket ti sirmata maipapan cadagiti rabii ken bigat a naibaga isu ti napudno; ngem idulinmo ti sirmata; ta agpaay cadagiti adu nga al-aldaw iti casacbayan.

²⁷ Ket siac, ni Daniel, natalimudawac, ket nagsakitac iti sumagmamano nga aldaw; idin bimmangonac, ket tinungpalco ti annongec iti ari: ket nagsiddaawac iti sirmata ngem awan ti nacaawat kencuana.