Daniel 4 - Ti Biblia (1973)

Ti tagtagainep ni Nabucodonosor a maipanggep iti dackel a cayo.

¹ Ni Nabucodonosor nga ari, iti amin nga il-ili, nasnacion, ken pagsasao, nga agnaed iti amin toy daga: Talna coma ti mapaadu cadacayo.

² Napanunotco a nasayaat nga iparang dagiti pagilasinan ken nacascasdaaw nga inaramid caniac ti Cangatoan a Dios.

³ Anian a nagdackel dagiti pagilasinanna! ket anian a pannacabalin dagiti nacascasdaaw nga aramidna! Ti pagarianna isu ti pagarian nga awan inggana, ket ti panagturayna manipud caputotan agingga iti caputotan.

⁴ Siac, ni Nabucodonosor, agininanaac idi iti balayco ket agnamnamayac iti palacioc.

⁵ Nakitac iti maysa a tagtagainep a nagbutngac; ket dagiti panunot iti iddac ken dagiti parparmata iti oloc riniribucdac.

⁶ Gapu itoy nangaramidac iti bilin a mayeg itoy saclangco dagiti amin a mamasirib ti Babilonia, tapno iparangda coma caniac ti catarusan ti tagtagainep.

⁷ Idin immay dagiti magos, baglan, Caldeos, ken dagiti mammagbaglan, Caldeos, ken dagiti mammadles; ket sinaritac ti tagtagainep iti sangoananda; ngem dida naipacaammo caniac ti catarusanna.

⁸ Ngem camaudiananna immay ni Daniel, a ti naganna Baltasar, cas mayannugut iti nagan ti diosco, ket kencuana adda ti espiritu dagiti nasantoan a didios: ket imbagac ti tagtagainep iti sangona, a kinunac,

⁹ O Baltasar, apo dagiti magos, gapu ta ammoc nga adda kenca ti espiritu dagiti nasantoan a didios, ket awan ti palimed a mangriribuc kenca, ibagam coma dagiti parparmatac iti tagtagainepco a nakitac, ken ti catarusanna.

¹⁰ Castoy dagiti parparmata ti oloc iti iddac: nakitac, ket adtoy, ti maysa a cayo iti tengnga ti daga, ket iti cangatona dackel.

¹¹ Dimmackel daytoy a cayo, ket simmickil, ket ti cadackelna dimmanon agingga iti langit, ket isu makita iti amin nga ungto daytoy daga.

¹² Dagiti bulongna nasayaat, ket ti bungana adu, ket kencuana adda taraon a maipaay cadagiti isu-amin: dagiti animal ti away adda linongda iti sirocna, ket dagiti tumatayab ti langit nagtaengda cadagiti sangana, ket amin a lasag nataraonan kencuana.

¹³ Nakitac cadagiti parparmata ti oloc iti iddac, ket adtoy, maysa nga agay-aywan ken maysa a santo bimmaba a naggapu sadi langit.

¹⁴ Isu nagpuccaw a natbag, ket castoy ti kinunana, Pucanenyo ti cayo, ket putdenyo dagiti sangana, rurusenyo, dagiti bulongna, ket ipurruacyo ti bungana: pumanaw coma dagiti animal nga adda iti sirocna ken dagiti tumatayab cadagiti sangana.

¹⁵ Nupay casta ibatiyo ti puon dagiti ramutna iti daga, a sibebedbed iti landoc ken gambang iti nagtengngaan dagiti naganos a root iti tay-ac; ket maslep coma iti linnaaw ti langit; ket ti pagbiagna makibingay coma iti root ti daga cadagiti an-animal:

¹⁶ Masucatan coma ti pusona a natao-an ket maiccan coma iti puso ti animal; ket aglabasda coma kencuana dagiti nagcapito a pannawen.

¹⁷ Ti pangngeddeng nagtaud iti panagbilin dagiti agay-aywan, ket ti dawat nagtaud iti sao dagiti sasanto, tapno maawatan dagiti sibibiag a ti Cangatoan agturay iti pagarian dagiti tattao, ket isu itedna iti siasinoman a cayatna, ket pagturayenna kencuana dagiti canonomoan a tattao.

¹⁸ Siac, ari Nabucodonosor, nakitac daytoy a tagtagainep; ket sica, O Baltasar, ipalawagmo caniac ti catarusanna agsipud ta amin dagiti mamasirib ditoy pagariac saanda a mabalin nga ipacaammo ti catarusanna, ngen sica mabalinmo; ta adda kenca ti espiritu dagiti nasantoan a didios.

¹⁹ Iti casta ni Daniel, nga iti naganna idi Baltasar, napaulimec iti bassit a canito, ket dagiti panpanunotna nariribucda. Ti ari simmungbat ket kinunana, Baltasar, ti parparmata ken ti catarusanna saannaca coma a riribuken. Simmungbat ni Baltasar ket kinunana, Apoc, ti parparmata agpaay coma cadagiti gumura kenca, ket ti catarusanna agpaay cadagiti cabusormo.

²⁰ Ti cayo a nakitam, a timmubo, ken nagbalin a nasickil, ket ti cadackelna dimmanon iti langit, ket isu mabuya ti amin toy lubong;

²¹ Ket dagiti bulongna nasayaat, ket ti bungana adu, ket adda mabalin a taraon ti isu-amin kencuana; iti sirocna taeng dagiti animal ti tay-ac, ket cadagiti sangana pagaponan dagiti tumatayab ti langit:

²² Sica met laeng, O ari, a dimmackelca ket nagbalinca a napigsa; immadda ti tan-ocmo, ket dumanon iti langit, ket ti panagturaymo agingga iti pagpatingaan ti daga.

²³ Ket no maipapan iti nakita ti ari a maysa nga agay-aywan ken maysa a santo bumaba a naggapu iti langit, ket kinunana, Pucanenyo ti cayo, ket isu dadaelenyo; nupay casta ibatiyo ti puon dagiti ramutna iti daga, a sibebedbed iti landoc ken gambang, iti nagtengngaan dagiti naganus a root ti tay-ac, ket marusep coma iti linnaaw ti langit, ken ti bingayna mairaman cadagiti an-animal iti away inggana iti aglasat kencuana dagiti pito a pannawen;

²⁴ Daytoy ti catarusanna, O ari, ken ti pangeddeng ti Cangatoan, isu a mapasamac iti ari nga apoc:

²⁵ A mapagtalawcanto iti arpad dagiti tattao ket iti taeng dagiti an-animal ti away isunto ti pagtaengam, ket maipaarabcanto cadagiti root a cas a cadagiti vaca, ket itinto linnaaw ti langit ti mangsel-lep kenca; ket aglasatto kenca dagiti pito a pannawen; inggana iti maawatam a ti Cangatoan, agturay ti pagarian dagiti tattao, ket isu itedna iti siasinoman a cayatna.

²⁶ Ket no maipapan iti imbilinda nga ibatida iti daga ti puon dagiti ramramut ti cayo; ti pagarian matdanto kenca a di maanano iti calpasan ti pannacabigbigmonto a dagiti langlangit agturayda.

²⁷ Gapuna, O ari, nga anamungam coma toy balacadco, ket isinam dagiti basolmo babaen ti kinalinteg, ken dagiti babacmo iti panangiparangmo iti asi cadagiti napanglaw: bareng no mapaatiddug ti kinatalnam.

²⁸ Amin dagitoy napasamac ken ari Nabucodonosor.

²⁹ Iti calpasan ti sangapulo ket dua a bulan isu agpaspasiar iti naarian a palacio sadi Babilonia.

³⁰ Nagsao ti ari ket kinunana, Saan aya a daytoy ti dackel a Babilonia a binangonco a maipaay iti palacio a naarian, babaen ti bileg ti pannacabalinco a maipaay iti dayag toy kinatan-occo?

³¹ Idi adda pay laeng nga agsasao ti ari, dimteng ti maysa a timec a naggapu iti langit, a kinunana, O ari Nabucodonosor, maibaga kenca, Ti pagarian maipanaw kenca:

³² Ket mapagtalawcanto iti arpad dagiti tattao; ket agtaengcanto iti yan dagiti animal ti tay-ac; ket maipaarabcanto a cas cadagiti vacvaca, ket dagiti pito a pannawen aglasatdanto kenca; agingga iti mabigbigmonto a ti Cangatoan agturay iti pagarian dagiti tattao, ket isu itedna iti siasinoman a cayatna.

³³ Iti daydi met laeng nga horas natungpal ti banag ken Nabucodonosor: ket napagtalaw iti arpad dagiti tattao, ket nagarab iti root a cas cadagiti vacvaca, ket ti bagina naslep iti linnaaw ti langit, inggana a ti boocna timmubo a cas dutdut ti aguila, ket dagiti cucona cas cuco dagiti tumatayab.

³⁴ Ngem iti calpasan dagiti al-aldaw siac, ni Nabucodonosor, intangadco dagitoy matac sadi langit, ket ti nakemco nagpulang caniac, ket binenditoc ti Cangatoan, ket dinaydayawco ken intan-occo daydiay nga agbiag iti agnanayon; agsipud ta ti panagturayna agnanayon a panagturay, ket ti pagarianna manipud caputotan agingga iti caputotan;

³⁵ Ket amin dagiti agnaed iti lubong maibilangda a cas awan; ken aramidenna cas pagayatanna iti buyot ti langit ken cadagiti agnaed iti daga; ket awan ti manglapped iti imana, wenno agcuna kencuana, Ania ti aramidem?

³⁶ Iti daydi met laeng a pannawen ti nakemco nagpulang caniac, ket maipaay iti dayag ti pagariac, ti dayaw ken ti kinatan-occo nagpulangda caniac; ket dagiti consejerosco ken pangoloec sinapuldac; ket naisubliac iti pagariac, ket mangnibinibi a kinatan-oc nainayon caniac;

³⁷ Ngarud siac, ni Nabucodonosor, dayawec ken itandudoc ken itan-occo ti ari ti langit, agsipud ta amin nga aramidna pudnoda, ket dagiti dalanna kinajusticia; ket isu mabalinna a pagpacumbabaen dagiti magna iti kinatangsit.