Daniel 5 - Ti Biblia (1973)

Ti rambac ni ari Belsasar, ken ti panagsurat ti ima iti diding.

¹ Ni ari Balsasar nangaramid iti maysa a dackel a rambac a maipaay cadagiti sangaribo a pangoloenna, ket imminum iti arac iti sangoanan dagiti sangaribo.

² Ni Balsasar idi a naramananna ti arac, nagbilin a yegda dagiti al-alicamen a balitoc ken pirac nga insangpet ni Nabucodonosor nga amana a naggapu iti templo idiay Jerusalem, tapno paginuman coma met ti ari ken dagiti pangoloenna, ken castada met, dagiti asawana ken dagiti camalalana.

³ Iti casta naisangpetda dagiti al-alicamen a balitoc nga innalada iti templo a balay ti Dios nga adda idi idiay Jerusalem; ket naginumanda ida, ti ari ken dagiti pangoloenna, dagiti asawana ken camalalana.

⁴ Nagiinumda iti arac, ket dinaydayawda dagiti didios a balitoc, ken pirac, ken suer, ken landoc, ken cayo, ken bato.

⁵ Iti daydi met la nga horas, rimmuar dagiti ramay ti ima ti maysa a lalaki, ket nagsuratda iti batug ti candelero iti palitada ti diding ti palacio ti ari; ket ti ari nakitana ti paset ti ima a nagsurat.

⁶ Idin ti langa ti ari nagbaliw ti casasaadna, ket naiculeng ti panunotna ket dagiti susuop dagiti, lomona naglucayda, ket dagiti tumengna nagtinnim-ogda.

⁷ Ti ari nagpuccaw a natbag, a mayeg coma dagiti baglan, Caldeos, ken mammadles. Nagsao ti ari ket kinunana cadagiti mamasirib sadi Babilonia, asinoman a macabasa itoy a surat, ket iparangna caniac ti catarusanna, macawesanto iti purpura, ket addanto tanicala a mayuccor iti tengngedna, ket iti pagarian maitan-octo a maicatlo nga agturay.

⁸ Iti casta simrec amin dagiti mamasirib ti ari; ngem dida nabalin a binasa daydi surat, ket dida met naipacaammo iti ari ti catarusanna.

⁹ Iti casta ni ari Balsasar nagpulcoc unay, ket nagbaliw ti casasaad ti langana, ket nariribuc dagiti pangoloenna.

¹⁰ Iti casta ti reina gapu cadagiti sasao ti ari ken dagiti pangoloenna simrec iti balay a pagpadayaan: ti reina nagsao ket kinunana, O ari, agbiagca coma iti agnanayon; didaca coma riribuken dagiti panunotmo, ket dimet coma agbaliw dayta langam.

¹¹ Adda maysa a lalaki iti pagariam, isu a pagtaengan ti espiritu dagiti nasantoan a didios; ket cadagiti al-aldaw ni amam nasarac kencuana ti silaw ken pannacaawat ken sirib, a cas ti sirib dagiti didios; ket ni ari Nabucodonosor, nga amam, ti ari, cunac, ni amam isu ti inaramidna nga apo dagiti magos, bagbaglan, Caldeos, ken mammadles;

¹² Agsipud ta maysa a mangnibinibi nga espiritu, ken pannacaammo, ken pannacaawat, panangipatarus cadagiti tagtagainep, ken panangiparang cadagiti nauneg a balicas, ken pananglawlawag cadagiti pagduaduaan, nasaracan itoy met la a Daniel isu a ninaganan ti ari ti Baltasar. Ita maayaban coma ni Daniel, ket ipakitananto ti catarusanna.

¹³ Iti casta ni Daniel naisangpet iti saclang ti ari. Ti ari nagsao ket kinunana ken Daniel, Sica daydi Daniel, a nagtaud cadagiti annac ti pannacacayaw ti Juda, nga inruar ti ari nga amac idiay Juda?

¹⁴ Siac nadamagco ti maipapan kenca, a ti espiritu dagiti didios adda kenca, ket masaracan kenca ti silaw, pannacaawat, ken mangnibinibi a sirib.

¹⁵ Ket ita dagiti mamasirib, bagbaglan, naiparangda iti saclangco, tapno basaenda coma daytoy a surat, ken ipacaammoda met caniac ti catarusanna; ngem dida nabalin nga imparang ti catarusan daytoy a banag.

¹⁶ Ngem nadamagco ti maipapan kenca, a mabalinmo nga ited dagiti catarusan, ken lawlawagam dagiti duadua: ita no mabalinmo a basaen ti surat, ket maipacaammom caniac ti catarusanna, macawesancanto iti purpura, ket mayuccorto ti maysa a tanicala iti tengngedmo, ket iti pagarian sicanto ti maicatlo nga agturay.

¹⁷ Iti casta ni Daniel simmungbat ket kinunana iti saclang ti ari, Mabati coma dagiti sagsagutmo a maipaayda kenca met laeng, ket itedmo dagiti panggungunam iti sabali; nupay casta basaecto ti surat iti ari, ket ipacaammocto kencuana ti catarusanna.

¹⁸ O sica nga ari, ti Cangatoan a Dios intedna ken Nabucodonosor nga amam ti pagarian, ken ti kinatan-oc, ken kinadayaw, ken kinadaeg.

¹⁹ Ket gapu iti kinatan-oc nga intedna kencuana, amin dagiti il-ili, nasnacion, ken pagsasao nagpigerger ken nagbutengda iti saclangna: dagiti kinayatna pinatayna, ket dagiti kinayatna binayanna nga agbiag; dagiti kinayatna intan-ocna, ket dagiti kinayatna impababana.

²⁰ Ngem idi a ti pusona kimmuspag, ken ti espirituna napatangken iti casta nagaramid a sitatangsit, isu naiccat iti naarian a tronona, ket iniccatda ti dayagna kencuana.

²¹ Ket isu napagtalaw iti arpad dagiti annac dagiti tattao, ket ti pusona napagbalin a cas ti puso dagiti animal, ket nagtaeng iti yan dagiti naatap nga asno; isu nataraonan iti root a cas cadagiti vacvaca, ket ti bagina naslep iti linnaaw ti langit; agingga iti nabigbigna a ti Cangatoan a Dios agturay iti pagarian dagiti tattao, ket pagturayenna ti asinoman a cayatna.

²² Ket sica nga anacna, O Balsasar, saanmo a pinagpacumbaba ta pusom, nupay pagaammom idi amin daytoy,

²³ No di ket timmangsitca a maibusor iti Apo ti langit; ket inyegda iti sangoanam dagiti al-alicamen ti balayna, ket sica ken dagiti pangoloem, dagiti asawam ken camalalam naginumanyo ida iti arac, ket dinaydayawmo dagiti didios a pirac ken balitoc, ken suer, landoc, cayo, ken bato, isuda a di makakita, macangngeg, wenno macaammo; ket ti Dios nga iti imana isu ti yan ti angesmo, ken yan dagiti amin a dalanmo, saanmo nga intan-oc.

²⁴ Iti casta ti paset ti ima naibaon a naggapu iti sangoananna, ket naimaldit daytoy a surat.

²⁵ Ket daytoy idi ti surat a naimaldit: Mene, Mene, Tekel, Upharsin.

²⁶ Daytoy ti catarusanna: MENE; ti Dios binilangna ti pagariam, ket inyegna iti pagtungpalan.

²⁷ Tekel; nacatican iti timbengan, ket nasaracanca a nagcurang.

²⁸ Peres; ti pagariam maibingbingay, ket maited cadagiti Medos ken Persas.

²⁹ Iti casta nagbilin ni Balsasar, ket kinawesanda ni Daniel iti purpura, ket inyuccorda iti tengngedna ti tanicala, ket imbunannagda ti maipapan kencuana, nga isu coma ti maicatlo nga agturay iti pagarian.

³⁰ Iti dayta a rabii ni Balsasar nga ari dagiti Caldeos napapatay.

³¹ Ket ni Dario a Medo inawatna ti pagarian, idi nga agtawen iti innem a pulo ket dua a tawen.