Daniel 7 - Ti Biblia (1973)

Tagtagainep a maipapan cadagiti uppat nga animal.

¹ Iti immuna a tawen ni Balsasar nga ari ti Babilonia ni Daniel adda idi maysa a tagtagainep ken parparmata ti olona iti iddana: idin insuratna ti tagtagainepna ket imbagana ti nacadagdagupanda.

² Ni Daniel nagsao ket kinunana, Nakitac iti parparmatac iti rabii, ket adtoy, dagiti uppat nga angin ti langit dimteng a kellaat iti dackel a taaw.

³ Ket uppat nga animal a dadackel ken nagdudumada simmang-atda iti taaw.

⁴ Ti umuna cas la leon ket addaan paypayac ti aguila: siac kinitkitac agingga a dagidi payacna naparparutda, ket naipangato a naggapu iti daga, ket napatacder cadagiti dua a sacsaca a cas maysa a tao; ket isu naiccan iti puso ti tao.

⁵ Ket adtoy ti maicadua a sabali nga animal, nga umasping iti maysa nga oso; isu a naipangato iti maysa a sikigan, ket adda tallo a paragpag iti ngiwatna iti nagbaetan dagiti ngipenna: ket castoy ti kinunada kencuana, Bumangonca, manganca iti adu a lasag.

⁶ Iti calpasan daytoy siac kinitac, ket adtoy, ti maysa a sabali nga umasping iti maysa a leopardo, nga adda uppat a payac ti tumatayab iti bucotna; ket ti animal adda met uppat nga olona; ket ti panagturay naited kencuana.

⁷ Iti calpasan daytoy nakitac cadagiti parparmata iti rabii, ket adtoy, ti maicapat nga animal, nacakigkigtot ken maingel, ken napalalo ti pigsana; ket addaan dadackel a ngipngipenna a landoc; isu a nanglamut ken nagtumec, ket ti nabati impayatpayatna cadagiti sacana: ket isu naiduma cadagiti amin nga an-animal nga immun-una ngem isu: ket adda idi sangapulo a sarana.

⁸ Minatmatac dagiti sara, ket adtoy, a rimmusing cadacuada ti sabali a sara, maysa a bassit a sara, ket iti sangoananna tallo cadagati immuna a sarsara naparutda cadagiti ramramutda: ket adtoy, iti daytoy a sara adda idi matmata a cas cadagiti mata ti tao, ken maysa a ngiwat nga agsasao cadagiti dadackel a banbanag.

⁹ Binuybuyac agingga iti naisaad dagiti trono, ket ti dati a lacay nagtugaw: ti cawesna napudaw a cas la nieve, ket ti booc ti olona, cas la nadalus a dutdot ti carnero; ti tronona sumsumged a gilgilayab, ket dagiti pilpilidna apuy a dumardarang.

¹⁰ Maysa nga umap-apuy nga ayus timpuar ken rimmuar iti sangona: rinibribu a ribu dagiti nagservi kencuana, ket sangalacsa a lacsa ti nagtatacder iti saclangna: ti panangocom naikeddeng, ket dagiti liblibro naluctanda.

¹¹ Binuybuyac iti dayta a pannawan agsipud iti timec dagiti dadackel a sasao a sinao ti sara; kinitac inggana met laeng a ti animal, napapatay ket ti bagina nalasanglasang, ket nayawat tapno mapuuran iti apuy.

¹² Ket no maipapan iti nabati cadagiti an-animal, ti panagturayda naiccat: nupay casta dagiti biagda napawaywayan iti maysa a nadutocan a pannawen ken maysa a pannawen.

¹³ Nakitac cadagiti parparmata ti rabii, ket adtoy, immay babaen cadagiti ululep ti langit ti maysa a cas la anac ti tao, ket dimteng ti dati a lacay, ket isu inyasidegda iti saclangna.

¹⁴ Ket isu naiccan iti panagturay, ken dayag, ken maysa a pagarian, nga amin dagiti il-ili, nasnacion, ken pagsasao agservida coma kencuana: ti panagturayna agnanayon a panagturay a dinto mapalabas, ket ti pagarianna dinto maduprac.

¹⁵ No maipapan caniac Siac ni Daniel, ti espirituc naldaang idi iti unegco ket dagiti parparmata iti oloc riniribucdac.

¹⁶ Immasidegac iti maysa cadagiti nagtacder idiay, ket sinaludsudco ti pudno a maipapan amin iti daytoy. Iti casta imbagana caniac, ket impacaammona caniac ti catarusan dagiti banbanag.

¹⁷ Dagitoy dadackel nga an-animal, isuda nga uppat, uppatda nga ar-ari a bumangonto ditoy daga.

¹⁸ Ngem dagiti sasanto ti Cangatoan awatendanto ti pagarian, ket tagicuaendanto ti pagarian iti agnanayon, iti met laeng agnanayon nga awan inggana.

¹⁹ Idin tinarigagayac nga ammoen ti pudno a maipapan iti maicapat nga animal, isu a naigiddiat cadacuada amin, nacakigkigtot a napalalo, a dagiti ngipenna landocda, ket dagiti cucona gambang; isu a nanglamut, nangtumec ket ti nabati impayatpayatna cadagiti sacana;

²⁰ Ket no maipapan cadagiti sangapulo a sara nga adda idi iti olona, ken ti sabali a sara a rimmusing, ket iti sangona natnag dagiti tallo, ket dayta met laeng a sara nga addaan idi matmata, ken maysa a ngiwatna a nagsao cadagiti dadackel a banbanag, ket iti langana napunpuner ngem dagiti caduana.

²¹ Kinitkitac, ket daydi met la a sara ginubatna dagiti sasanto, ket pinarmecna ida;

²² Agingga iti immay ti dati a lacay, ket ti panangocom naited cadagiti sasanto ti Cangatoan; ket dimteng ti pannawen a dagiti sasanto tinagicuada ti pagarian.

²³ Castoy ti kinunana, ti maicapat nga animal isunto ti maicapat a pagarian ditoy daga, isu a maidumanto cadagiti amin a pagpagarian, ket lamutennanto amin toy lubong, ket ibaddebaddecnanto, ket tumekennanto.

²⁴ Ket no maipapan cadagiti sangapulo a sara, agtaud iti daytoy a pagarian tumacderto dagiti sangapulo nga ar-ari; ket iti calpasanda tumacderto ti sabali; isu maidumanto cadagiti immun-una, ket parmekennanto dagiti tallo nga ar-ari.

²⁵ Ket isu agbalicasto cadagiti sasao a maicaniwas iti Cangatoan, ket pacapuyennanto dagiti sasanto ti Cangatoan; ket panunutennanto a balbaliwan dagiti pannawen ken linteg; ket maiyawatdanto iti imana aginggana iti maysa a pannawen ken dagiti pannawen ken guddua ti maysa a pannawen.

²⁶ Ngem ti panangocom maikeddengto, ket iccatendanto ti panagturayna, tapno isu maibus ken maracrac nga agnanayon.

²⁷ Ket iti pagarian ken panagturay, ken iti kinadackel dagiti pagpagarian iti babaen ti amin a langit maiteddanto cadagiti il-ili dagiti sasanto ti Cangatoan: ti pagarianna agnanayon a pagarian, ket amin a pagturayan agservi ken agtulnogdanto kencuana.

²⁸ Ditoy ti panungpalan ti banag. No maipapan caniac, Siac ni Daniel, dagiti panpanunotco riniribucdac unay, ket ti langac nagbaliw ti casasadna: ngem sinalimetmetac ti banag itoy pusoc.