Daniel 12 - Ti Biblia (1973)

Ti tulong ni Miguel iti pannawen ti riribuc. Ti pannawen a pannacatungpal.

¹ Ket iti dayta a pannawen agtacderto ni Miguel, a dackel a principe, isu nga agtacder a maipaay cadagiti annac ti ilim; ken addanto pannawen ti riribuc, isu nga awan idi uray caanoman nanipud iti caadda ti nacion agingga met laeng iti dayta a pannawen: ket iti dayta a pannawen ti ilim maispalto, tunggal maysa a masaracto a naisurat iti libro.

² Ket adu cadagidiay a maturog iti tapoc ti daga mariingdanto, ti dadduma iti biag nga agnanayon, ket ti dadduma iti pannacaibabain ken awan ti patinggana nga umsi.

³ Ket dagiti mamasirib aglawagdanto a cas iti raniag ti tangatang; ket dagiti mangiragpat cadagiti adu iti kinalinteg casdanto cadagiti bitbitwen iti agnanayon nga awan ti inggana.

⁴ Ngem sica, O Daniel, punitam dagiti sao, ket timbream ti libro agingga met laeng iti pannawen a pannacatungpal: adu dagiti agtarayto a mapan ken agsubli, ket ti pannacaammo umadunto.

⁵ Idin siac, ni Daniel, kimmitaac, ket, adtoy, nagtacder dagiti dua a sabali, ti maysa iti igid ti carayan iti daytoy a bangir, ket ti sabali iti igid ti carayan iti dayta a bangir.

⁶ Ket ti maysa kinunana iti tao a nagcawes iti lienzo, isu nga adda idi iti ngatoen dagiti dandanum ti carayan, Casanonto ti cabayagna agingga iti panungpalan dagitoy a nacascasdaaw?

⁷ Ket nangngegco ti tao a nagcawes iti lienzo, isu nga adda idi iti ngatoen dagiti dandanum ti carayan, idi intayagna ti canawan ken ti catigid nga imana nga impalangit, ket insapatana iti daydiay agbiag iti agnanayon, a maipaayto iti maysa a pannawen, dagiti panpanawen, ken maysa a cagudua; ket intono naaramiddan ti panungpalan ti pannacaburburac ti pannacabalin ti nasantoan nga ili, amin dagitoy a banbanag malpasdanton.

⁸ Ket nangngegco ngem diac naawatan: idin kinunac, O Apoc, anianto ti tungpal dagitoy a banbanag?

⁹ Ket isu kinunana, Inca iti dalanmo, Daniel; ta dagiti sasao maripcanda ken matimbrean agingga iti pannawen ti pannacatungpal.

¹⁰ Adu dagiti aggugorto cadagiti bagbagida met laeng, ken papudawenda dagiti bagbagida met laeng, ket madalusanda; ngem dagiti managdacdakes agaramiddanto a sidadangkes; ket awan cadagiti managdacdakes ti macaawat; ngem dagidiay mamasirib maawatandanto.

¹¹ Ket manipud iti pannawen a ti di agsarday a daton a mapuuran maicatto, ket ti kinarimon a mamaglangalang mabangonto, addanto sangaribu duagasut ket siam a pulo nga aldaw.

¹² Nagasat ti aguray, ken macagteng iti sangaribu tallo gasut ket tallopulo ket lima nga aldaw.

¹³ Ngem sica inca iti dalanmo agingga iti panungpalan; ta aginanacanto, ken agtacdercanto iti bingaymo iti panungpalan dagiti al-aldaw.