Dagiti Proverbio 9 - Ti Biblia (1973)

Rambac ni sirib ken panangawisna. Ti panangawis ti maag a babai.

¹ Ti sirib binangonnan ti balayna; tinubayna dagiti pito nga adigina:

² Pinartina dagiti animalna; nangtempla iti aracna, ket pinunianna met ti lamisaanna:

³ Imbaonna dagiti ubbingna a babbai; ipucpuccawna iti tapaw dagiti catayagan a disso ti ili:

⁴ Siasinoman a nanengneng, agturong coma ditoy: no maipaay iti awanan pannacaawat, isu ibagana kencuana,

⁵ Umayca, manganca itoy tinapayco, ket uminumca iti arac a tinemplac.

⁶ Agsardaycayon, dacayo a nanengneng, ket agbiagcayo; ket magnacayo ala iti dalan ti pannacaawat.

⁷ Ti mamagbaga iti managababi magun-oddana ti pannacauyaw; ti mangtubngar iti nadangkes a tao macagun-od ti piltac.

⁸ Dica tubngaren ti managababi, di la ket ta caguranaca: tubngarem ti masirib a tao, ket ayatennacanto.

⁹ Iccam iti pannursuro ti masirib a tao, ket masmasiribto pay: isurom ti sililinteg a tao, ket dumegdegto iti pannacasursuro.

¹⁰ Ti panagbuteng ken ni Jehova isu ti punganay ti sirib; ket ti pannacaammo iti Santo isu ti pannacaawat.

¹¹ Ta maipuon caniac dagiti aldawmo mapaadudanto, ken dagiti tawen ti panagbiagmo manayondanto.

¹² No masiribca, masiribca a maipaay kenca met laeng; ket no mangab-abica, sicsica met laeng ti mangibtorto.

¹³ Ti maag a babai naariangga; nanengneng, ket awan ammona.

¹⁴ Ken agtutugaw iti ruangan ti balayna, iti tugaw cadagiti natayag a disso ti ili,

¹⁵ Tapno agayab cadagiti aglabas, a magna a sililinteg cadagiti dalanda:

¹⁶ Siasinoman a nanengneng, agturong coma ditoy; ket no maipaay iti awanan pannacaawat, isu ibagana kencuana,

¹⁷ Dagiti tinacaw a danum nasam-itda, ket ti tinapay a kinnan nga incurcurimed naimas.

¹⁸ Ngem isu dina ammo a dagiti natay addada sadiay; a dagiti sangailina addada cadagiti yuyeng ni Tanem.