Daniel 10 - Ti Biblia (1973)

Ti sirmata ni Daniel iti maysa a tao. Isu mapabuteng, ket isu ti liwliwaen ti tao.

¹ Iti maicatlo a tawen ni Ciro nga ari ti Persia maysa a banag ti naipaltiing ken Daniel, a ti naganna nanaganan idi iti Baltasar; ket daydi a banag pudno, a maysa met laeng a dackel a gubat; ket isu naawatanna ti panggep, ket adda idi pannacaawatna iti sirmata.

² Cadagita nga al-aldaw siac, ni Daniel, nagpanesac bayat ti tallo a lawasna.

³ Saanac a nangan iti naimas a tinapay, ket awan met ti simrec a lasag wenno arac iti ngiwatco, ket diac met sinapsapoan a pulos ti bagic met laeng, agingga iti naturpus amin a tallo a lawasna.

⁴ Ket iti maicaduapulo ket uppat nga aldaw ti umuna a bulan, idi nga addaac iti igid ti dackel a carayan, a Hiddekel.

⁵ Intangadco dagiti matac, ket kimmitaac, ket adtoy, ti maysa a tao a nagcawes iti lienzo, a dagiti lomona nabaricsanda iti pulos a balitoc ti Ufaz:

⁶ Ti bagina met mayasping iti berilo, ket ti rupana cas iti langa ti kimat, ket dagiti matana casda gumilgil-ayab nga aluten, ket dagiti tackiagna ken sacana casda napasileng a gambang, ket ti timec dagiti sasaona cas la timec ti umariwecwec a tattao.

⁷ Ket siac, ni Daniel, siac laeng ti nacakita ti sirmata; ta dagiti tattao a cadduac saanda a nakita ti sirmata; ngem maysa a dackel a panagkintayeg napasamac cadacuada, ket isuda nagtalawda a naglemmeng.

⁸ Gapuna a nagbatiac a maymaysa, ket nakitac daytoy dackel a sirmata, ket awan ti nabati a pigsa caniac; ket ti kinataerco nagbalin caniac a panagrupsa, ket awan ti nabati caniac a pigsa.

⁹ Nupay casta nangngegco ti aweng dagiti saona ket idi a nangngegco ti aweng dagiti saona, napasagacon iti nargaan a turog a sipapaclebac, a ti rupac nagdisso iti daga.

¹⁰ Ket adtoy, maysa nga ima sinagidnac, ket insimpanac cadagiti tumengco ken cadagiti daculap dagiti imac.

¹¹ Ket kinunana caniac, O Daniel, sica tao a madongngo unay, awatem dagiti sasao nga imbagac kenca, ket tumacderca nga agtindec; ta kenca naibaonac ita. Ket idi a naibagana daytoy a sao caniac, timmacderac a sipipigerger.

¹² Idin kinunana caniac, Dica agbuteng, Daniel, ta nanipud idi damo nga aldaw a panangipapusom nga umawat ken agpacumbaba iti sangoanan ti Diosmo, dagiti saom naipangagda: ket umayac gapu cadagiti saom.

¹³ Ngem ti principe ti pagarian ti Persia bimmusor caniac bayat ti duapulo ket maysa nga aldaw, ngem adtoy, ni Miguel a maysa cadagiti pangulo dagiti principe, immaynac tinulongan; ket siac nagbatiac idiay cadagiti ar-ari ti Persia.

¹⁴ Ita umayac a mangipaawat kenca no ania ti mapasamacto iti ilim cadagiti adlaw a maud-udi; ta ti sirmata maipaay pay laeng cadagiti adu nga aldaw.

¹⁵ Ket idi a naibagana caniac ti mayannurot cadagitoy a sasao, indumogco ti rupac iti daga ket nagumelac.

¹⁶ Ket adtoy ti maysa nga umasping cadagiti annac dagiti tattao sinagidna dagiti bibigco: idin rinugiac ti nagsao, a kinunac iti daydi nagtacder idi sangoanac, O apoc, gapu iti sirmata dagiti ladingitco nagsublida caniac, ket awan ti nabati caniac a pigsa.

¹⁷ Ta casano ti pannakisao ti adipen daytoy apoc itoy apoc? ta no maipapan caniac, nadagdagus nga awan caniac ti nabati a pigsa, ket awan met ti anges a natda caniac.

¹⁸ Idin kinalbitnac manen ti maysa nga umasping iti tao, ket isu pinapigsanac.

¹⁹ Ket kinunana, O tao a madongngo unay, dica abuteng: adda coma kenca ti talna, bumilegca, wen, bumilegca. Ket idi a nagsao caniac napapigsaac, ket kinunac, Agsao coma ti apoc; agsipud ta pinapigsanac.

²⁰ Idin kinunana, Dica ammo aya no ania ti gapuna nga umayac kenca? ket ita agsubliac a manggubat iti principe ti Persia: ket intono mapanac, adtoy, ti principe ti Grecia umayto.

²¹ Ngem ibagacto kenca dayta nailanad iti surat ti pudno: ket awan ti timmulong caniac a maibusor cadagitoy, no di la ni Miguel a principeyo.