Dagiti Proverbio 4 - Ti Biblia (1973)

Naamaan a bagbaga iti pannagna cadagiti mamabiag a dalan ti kinasirib.

¹ Denggenyo, annacco, ti panangisuro ti maysa nga ama, ket imatanganyo tapno maammoanyo iti pannacaawat:

² Ta iccancayo iti naimbag a sursuro; dicayo baybay-an ti lintegco.

³ Ta maysaac idi nga anac ni amac, nadungdungngo ken cacaisuna nga ayayaten ni inac.

⁴ Ket insursuronac, ken kinunana caniac; agtalinaed cadi ita pusom dagiti sasaoc; salimetmetam dagiti bilbilinco, ket agbiagca;

⁵ Gun-odem ti sirib, gun-odem ti pannacaawat; dica aglipat, dica met agligsay cadagiti sasao ti ngiwatco;

⁶ Dica baybay-an, ket isu ti mangsalacnibto kenca; ayatem ket saluadannacanto.

⁷ Ti sirib isu ti cangronaan a banag, gun-odem ngarud ti sirib; wen, cadagiti amin a gungun-odem gun-odem ti pannacaawat.

⁸ Itantan-ocmo, ket isu ipangatonacanto; ipannacanto iti kinadayaw, intono isu aracupem.

⁹ Iccannanto ta olom iti balangat ti saniata; balangat ti kinapintas ti iyawatnanto kenca.

¹⁰ Denggem, O anacco, ket awatem dagiti panagsaoc ket dagiti tawen ti panagbiagmo adudanto.

¹¹ Insurocan iti dalan ti sirib; inturongcan cadagiti dana ti kinalinteg.

¹² Intono magnaca, dagiti addangmo saandanto a masingsinged; ket no agatrayca, dicanto maitibcol.

¹³ Irutem a petpetan ni sursuro; dica palubosan: salimetmetam; ta isu ti biagmo.

¹⁴ Dica sumrec iti dana dagiti nadangkes, ket dica umasac iti dalan dagiti dakes a tattao.

¹⁵ Liclicam, dica lumasat kencuana; sumiasica kencuana, ket magnacan.

¹⁶ Ta dida maturog, no saanda pay a macaaramid iti dakes; ket ti turogda umadayo, no awan ti mapadsoda.

¹⁷ Ta tinapay ti kinadangkes ti canenda, ket arac ti kinauyong ti inumenda.

¹⁸ Ngem ti dana ti nalinteg cas iti annaraar ti agsapa, a rumaniag a rumaniag agingga iti napaypayso nga aldaw.

¹⁹ Ti dalan ti nadangkes cas iti kinasipnget: dida ammo no ania ti pacaitibcolanda.

²⁰ Anacco, imdengam dagiti saoc; iyallingagmo ta lapayagmo cadagiti panagsaoc.

²¹ Dica paluspusan ida a pumanaw cadagita matam; salimetmetam ida iti tengnga ta pusom.

²² Ta isuda ti biag cadagiti macasarac cadacuada, ket salun-at iti amin a lasagda.

²³ Igagam ta pusom iti amin a regtam; ta aggapu kencuana dagiti pagbanagan ti biag.

²⁴ Iwalinmo kenca ti nabassawang a ngiwat, ken dagiti nagulib a bibig yadayom kenca.

²⁵ Dagiti matam cumitada cadi nga aglinteg laeng, ket dagita calub ti matam sililinteg cadi ti turongda dita sangoanam.

²⁶ Palanasem ti pagnaan dagita sacsacam, ket dagiti amin a daldalanmo nasimpada coma.

²⁷ Dica sumiasi iti macanawan wenno iti macatigid: ilisim dagiti sacsacam iti dakes.