Daniel 1 - Ti Biblia (1973)

Ni Daniel ken tallo cadagiti gagayyemna iti palacio ni ari Nabucodonosor.

¹ Idi maicatlo a tawen ti panagturay ni Joakim, ari ti Juda, immay ni Nabucodonosor, ari ti Babilonia, idiay Jerusalem ket linacubna.

² Ket ti Apo inyawatna cadagiti im-imana ni Joakim, ari ti Juda, agraman dadduma nga al-alicamen ti balay ti Dios; ket impanna ida, iti daga a Sinar iti balay ti diosna, ket inserrecna dagiti alicamen iti balay a paggamengan ti diosna.

³ Ket ti ari nagsao ken Aspenaz, apo dagiti eunucona, nga ipastrecna coma ti dadduma cadagiti annac ti Israel, iti putot a naarian ken cadagiti natan-oc,

⁴ Babbaro nga cadacuada awan ti pacapilawan, no di ket nataraki, ket naisuroda iti amin a kita ti sirib, nga adda cadacuada ti pannacaammo ken kinalaing iti ciencia, ken naaddaan pannacabalinda a pimmarang iti palacio ti ari; ket isurona coma cadacuada ti sursuro ken ti pagsasao dagiti Caldeos.

⁵ Ket ti ari inkeddengna a maipaay cadacuada iti inaldaw a paset ti taraon ti ari ken ti arac nga ininumenna, ken isuda mataraonanda coma bayat ti tallo a tawen; ta tapno iti calpasan dagitoy, agtaengda coma iti sangoanan ti ari.

⁶ Ket cadagiti annac ni Juda adda, da Daniel, Ananias, Misael ken Azarias.

⁷ Ket ti pangulo dagiti eunuco pinanagananna ida; ni Daniel pinanagananna ti Baltasar; ni Ananias, Sidrac; ni Misael, Misac; ket ni Azarias, Abdenago.

⁸ Ngem ni Daniel pinanggepna iti pusona ti saanna a pannacatulaw cadagiti taraon ti ari ken ti arac nga in-inumenna; iti casta dinawatna iti pangulo dagiti eunuco iti saanna coma a pannacatulaw.

⁹ Ket ti Dios inaramidna a ni Daniel nasaracanna ti kinaimbag ken asi iti imatang ti pangulo dagiti eunuco.

¹⁰ Ket kinuna ti pangulo dagiti eunuco ken Daniel, Agbutengac ken apoc nga ari a nangeddeng cadagiti canenyo ken inumenyo; ta ania ti gapuna a makitananto dagiti rupayo a nabesbessagda ngem cadagiti rupa dagiti babbaro a capatadanyo? iti casta ipeggadyo coma toy oloc iti ari.

¹¹ Idin ni Daniel kinunana iti mayordomo a tinudingan ti pangulo dagiti eunuco a mangaywan cada Daniel, Ananias, Misael, ken ni Azarias;

¹² Dawatec kenca, padasem cadi dagiti adipenmo bayat ti sangapulo nga aldaw, ket iccandacami coma cadagiti bucbukel a canen ken danum nga inumen.

¹³ Calpasanna maiparang coma iti sangoanam dagiti rupami ken dagiti rupa dagiti babbaro a mangan iti taraon ti ari, ket cas ti maimatangam, aramidem coma cadagiti adipenmo.

¹⁴ Impangagna ngarud ida iti daytoy, ket pinadasna ida bayat ti sangapulo nga aldaw.

¹⁵ Ket iti calpasan dagiti sangapulo nga aldaw, nagparang dagiti rupada a nasaysayaat ken naluclucmeg ngem cadagiti amin a babbaro a nangan iti taraon ti ari.

¹⁶ Iti casta ti mayordomo iniccatna ti naarian a taraonda ken arac nga inumenda coma, ket iniccanna ida cadagiti bucbukel.

¹⁷ Ket no maipapan cadagitoy uppat a babbaro iniccan ida ti Dios iti pannacaammo ken kinalaing iti isu-amin a sursuro ken sirib, ket ni Daniel adda pannacaawatna cadagiti isu-amin a sirmata ken tagtagainep.

¹⁸ Calpasan ngarud dagiti al-aldaw nga inkeddeng ti ari a pannacaiparangda ti pangulo dagiti eunuco imparangna ida iti saclang ni Nabucodonosor.

¹⁹ Ket ti ari nagsao cadacuada, ket cadacuada amin awan nasarac a sabali a cas ken Daniel, Ananias, Misael, ken Azarias; iti casta nagtaengda iti saclang ti ari.

²⁰ Ket amin a panggep a maipapan iti sirib ken pannacaawat a sinaludsud ti ari cadacuada nasaracna a nalalaingda iti maminpulo ngem amin cadagiti magos ken baglan nga adda idi iti sacup ti pagarianna.

²¹ Ket ni Daniel nagtaeng inggana iti umuna a tawen ni ari Ciro.