Dagiti Proverbio 5 - Ti Biblia (1973)

Ti peggad ti ayat a saan a nadalus.

¹ Anacco, imatangam ti kinasiribco; iyallingagmo ta lapayagmo iti pannacaawatco:

² Tapno masalacnibam ti kinamanakem ken dagiti bibigmo masalimetmetanda ti pannacaammo.

³ Ta dagiti bibig ti manangallilaw a babai agtedtedda iti diro, ket ti ngiwatna nalamlamuyot ngem lana:

⁴ Ngem iti panungpalan napait a cas iti mula nga ajinco, natadem a cas campilan a dua ti tademna.

⁵ Dagiti sacana agpababada ken patay; dagiti addangna maicapetda ken Tanem;

⁶ Iti casta isu dina saraken ti napalanas a dalan ti biag; dagiti dalanna aglikiglikigda, ket saana a mabigbig.

⁷ Ita ngarud, annacco, dumngegcayo caniac, ket dicayo pagtalawan dagiti sasao ti ngiwatco.

⁸ Ilisim ti dalanmo iti adayu kencuana, ket dica umasideg iti ruangan ti balayna;

⁹ Di la ket ta maitedmo ta dayawmo cadagiti sabsabali, ken dagiti tawenmo iti nadawel;

¹⁰ Di la ket ta dagiti gangannaet agpennecda ita pigsam, ket dagiti pagbannogam mararitda iti balay ti gangannaet,

¹¹ Ket sica agladingitca iti camaudianan a tungpalmo, intono ti lasagmo ken ti bagim marunotda,

¹² Ket macunamto, Apay aya a ginurac idi ti sursuro, ken toy pusoc linaisna ti pannacatubngar;

¹³ Ken iti diac panagtulnog idi iti timec dagiti manursuro caniac, ken diac met panangyallingag itoy lapayagco cadagidi nangisuro caniac!

¹⁴ Nganngani nairamanac ti amin a dakes iti tengnga ti gimong ken tallaong.

¹⁵ Uminumca iti danum cadagiti tangkem met laeng, ken tumbog a danum cadagiti bubonmo met laeng.

¹⁶ Maiparbeng aya nga agwarasto coma ti danum cadagiti calcalsada?

¹⁷ Maipaayda coma kenca laeng, a saan ket a cadagiti gangannaet a naicuyog kenca.

¹⁸ Mabendicionan coma ti ubbogmo; ket pagrag-oam ti asawa ti kinaagtutubom.

¹⁹ Cas naayat a caba-ian nga ugsa, ket macaayayo nga ugsa a caba-ian, dagiti barucongna pennekendaca coma a cancanayon; ket macayawanca coma nga agnanayon iti ayatna.

²⁰ Ta apay, anacco, a macayawancanto iti babai a gangannaet, ken aracupemto ti barucong ti gangannaet?

²¹ Ta dagiti daldalan ti tao addada iti saclang dagiti mata ni Jehova; ket palanasenna dagiti amin a pagnaanna.

²² Dagiti kinadakesna met laeng kemmegendanto ti nadangkes, ket matengngelto cadagiti singdan ti basolna.

²³ Matayto gapu ti caawan ti sursuro; ket iti cadackel ti kinamaagna maiwawanto.