Daniel 6 - Ti Biblia (1973)

Ni Daniel iti rukib dagiti leon.

¹ Nacaay-ayo ken ni Dario a mangisaad cadagiti sangagasut ket duapulo a panguloen ti pagarian, isuda a maiwaras coma iti amin a pagarian;

² Ket iti ngatoenda tallo a presidente, a maysa cadacuada ni Daniel; tapno dagidiay a panguloen mabalinda ti agipadamag cadagitoy, ket iti casta ti ari awan coma ti madadael kencuana.

³ Idin daytoy a Daniel naisangayan iti ngatoen dagiti presidente ken pangpanguloen, agsipud ta adda kencuana ti mangnibinibi nga espiritu; ket ti ari pinanunotna nga isaad iti ngatoen iti amin iti pagarian.

⁴ Iti casta dagiti presidentes ken pangpanguloen nagbirbirucda iti puon ti darum a maibusor ken Daniel a ti maipapan iti pagarian; ngem dida nacasarac iti puon ti darum wenno pamabasolan, agsipud ta isu matalec idi, awan met ti aniaman a biddut wenno pagcurangan a nasarac kencuana.

⁵ Iti casta kinuna dagitoy a tattao, Ditayto macasarac iti aniaman a puon ti darum a maibusor itoy a Daniel, malacsid no birukentayo ti maisalungasing kencuana a maipapan iti linteg ti Diosna.

⁶ Idin dagitoy a presidente ken pangpanguloen, naguurnongda iti saclang ti ari, ket castoy ti sinaoda kencuana, Ari Dario, agbiagca coma iti agnanayon.

⁷ Amin dagiti presidente iti pagarian, diputados, ken pangpanguloen, dagiti consejeros ken gobernadores nagbibinnalacadanda ti mamangon iti maysa a naarian a linteg, ken mangaramid ti maysa a napigsa a bilin, a siasinoman nga agdawat iti uray siasino a dios wenno tao iti bayat ti tallopulo nga aldaw, no di laeng kenca, O ari, isu maibellengto iti rukib dagiti leon,

⁸ Ita, O ari, buangayem ti bilin ket firmaam ti surat, tapno saan a mabalin a balbaliwan, a cas mayannugot iti linteg dagiti Medos ken Persas, isu a saan a mabalbaliwan.

⁹ Finirmaan ngarud ni ari Dario ti surat ken ti bilin.

¹⁰ Idi naammoan ni Daniel a ti surat nafirmaanen, simrec iti balayna (ket dagiti tawa ti siledna silulucatda a maiturong iti Jerusalem); ket isu nagparintumeng iti namitlo iti tunggal aldaw, ket nagcararag, ket nagyaman iti sangoanan ti Diosna a cas ar-aramidenna idi.

¹¹ Iti casta dagitoy a tattao nagtitiponda, ket nasaracanda ni Daniel nga agdawdawat ken agpacpacaasi iti sangoanan ti Diosna.

¹² Idin napanda nga immasideg ket imbagada iti sango ti ari, iti maipapan iti naarian a bilin: Saanmo aya a finirmaan ti maysa a bilin, nga tunggal tao nga agdawatto iti uray siasino a dios wenno tao ti bayat ti tallopulo nga aldaw, no di laeng kenca O ari, maibellengto iti rukib dagiti leon? Ti ari simmungbat ket kinunana, Dayta isu ti pudno a maiyalubog iti linteg dagiti Medos ken Persias, isu nga saan a mabalbaliwan.

¹³ Iti casta simmungbatda ket kinunada iti saclang ti ari, Dayta a Daniel a nagtaud cadagiti annac ti pannacacayaw ti Juda, dinaca icancano, O ari, uray iti bilin a finirmaam, no di ket aramidenna ti panagdawatna iti mamitlo iti tunggal aldaw.

¹⁴ Ti ari ngarud idi a nangngegna dagitoy a sasao, napalucsaw unay, ket impamaysana ti pusona ken Daniel tapno isu ispalennanto; ket nagtrabajo agingga iti ilelennec ti init iti panangispalna kencuana.

¹⁵ Idin dagitoy a tattao naguurnongda a napan iti ari, ket kinunada iti ari, Ammoem, O ari, nga isu ti linteg dagiti Medos ken Persas nga awan ti bilin ken linteg a buangayen ti ari a mabalin a mabalbaliwan.

¹⁶ Iti casta ti ari imbilinna, ket insangpetda ni Daniel, ket intappuacda iti rukib dagiti leon. Ti ari nagsao ket kinunana ken Daniel, Ti Diosmo a pagserservia a cancanayon, ispalennacanto.

¹⁷ Ket maysa a bato nayeg ket naicabil iti ngiwat ti rukib; ket ti ari sinelloanna iti bucodna a sello, ken iti sello dagiti panguloenna; tapno awan coma ti aniaman a mabaliwan a maipapan ken Daniel.

¹⁸ Idin ti ari napan iti palaciona, ket pinalabasna daydi a rabii a nagayunar; di met naipan dagiti gamigam ti musica iti saclangna: ket awan ti turog kencuana.

¹⁹ Idin ti ari bimmangon a nasapa unay iti bigat, ket napan a nagdardaras iti rukib dagiti leon.

²⁰ Ket idi nacagteng iti asideg ti rukib ken Daniel, isu nagpuccaw iti nacaladladingit a timec; ti ari nagsao ket kinunana ken Daniel, O Daniel, adipen ti sibibiag a Dios, ti Dios a nagserserviam a cancanayon, mabalinnaca nga ispalen cadagiti leon?

²¹ Iti casta kinuna ni Daniel iti ari, O ari, agbiagca coma iti agnanayon.

²² Ti Diosco imbaonna ti angelna, ket rinipcanna dagiti ngiwat dagiti leon, ket saandac a dinunor; agsipud ta iti saclangna ti kinaawan basol ti nasarac caniac; ken casta met iti sangoanam, O ari, awan ti ranggas nga inaramidco.

²³ Idin nagragsac iti napalalo ti ari, ket imbilinna nga iruarda coma ni Daniel iti rukib, iti casta ni Daniel naaon iti rukib, ket awan ti aniaman a kita ti dunor a nasarac kencuana, gapu ta nagcammatalec iti Diosna.

²⁴ Ket ti ari nagbilin, ket insangpetda dagiti tattao a nangidarum ken Daniel, ket impurruacda ida iti rukib dagiti leon, isuda, dagiti annacda, ken dagiti assawada; ket dagiti leon pinarucmada ida, ket binungtolda amin dagiti tultulangda, idi saandapay a nagdisso iti lansad ti rukib.

²⁵ Iti casta ni ari Dario nagsurat iti amin nga il-ili, nasnacion, ken pagsasao, nga agnaed iti amin a daga: Ti talna umad-adda la coma cadacayo.

²⁶ Mangaramidac iti bilin nga iti amin a pagturayan toy pagariac, a dagiti tattao agpigerger ken agbutengda coma iti sango ti Dios ni Daniel; ta isu ti Dios a sibibiag, ken saan a magaraw iti agnanayon, ken ti pagarianna isu a saanto a maduprac, ket iti panagturayna inggana iti panungpalan.

²⁷ Isu mangispal ken mangalaw, ket agaramid cadagiti pagilasinan ken pagsidsiddaawan sadi langit ken ditoy daga, isu a nangispal ken Daniel iti pannacabalin dagiti leon.

²⁸ Gapuna a daytoy Daniel rimmang-ay iti panagari ni Dario, ken iti panagari ni Ciro a Persa.