Dagiti Proverbio 2 - Ti Biblia (1973)

Ti isusurot ken sirib mangabac iti kinatalingenngen ken kinasingpet.

¹ Anacco, no awatemto dagiti saoc, ket ipenpenmo kenca dagiti bilinco;

² Iti casta iyallingagmo ta lapayagmo iti kinasirib, ken icapetmo ita pusom iti panacaawat;

³ Wen, awagam ti kinasaririt; ket idir-im ta timecmo a maipaay iti pannacaawat;

⁴ No isu birukem a cas pirac, ken tontonem a cas nalmeng a gamgameng:

⁵ Iti casta maawatamto ti panagbuteng ken ni Jehova, ken masaracamto ti pannacaammo iti Dios.

⁶ Ta ni Jehova mangted iti sirib; agtaud iti ngiwatna ti pannacaammo ken pannacaawat:

⁷ Ipenpenna iti natarnaw a sirib a maipaay iti nalinteg; isu ti calasag dagiti magna iti kinaimbag,

⁸ Tapno mabantayanna dagiti dandana ti kinajusticia, ken masalacnibanna ti dalan dagiti sasantona.

⁹ Iti casta maawatamto ti kinalinteg ken kinajusticia, ken ti kinaagpapada, wen, tunggal naimbag a dana.

¹⁰ Ta ti sirib sumrecto dita pusom, ket ti pannacaammo macaay-ayonto ita cararuam;

¹¹ Ti kinaannad salluadannacanto; ti pannacaawat igaganacanto:

¹² Tapno ilisidaca iti dalan ti dakes, cadagiti tattao nga agsao cadagiti naulpit a banbanag;

¹³ Isuda a mangbaybay-an cadagiti dana ti kinalinteg, tapno magnada cadagiti dalan ti kinasipnget;

¹⁴ Isuda a maragsacan nga agaramid iti dakes, ken marayray-aw iti kinaulpit ti dakes;

¹⁵ Isuda a nakillo cadagiti dalanda, ken sisusungitda cadagiti desdesda:

¹⁶ Tapno ilisidaca iti gangannaet a babai, wen, iti gangannaet a mangpasablog babaen cadagiti saona;

¹⁷ A baybay-anna ti gayyem ti kinabalasangna, ken lipatenna ti tulag ti Diosna:

¹⁸ Ta ti balayna agirig ken patay, ket dagiti desdesna agturongda cadagiti natay;

¹⁹ Siasinoman a mapan kencuana dida agsublin, dida met magun-odanen dagiti dandana ti biag:

²⁰ Tapno macapagnaca iti dalan dagiti naimbag a tattao, ken mataginayonmo dagiti dandana dagiti nalinteg.

²¹ Ta ti nalinteg agtalinaedto ditoy daga, ket ti napnoan-imbag agtaengto kencuana.

²² Ngem dagiti nadangkes magudasdanto ditoy daga, ket dagiti nagulib maparutdanto kencuana.