Dagiti Proverbio 7 - Ti Biblia (1973)

Kinamaag ti itutuloc cadagiti panangsulisog ti balangcantis.

¹ Anacco, salimetmetam dagiti sasaoc, ket icutam dagiti bilbilinco kenca.

² Salimetmetam dagiti bilbilinco ket agbiagca; ken ti lintegco a cas iti bukel ta matam.

³ Ireppetmo ida cadagita ramramaymo; isuratmo ida iti tapi ta pusom.

⁴ Cunaem ken kinasirib, Sica ti babai a cabsatco; ket ni pannacaawat naganem a cabagiam nga ingam:

⁵ Tapno masaluadandaca iti babai a gangannaet, iti gangannaet a mangpasablog cadagiti sasaona.

⁶ Ta iti tawa ti balayco simmiripac iti rejas;

⁷ Ket namatmatac cadagiti nanengneng, nalasinco cadagiti bumbumaro, ti maysa nga agtutubo a lalaki nga awanan iti pannacaawat,

⁸ Nga aglasat iti lansangan iti sibay daydiay a babai; ket napan iti dalan nga agturong iti balayna,

⁹ Iti agsuripet ti malem, iti sardam iti cangitingit ti rabii ken iti kinasipnget.

¹⁰ Ket, adtoy, idiay sinabet ti maysa a babai a binabalangcantis ti cawesna, ken sisisicap ti pusona.

¹¹ (Naariwawa ken managipapilit; dagiti sacsacana dida agtaeng idiay balayna:

¹² Adda cadagiti calsada ita, pagammoan cadagiti plasa, ket agsaneb tunggal nagsulian.)

¹³ Idi a casta isu kinemmegna, ket inongngoanna, ket iti nagaramugam a rupana kinunana kencuana:

¹⁴ Sacrificio dagiti datdaton ti cappia addada caniac; ita nga aldaw binayadacon dagiti carcaric.

¹⁵ Gapuna immayac a manarac kenca, mangbiruc a sireregta ita rupam, ket nasaracancan.

¹⁶ Inyucradco ti pagiddaac a naapaan, cadagiti luplupotpa naggarit nga abel sadi Egipto.

¹⁷ Binangbangloac ti iddac iti mirra, aloe, ken canela.

¹⁸ Umayca, agpennecta iti ayan-ayat inggana iti bigat; aglinglingayta iti ayayat.

¹⁹ Ta ti lalaki awan ditoy balay; napan iti atiddug a pannagna:

²⁰ Nangicuyog iti sangasupot a pirac; dumtengto ditoy balay intono cabus.

²¹ Iti adu a macaayayo a sarsaritana mapagtulocna; iti panangpasablog dagiti bibigna mapilitna.

²² Ti lalaki sumuroten kencuana a masingsingdat a cas vaca a maipan iti pagpartian. Wenno cas maysa a nacawaran a mapan iti pacadusaan ti maag:

²³ Agingga ti maysa a pana salbagenna ti dalemna; cas maysa a tumatayab nga agdarasudos iti silo, ket dina ipagarup a maicaniwas iti biagna.

²⁴ Ita ngarud, annacco, dumngegcayo caniac, ket imdenganyo dagiti sasao ti ngiwatco.

²⁵ Dayta pusom saan coma nga agduyus cadagiti dalanna; dica coma mayawawan cadagiti danana.

²⁶ Ta isu adun ti impasagna a nasugat; wen, dagiti pinapatayna casla nawadwad a buyot.

²⁷ Ti balayna isu ti dalan nga agturong ken Tanem, nga agpababa cadagiti silsiled ni patay.